Stap Traehad olsem wan Misinari long taem blong KOVID-19
Blong yu lukluk nomo long wan samting, i mekem evri samting i defren.
Sapos wan man i bin askem long mi sam manis i pas abaot olsem wanem mi bin pikjarem misin blong mi long maen blong mi, bae mi neva save luksave rod we i stap wet long mi. Be wan samting i semmak: Mi mi stil wan misinari blong Jos Ia blong Jisas Kraes blong Ol Lata-dei Sent—be naoia, mi mi wan misinari tu long taem blong wan wol sik.
?Be, hemia i minim wanem?
Hem i minim blong stap wantem blong mekem tingting blong Lod long wan wei we i moa dip. Hem i minim blong stap traem blong givim seves long Lod mo ol pikinini blong hem mo long semmak taem, stap fesem ol samting we oli stap wokem jenis. Hem i minim blong stap wantem blong lanem kwik olsem wanem blong jenis folem ol niu situesen we i stap. Hem i minim blong save mekem ol samting long ol defren wei, akseptem ol tingting mo jenis, stap wet longtaem, mo gat lav evri dei.
Hem i minim tu, blong stap fesem fulap samting we yumi no sua long hem mo stap askem ol kwestin olsem:
“?Bae oli sendem bak kompanion blong mi i go hom tumoro?”
“?Bae oli muvum mifala i go long wan defren eria from vaeres ia?”
“?Wanem bae i hapen long ol pipol we mifala i stap tijim sapos mi mas go?”
Yumi bin stap gohed long ol gospel tijing blong yumi tru long sosol media, be i no oltaem isi—mo hem i no misin eksperiens ia nating we eni long yumi i bin stap pikjarem long maen. Nomata long hemia, yumi stap yet long ples ia, stanap strong long desisen blong yumi ia blong givim seves long weaples, blong givim seves long Lod nomata long situesen o wei blong mekem samting, blong helpem hat blong ol pikinini blong Hem.
?From wanem mi stil jusum blong givim seves?
Yes, misinari laef i gat ol hadtaem long saed blong bodi, tingting, mo spirit—yumi evriwan i bin gotru wan long olgeta finis. Yes, yumi bin fesem fulap hadtaem mo bae yumi gohed blong fesem sam moa jalenj, be tangkyu long Jisas Kraes, we i bin givim laef blong Hem from yumi mekem se yumi save evri hadtaem ia i gud inaf.
Mi luksave se Papa long Heven i save long yumi evriwan. Hem i bin save se bae i gat ol misinari we bae oli no save gotru long tempol o putum leg insaed long wan misinari trening senta bifo we bae oli go long misin blong olgeta. Hem i bin save bae i gat ol yang pipol we bae oli neva gat janis ia blong givim seves long ol ples we oli bin singaotem olgeta blong go long hem. Be yet, ol misinari ia oli save se Lod i lavem mo protektem yumi, olsem we bae Hem i mekem oltaem. Mo we ol efot blong yumi i inaf long ol ae blong Hem. Yumi evriwan i lanem wanem yumi save givim seves long Lod mo serem gospel blong Hem eni ples mo long eni situesen. Mo hemia i gud inaf.
?Wanem i stap mekem mi gohed blong muv i go fored?
Long ol dei we i had, mi bin luksave se i gat tu wei blong lukluk taem ia:
-
Blong lukluk wetem wan fasin blong tingting long nogud saed oltaem mo no save wet blong ol samting oli gobak long nomol.
-
O lukluk wetem wan niu lukluk, putum ol gol, mekem plan wetem fasin blong lukluk ol samting long gud saed mo blong wanwan wan, mo blong yusum situesen ia olsem wan janis blong mekem ol jenis we yu bin wantem mekem longtaem finis be yu stap wokem pusumbak.
Mi traem blong jusum seken tingting ia. Taem mi tingting long ol situesen blong wol naoia, mi tingting long miwan sapos KOVID-19 i wan janis blong helpem yumi blong stap tangkyu from ol rilesensip blong yumi moa o blong leftemap tingting blong yumi blong openem hat blong yumi moa long Krieta blong yumi mo wantem blong stap lisim long Hem. Mo blong putum gospel i kam faswan moa bitim we yumi stap mekem oltaem.
Hemia i no wan hadtaem blong ol misinari nomo—hem i had blong evriwan. Be olsem Kapten Moronae i bin singaotem ol narawan blong oli joenem stamba wok blong fridom (luk long Alma 46), yumi tu, oli singaotem yumi blong girap mo no fraet. Mo luksave se i tru se Papa blong yumi long Heven i stap wetem yumi oltaem, mo i letem yumi blong givim seves wetem ful hat, ful paoa blong tingting, ful maen mo ful paoa blong yumi nomata wanem (luk long Doktrin mo Ol Kavenan 4:2).
Olsem ol misinari blong Lod, yumi mas putum ol ae blong yumi nomo long Sevya blong yumi mo gol blong yumi we i no save finis. Letem yumi tingbaot se Papa long Heven i lavem evri pikinini blong Hem mo i wantem evriwan long yumi blong gobak long Hem.
Wetem tru fasin, nomata olsem wanem i had blong stap olsem wan misinari long taem ia blong KOVID-19, yumi save mekem taem i kam wan long ol bes taem long laef blong yumi. Long ones fasin, !hem i bin wan taem olsem blong mi! Mo evri samting ia from fokas blong mi, from oltaem mi traem blong tingbaot lav blong mi long Papa long Heven mo tingting blong hat blong mi blong helpem Hem blong karem i kam tugeta Isrel we i stap olbaot. Mo mi save se bae Hem i givim ol sore mo lav blong Hem long wanwan long ol misinari blong Hem, taem yumi stap mekem bes blong yumi blong mekem kol we Hem i givim long yumi, i kam tru.