Mga Young Adult

Makasusumpong Ka ng Kalayaan

Ikaw ba o ang isang taong mahal mo ay paulit-ulit na nagkakasala, nagsisisi, nangangakong muli, at nagkakasalang muli? Habang naglilingkod ako bilang isang young single adult ward bishop, marami akong natulungang kahanga-hangang young adult na nakaranas ng ganito. Ngunit marami ring nakahanap ng kalayaan sa pamamagitan ng Pagbabayad-sala ni Jesucristo. Ang mga mensahe tungkol sa adiksyon sa bahagi sa buwang ito ay nagbibigay ng nakatutulong na kabatiran sa paghahanap ng kalayaan—para sa iyong sarili at sa iba.

Ang pinakamahalagang bagay na dapat nating tandaan ay na lahat tayo ay minamahal na anak ng Ama sa Langit. Itinuro ni Elder Dieter F. Uchtdorf, “Hindi … hinihintay [ng Diyos] na madaig muna ninyo ang inyong kahinaan at masasamang gawi bago Niya kayo mahalin. Mahal Niya kayo ngayon nang may buong pag-unawa sa inyong mga paghihirap. … Alam Niya ang inyong pagsisisi sa mga panahong nagkulang o nagkamali kayo. At mahal pa rin Niya kayo” (“Masayang Ipinamumuhay ang Ebanghelyo,” Liahona, Nob. 2014, 123; idinagdag ang pagbibigay-diin).

Sa kabilang dako, sisikapin ni Satanas na paniwalain kang hindi ka mapapatawad o makatatanggap ng pagmamahal ng Ama sa Langit at ng kapangyarihan ng Tagapagligtas na babago at lilinis sa iyo. Sisikapin ni Satanas na punuin ka ng kahihiyan at pagkasuklam sa sarili, ngunit huwag kang maniwala sa kanyang mga kasinungalingan.

Sa halip, bumaling sa Ama sa Langit. Huwag matakot na magtapat sa iyong bishop o branch president at sa ibang tao na nagmamahal sa iyo. Habang binabasa mo ang mga kuwento ng pag-asa mula sa iba pang young adult na naapektuhan ng adiksyon, kumilos ayon sa mga impresyong natanggap mo. Pagpasensyahan ang iyong sarili, alalahanin ang iyong likas na kabanalan, magtuon sa nangyayari sa kasalukuyan, at maniwala sa nagpapagaling na kapangyarihan ni Jesucristo. Siya at ang napakarami pang ibang mga sanggunian ay tutulong sa atin na magtagumpay sa paghahanap ng kalayaang hangad natin. Huwag sumuko kailanman.

Ang iyong kaibigan,

Richard Ostler

Mga kabatiran …

Mula sa mga young adult

tungkol sa pagdaig sa adiksyon

“Magkaroon ng katambal sa pananagutan. Magsabi sa isang taong pinagkakatiwalaan mo o alam mong makatutulong sa iyo tungkol sa pinagdaraanan mo at pagkatapos ay magplano kasama siya para madaig ito. Talakayin sa kanya ang iyong progreso paminsan-minsan.”

—Kaitlin Chan, Alabama, USA

“Malaking tulong ang pagpunta sa mga miting ng Addiction Recovery Program ng Simbahan! Maaari tayong magkaroon ng lakas ng loob na magbahagi tungkol sa ating mga karanasan.”

—Emma Mecham, Idaho, USA

“Komunikasyon, pananagutan, at pangangalaga sa sarili.”

—Tristen Foster, Utah, USA

“Normal lang na mahirapan kung minsan. Walang perpekto sa atin. Mas malaki ang nagagawa ng tapat na pakikipag-usap at pagpapakita ng pagmamahal kaysa sa inaakala mo.”

—Mackenzie Molewyk, Western Australia, Australia

Mula sa mga pinuno ng Simbahan

“Palaging tandaan na sa tulong ng Tagapagligtas, maaari kayong makalaya sa adiksyon. Maaaring matagal at mahirap ang landas, ngunit hindi kayo pababayaan ng Panginoon. Mahal Niya kayo. Pinagdaanan ni Jesucristo ang Pagbabayad-sala upang tulungan kayong magbago, para makalaya kayo sa pagkabihag sa kasalanan.

“Ang pinakamahalaga ay patuloy na magsikap—kung minsan kailangan ng ilang beses bago magtagumpay ang mga tao. Kaya’t huwag kayong susuko. Huwag mawalan ng pananalig. Manatiling malapit sa Panginoon, at bibigyan Niya kayo ng kapangyarihang makaligtas. Palalayain Niya kayo.”

Elder Dieter F. Uchtdorf ng Korum ng Labindalawang Apostol, “Kabahagi Ba Kayo sa Gawain ng Panunumbalik?” Liahona, Mayo 2014, 61.

May karanasan ka bang maibabahagi tungkol sa isang bagay na natutuhan mo mula sa pangkalahatang kumperensya sa buwang ito? Ipadala sa amin ang iyong tugon sa liahona.ChurchofJesusChrist.org bago sumapit ang Oktubre 31, 2020.

Ibahagi ang Iyong Kuwento

May magandang kuwento ka bang maibabahagi? O may mga artikulo ka bang nais makita tungkol sa ilang paksa? Kung gayon, nais naming makarinig mula sa iyo! Maaari mong ipadala ang iyong mga artikulo o feedback sa liahona.ChurchofJesusChrist.org.

Hanapin ang mga artikulong ito at ang iba pa:

• Sa liahona.ChurchofJesusChrist.org

• Sa Lingguhang YA (sa ilalim ng bahaging Mga Young Adult sa Gospel Library)