Mga Hulagway sa Hugot nga Pagtuo
Kevin ug Kendra Henderson
North Carolina, USA
Sa sinugdanan, si Kendra supak sa kainteresado ni Kevin sa Simbahan. Karon ilang gihandum og balik ug nakita kon giunsa silang duha sa paggiya sa Ginoo.
Leslie Nilsson, litratista
Kevin:
Akong nahimamat si Gregory samtang nagtrabaho sa Veterans Administration hospital. Usa ka adlaw nag-istorya kami sa dihang adunay usa ka tawo nga miduol ni Gregory ug nangutana kon siya usa ba ka Mormon. Gikan diha, ilang gisugdan sa pagtandi ang Biblia ug ang Basahon ni Mormon. Adunay nakapatandog kaayo nako samtang nag-istorya sila. Nakapahimo kini nako nga nakuryoso.
Dihang mipauli ko sa balay, nangutana ko ni Kendra kon aduna ba siyay nasayran kabahin sa mga Mormon.
“Mas maayo nga dili ka motuo og bisan unsang butang mahitungod niana,” miingon siya nako.
Nakuryuso gihapon ko ug naghinamhinam sa pagbalik sa trabaho pagkasunod adlaw ug makat-on pa og dugang. Samtang nag-istorya kami, si Gregory nangutana kanako kon mituo ba ko nga ang akong espiritu diha na sa wala pa kining kinabuhia. Ang pangutana mituhop gayud kanako. Wala gyud ako makahunahuna niana sa una.
“Hinoon, kon sa akong bana-bana, mosulti ko nga oo,” miingon ko.
“Adunay mas daghan pa nga kahibalo nga giandam sa Langitnong Amahan alang sa tanan Niyang mga anak,” miingon si Gregory kanako.
Nakigsulti ko ni Kendra mahitungod sa unsay akong nakat-unan, apan supak siya niini. Miingon siya nako nga siya ug ang mga bata dili gayud motaak “nianang” simbahana. Nahimo ko nga madapigon, diin werdo kaayo. Akong gidapigan ang butang nga wala koy nahibaloan.
Usa ka gabii akong gihatud si Kendra sa balay sa iyang higala ug miadto ko aron makigkita sa akong papa. Siya usa ka deacon sa lain nga simbahan, mao nga nahadlok ko sa pagpangutana niya kon duna ba siyay nasayran kabahin sa Simbahan.
Siya miingon, “Nakadungog ko og butang mahitungod sa ilang pagkapari nga wala itugot ngadto sa mga itom nga mga tawo, apan ikaw usa ka maayong tawo. Iampo kini, ug ang Dios mopahibalo kanimo.”
Nianang gabhiona, miluhod ko aron sa pag-ampo, apan wala koy mahunahunaan nga ikasulti. Puslan man, nagluhod naman gyud ko, naghunahuna ko. Kinahanglan duna koy ikasulti! Mao nga miingon lang ko, “Pinalanggang Langitnong Amahan, gihigugma ko ikaw.”
Wala ko mahimutang nianang gabhiona. Nag-alindasay ako. Nagtinguha ko og usa ka butang—ingon og duna koy gikahidlawan. Nakamata ko nianang buntaga ug nanghinaut nga unta si Gregory dili na mosulti og dugang mahitungod sa Simbahan. Nalibog ko mahitungod sa tanan nga nahitabo. Dili sab ko gusto nga kini ang hinungdan nga mawad an ko sa akong kaminyoon. Apan dunay piho nga mga butang nga makapaikag, ug gusto kong mangutana ni Gregory. Sa hinay-hinay, nakat-on ko og dugang mahitungod sa Simbahan.
Si Kendra ug ako padayon nga naglalis. Atol sa usa ka panaglalis, naaghat ko nga dili mosulti og bisan unsa. Misulod ko sa banyo ug miluhod.
