Wan Visen I Lidim Mi i go long Trutok
?Mi bin jes pikjarem wan statiu nomo long maen blong mi?
Sam yia i pas, mi gat miting wetem ol misinari mo mi stap hadwok wetem helt blong mi. Mi no stap glad, mo wanem we mi bin wantem tumas nomo, i blong gat wan kaen gaed long laef blong mi.
Mi no bin trastem miwan o filim glad tumas abaot eni samting, speseli abaot jos ia we ol misinari oli stap wokem tokbaot. Nomata long hemia, mi disaed wetem wan hat we i nogud blong go long sakramen blong fas taem.
Mama blong mi i bin kam wetem mi, mo taem mitufala i kasem jos bilding, hat blong mi i jiam taem mi luk gol statiu we i saen antap long ruf. !I bin wan long ol naesfala samting we mi bin luk long laef blong mi! Bilding ia i fulap long pis mo mi filim welkam mekem se tingting blong mi i jenis, mo mi rili wantem go insaed.
Long taem blong sakramen, mi sarem ol ae blong mi, mo wan pikja blong Jisas i kamaot long maen blong mi. Taem mi stap groap, mi bin save abaot Jisas, be mi no intres tumas long Hem kasem naoia. Mi neva ridim Baebol yet. Mo blong stap ones, mi no bin save eni samting abaot from wanem Jisas Kraes i bin ded long wan kros o from wanem Hem i bin gat twelef Aposol o from wanem fulap profet oli bin tij abaot Hem.
Be long tetaem ia, mi filim se mi konek i go long Hem. Afta wan longfala taem, Hem i kam ril long mi. Mi filim wan filing blong lav we i kavremap mi mo wan filing long hat blong lanem moa. Mi biliv se Hem i stamba blong trutok mo lav we mi stap lukaotem.
Sam dei afta, mi askem mama blong mi abaot statiu ia we mi bin luk. I luk olsem hem i konfius smol mo afta hem i talem se hem i no bin luk wan statiu, be hem i wantem blong draev i go long bilding ia bakegen blong luk, afta we mi bin tokbaot se statiu ia i naes tumas.
Be taem mitufala i kasem bilding blong jos, statiu we mi bin luk sam dei i pas, i nomo gat. !Mi no save bilivim! ?Wan man i bin karemaot?
Long nekis wik long jos, mi askem wan man abaot statiu ia. Hem i bin konfius mo talem se bilding ia i neva gat wan statiu long hem. Be afta we mi bin tokbaot se statiu i luk olsem wanem, hem i talem: “!O! ?Yu stap minim statiu blong Moronae? Oli no stap long ol jos bilding, be statiu blong hem ia kolosap i stap long evri tempol.” Hem i talem long mi se Moronae i bin wan profet insaed long Buk blong Momon mo hem i bin pat long Restoresen tu.
Mi disaed se ating mi bin luk statiu ia long tingting blong mi nomo. Be mi bin lukaotem ol ples we i tokbaot Moronae insaed long Buk blong Momon. Mi bin lanem se hem i lusum ol famli mo fren blong hem, mo we hem i bin harem nogud from ol sin blong wol, mo nomata long evri samting ia, hem i gohed blong folem oda blong God blong protektem trutok. Mi lanem tu se hem i bin kamaot long Josef Smit fulap taem blong givim ol mesej we i kam long Papa long Heven. Blong stap lanem abaot Moronae mo ol tijing blong hem mo olsem wanem hem i bin mekem ol had samting blong folem Kraes mo protektem trutok, i bin helpem mi blong jenisim hat blong mi fulwan i go long gospel.
Long en taem mi bin gat janis blong visitim Saporo Japan Tempol, mi bin luk stret statiu blong Moronae blong fas taem. Hem i bin semmak statiu we mi luk antap long jos bilding blong mifala. Be hemia we mi bin luk long dei ia i bin saen bitim wanem wol ia i save mekem. Mi biliv se “saensaen statiu” ia i wan visen we i kam long Papa long Heven, we i stap invaetem mi blong faenem lav blong Hem mo trutok blong gospel ia blong Jisas Kraes we i bin kambak long wol. Blong lanem abaot ol profet blong bifo olsem Moronae we i bin testifae abaot Kraes mo ol profet we oli stap laef we oli stap mekem semmak samting. Blong faenem daereksen ia we mi bin stap lukaotem tumas.
Mi save se Lod i bin putumbak gospel ia blong Jisas Kraes tru long Profet Josef Smit mo we yumi gat ol profet we oli stap laef tedei we Papa long Heven i gaedem olgeta blong karem trutok i kam long yumi mo helpem yumi blong gobak long Hem. Mi save se Jisas Kraes i stamba ples blong pis mo glad long laef ia mo long nekis laef tu.
Laet blong gospel blong Hem we i kambak long wol mo evri blesing we i karem i kam, i bin jenisim laef blong mi fulwan, mo semmak olsem fas dei we mi go long jos, mi save Papa long Heven bae i gaedem laef blong mi taem mi stap folem Hem mo ol mesenja blong Hem.