Ang Pagkaayo sa Akong Igsoong Lalaki ug ang Gugma sa Langitnong Amahan
Human sa aksidente sa akong igsoong lalaki, nakaamgo ko nga ako adunay Amahan kinsa nahigugma kanako.
Paghulagway pinaagi ni Dilleen Marsh
Ang akong igsoong lalaki, si Yerko, 19 anyos sa dihang nabanggaan siya sa usa ka hubog nga drayber. Maayo gani, ang higala ni Yerko nakatuon og kurso sa first aid duha ka semanang milabay. Iyang naatiman ang akong igsoon hangtud ang mga kawani sa emerhensya nakadala niya sa ospital.
Kadaghanan sa lokal nga mga ospital adunay usa lang ka neurologist nga nagtambong, apan dihang si Yerko miabut, usa ka pundok sa mga neurologist dunay panagtigum alang sa usa ka espesyal nga komperensya. Dayon silang tanan dihadiha dayon miatiman kaniya.
Si Yerko migahin og unom ka bulan sa ospital, tulo ka bulan nga na koma. Samtang didto siya, ang akong inahan nagpabilin uban kaniya gikan sa alas 7:00 sa buntag hangtud sa 7:00 sa gabii kada adlaw. Ang mga miyembro sa Ward ug stake nag-ampo ug nagpuasa alang ni Yerko ug mihatag kaniya og panalangin sa priesthood. Ang among mga pag-ampo natubag pagka Enero 1, 2011, sa dihang nakamata siya. Ang mga miyembro mipadayon sa pagbisita ni Yerko ug mitabang kanamo nga moamuma kaniya samtang nagpaayo siya sulod sa ospital. Sama sila sa tigpangalagad nga mga anghel atol niining malisud nga panahon.
Karon, si Yerko aduna gihapon pipila ka problema nga pisikal, lakip sa panagsang pagkawala sa panumduman. Apan siya makalakaw, ug makapadayon siya og normal nga panag-istorya. Dili makatuo ang mga doktor niini.
Young Women pa ko sa dihang si Yerko nahiagom sa iyang aksidente. Kada semana gisag-ulo nako ang, “Kita mga anak sa atong Langitnong Amahan, kinsa nahigugma kanato,” apan wala gayud nako masabti ang kahulugan sa mga pulong. Human sa aksidente, ako nakaamgo nga ako gayud adunay usa ka Amahan kinsa nahigugma kanako.
Ang templo usa ka pagpakita niana nga gugma. Si Yerko ug ako nasilyo ngadto sa among mga ginikanan, mao nga ako nasayud nga kon nawad-an ko sa akong igsoon nga lalaki, ako makauban kaniya pag-usab. Kini usa ka talagsaon nga kahupayan alang sa akong pamilya ug kanako.
Diha-diha dayon human sa aksidente, dihang ang doktor misulti kanamo nga si Yerko pila na lang ka oras nga mabuhi, tinuoray akong nag-ampo sa Langitnong Amahan sa pagluwas kaniya. Sa dihang si Yerko naluwas, gusto ko nga moserbisyo og misyon aron ipaambit sa uban ang mga milagro nga among nasinati.
Ang istorya sa pagkaayo ang akong igsoon nga lalaki usa ka panalangin alang sa daghang mga tawo nga akong gitudloan isip misyonaryo didto sa Peru. Samtang mopaambit ko sa among mga kasinatian, ilabi na sa mga tawo nga nag-atubang og mga lisud nga sitwasyon, ang ilang mga kasingkasing natandog.
Kasagaran maghunahuna kita kon ngano nga ang lisud nga mga butang mahitabo, apan kon mosalig kita sa gugma sa atong Langitnong Amahan, masayud kita nga sa katapusan, tanan maghiusa sa paglihok alang sa atong kaayohan (tan-awa diha sa Mga Taga-Roma 8:28).