Misulti ko sa Langitnong Amahan nga akong buhaton ang bisan unsang butang kon Siya mopahibalo nako sa dalan nga Iyang gusto nga akong subayon. Kon maghunahuna ko mahitungod sa bunyag, mibati ko niining pagsiging-siging, sama sa hangin, nga midapat kanako. Mao kadto ang Espiritu Santo nga nagsulti kanako, “Mao kini ang gikinahanglan nimong buhaton.”
Andam nako nga mabunyagan. Pagkasunod buntag, miadto ko sa trabaho ug mistorya sa akong kasinatian kang Gregory. Miingon ko, “Ako andam na, bay.”
Iyang gihan-ay ang akong pagkighimamat sa mga misyonaryo. Gitudloan ko nila sa mga leksyon, ug maayo ra kini ug paspas gayud! Wala gayud ko mangutana og bisan unsa. Nasayud ko nga si Propeta Joseph Smith nakakita sa unsay iyang nakita. Ako adunay pagpamatuod. Apan nakapahilayo lang kini og samot kang Kendra.
Kendra:
Naluya na kaayo ko sa paghunahuna, sa pisikal ug espirituwal nga paagi. Sa pagkatinuod mibalhin ko sa Florida sulod sa pipila ka bulan. Usa ka adlaw nangamuyo lang ko og maayo ngadto sa Dios, “gikapoy na ko sa pakiglalis. Palihug tabangi ko nga masayran kon kini ba nga Simbahan ang husto.”
Samtang nag-ampo ko, ang kalinaw miabut kanako. Sa dihang mibalik ko sa North Carolina, nawala na kanako ang negatibong pwersa nga anaa nako kaniadto. Naanad ra ko nga mobiya sa mga misyonaro kon mangabut sila, apan human niini nga kasinatian, misugod na ko sa pakig-inter-aksyon kanila ug lutoan sila og panihapon. Apan dili gihapon ko andam nga mokuyog ni Kevin sa simbahan.
Nagsugod ko sa pagpangita og laing simbahan nga mahimong mainteresado ang akong mga anak, apan bisan og unsa ka maayo sa simbahan, ang akong anak nga babaye, si Aryanna, moingon, “Gusto kong mosimba uban ni Papa!” Sa katapusan miuyon mi nga moadto og usa ka Dominggo sa simbahan ni Kevin, ug sa sunod Dominggo mangita og laing simbahan.
Wala madugay, usa ka nahigala nako sa ward mi-text nako ug mihangyo kon gusto ba ko nga mokanta diha sa choir para sa usa ka komperensya sa stake. Nganong gusto man siya mokanta ko? Naghunahuna ko. Akodili miyembro. Sige kong balibad, apan sa katapusan miingon ko, “Sige, buhaton nako kini.”
Dili kadto sama sa pagkanta sa ubang mga simbahan diin adunay usa ka banda, saba kini, ug murag pamati nimo naa ka sa usa ka konsyerto. Mikanta kami sa “Come Thou Fount of Every Blessing.” Ang mga pulong sa himno ug sa matam-is nga tuno sa musika nakatandog gyud kanako.
Kevin:
Pipila ka bulan human niini, naglingkod kami diha sa miting sa pagpuasa ug pagpamatuod, ug si Kendra miingon nako, “siguro kinahanglan ka nga moadto ug ipaambit ang imong pagpamatuod mahitungod sa pag-ampo tungod sa unsay nahimo niini alang kang Papa.”
Ang ama-ama ni Kendra bag-o lang gyud nga giataki sa kasingkasing. Naghangyo kami sa ward sa pag-ampo alang kaniya ug sa among pamilya nianang tungora. Salamat na lang, nakalahutay ra siya.
“Tingali kinahanglan nimong buhaton kini,” miingon ko. Mibarug siya ug mihatag sa iyang pagpamatuod. Nindot kaayo kadto. Human niini, ang mga butang lang nga nagsugod sa pagkabutyag alang kaniya.
Kendra:
Sa sinugdanan sa 2018, permi kong makadungog sa ngalan nga “Presidente Monson.” Niining higayuna, wala ko kahibalo nga mao diay kini ang propeta. Usa ka gabii ang mga misyonaryo mianhi ug nangumusta nako.
“Maayo ra ko,” miingon ko, “apan ang pangalan sa usa ka tawo kanunayng mosantop sa akong ulo, ug wala ako kaila kon si kinsa kini.”
“Unsay ngalan?” Nangutana sila.
“Presidente Monson.”
“Kendra, dili lang na kay basta pangalan,” miingon sila. “Mao kana ang ngalan sa propeta nga bag-o lang namatay. Kinahanglan matan-aw nimo ang pipila sa iyang mga pakigpulong nga iyang nahatag ug tan-awa unsay gusto sa Ginoo nga imong makat-unan gikan kaniya.” Mitan-aw ko og pipila sa iyang mensahe, ug nakapatandog gayud kini ug nakatabang nako. Sukad niadto, ingon og ang ebanghelyo kanunay nga magbalik-balik kanako.
Kon mangaon mi sa gawas sa una, kasagaran mo-order ko og tam-is nga tsaa, apan si Kevin moingon, “Ayaw nang tam-is nga tsaa; pag-order og lain.”
Usa ka adlaw miadto ko sa usa ka fast-food nga restaurant para maniudto ug mi-order og tam-is nga tsaa. Pipila ka minutos ang milabay, usa ka empleyado miingon, “Sa dihang mi-order ka og tam-is nga tsaa, ang makina naguba.”
Miingon siya nga moabut pa og usa ka oras aron maayo ang makina. Aduna lang koy 30 minutos alang sa paniudto. Mi-order na lang ko og softdrink. Nianang higayona mikatawa ko ug miingon, “O sige, nakasabut nako!”
Gusto ko nga magpasakop sa Simbahan, apan dili usab ko gusto nga masuko nako ang akong mama. Ang akong mama adunay dakong bahin sa akong mga desisyon samtang ako nagtubo pa. Siya usa ka ministro, mao nga kanunay ako nga naminaw kaniya imbis moadto sa simbahan ug magkat-on alang sa akong kaugalingon.
Medyo nagpanuko ko sa dihang among gitakda ang petsa sa akong bunyag. Ang mga misyonaryo miabut, ug naghisgut kami mahitungod niini.
Sa katapusan, mihangyo ko sa akong anak nga babaye, si Aryanna, “Gusto ka nga magpabunyag?”
Miingon siya, “Ma, andam na ko kon andam na sab ka.”
Siya miingon kanako nga dihang miadto siya sa simbahan, ang tanang batang mga babaye nanagan ug misugat kaniya. Sila midala kaniya ngadto sa klase sa Primary ug kanunayng mahigalaon. Sila gusto nga mahimo siya nga kabahin sa mga butang. Nahimo siya nga maayo kaayo nga higala sa usa sa mga batang babaye. Mao kana ang nakalingaw kaniya.
Atol sa bunyag ni Aryanna, nakahilak siya sa kalipay. Sa dihang nakita nako siya, naghunahuna ko, anaa ko sa hustong dapit.
Kevin:
Nasayud ko nga ang Langitnong Amahan midala sa ebanghelyo sa among pamilya tungod kay Siya nahigugma ug nagpakabana kaayo kanamo.
Sa dihang sila si Kevin ug Kendra naminyo, si Aryanna (sa wala) duha pa ka tuig ang panuigon. “Sukad pa sa una, nasayud ko nga siya espesyal kaayo sa espirituhanong paagi,” miingon si Kevin. Nadani siya sa Basahon ni Mormon ug mibati sa Espiritu sa una niyang pagtambong sa simbahan. Nalingaw si Aryanna sa iyang pakig-uban sa batan-ong mga babaye sa iyang ward.
Si Kevin ug iyang anak, si Kevin jr., nag-uban sa pagtan-aw sa usa ka leksyon sa Dali, Sunod Kanako. Ang panag-uban nga pagtuon sa ebanghelyo nahimong panalangin alang sa pamilyang Henderson.