KOVID-19: Wan Janis blong Lukluk Moa Bakegen long Hat blong Gospel
Truaot long histri, oltaem i gat ol had sisen. Tedei, yumi stap fesem ol series samting we i kam agensem yumi from KOVID-19. Yumi stap harem bakegen mo bakegen: hemia ol taem we yumi no save mo no sua long hem. Fulap long yumi oli wari abaot helt blong yumi mo gudlaef blong olgeta we yumi lavem. Yumi evriwan i bin filim ol risal long saed blong ekonomi mo filing blong ol samting we vaeres ia i mekem. I luk olsem i nogat wan samting i nomol. Mo wok blong misinari mo tempol i nomo go gud. Plante pipol oli filim se ol samting i tumas wetem wok blong stap jenisim ol nomol wei blong mekem samting long hom.
Blong stap fesem wan fiuja we yumi no sua long hem i save mekem ol filing wari mo iven fraet—maet yu bin stap filim hemia. Be long medel blong taem ia we tingting i fasfas, i gat hop i stap! Nomata long fasin blong no sua mo ol jenis ia, ol impoten mo stamba tijing blong gospel oli no jenis:
-
Maet oli bin kanselem o limitim ol miting mo kam tugeta blong Jos, be blong stap laef folem gospel i no stop! Yumi save gohed blong wosip, givhan, mo praktisim gospel long ol hom blong yumi.
-
God i stap yet long ol Heven blong Hem.
-
Boe blong Hem, Jisas Kraes, i gohed blong stanap olsem hed blong wok ia. Hem i andastanem ol hadtaem blong wol ia, mo tu ol hadtaem blong yumiwan. Hem i bin promes: “Taem mi mi aot long yufala, mi no save lego yufala i stap nomo olsem. Bambae mi mi save kambak bakegen long yufala” (Jon 14:18). Hem i sendem Tabu Spirit blong stap wetem yumi.1
-
God i bin singaotem ol profet, ol sia, mo ol reveleta. Mo tru long olgeta, Hem i putum stret samting i stap, we yumi nidim blong save gotru long ol hadtaem ia.2 Tingbaot niufala kurikulom we hom i senta, tugeta wetem ol nara jenis we i bin helpem yumi blong rere from taem ia mo blong laef mo givhan long ol wei we oli moa hae mo tabu.3 Ol jenis ia we i bin hapen i no longtaem i pas, oli no bin hapen tru long janis nomo—wan God we i fulap long lav mo i save evri samting nao, i bin putum ol jenis ia long stret ples.
Nomata long taem blong tingting i fasfas, mo wetem tingting long ol samting ia, yumi save lukluk moa bakegen long hat blong gospel, we i tekem tu, fet long Lod Jisas Kraes.
?Be olsem wanem yumi save eksasaesem fet ia? Stat long stat i kam, Lod i bin letem ol disaepol blong Hem blong gotru ol jalenj we oli nogat evri ansa long hem. Rus blong fet blong yumi i go moa dip taem yumi mas eksasaesem fasin blong jusum mo muv fored long ol taem we yumi no sua long hem. Elda Neil L. Andersen blong Kworom blong Olgeta Twelef Aposol i talem bakegen se, “Yu no save evri samting, be !yu save inaf!”4
Stori blong Nifae mo ol brata blong hem oli stap traem blong kasem ol buk we oli wokem long bras, i wan gudfala eksampol blong hemia. Oli bin save wanem oli nidim blong mekem: !karem ol buk we oli wokem long bras! Oli iven save gud from wanem. Oli jes no bin save olsem wanem blong mekem. Afta we oli no bin save karem ol buk ia tu taem, (luk long 1 Nifae 3:10–27), Nifae i nomo save gohed blong dipen long paoa mo tingting blong hemwan. Hem i no bin givap, be, hem i traem wan moa taem. Luksave olsem wanem ol toktok blong Nifae i aplae long situesen blong yumi tedei:
“Mo Spirit i bin lidim mi, mi no bin save yet wanem ol samting we bae mi mas mekem.
“Be mi bin go fored” (1 Nifae 4:6–7).
Nomata long ol fulap kwestin mak long laef blong yumi, sapos yumi “go fored” olsem Nifae, trastem God mo stap folem ol profet blong Hem mo lukluk moa long fet, bae Hem i gaedem mo stretem yumi. Long wan taem long rod ia, ol kwestin mak blong yumi we oli makem problem, bae oli kam ol mak blong makem glad blong yumi.
Letem yumi mekem fet blong yumi long Jisas Kraes i kam moa bigwan, tras blong yumi long ol wokman blong Hem, mo lav blong yumi long wanwan long yumi taem yumi stap fesem fiuja. Taem ia we ful wol i stap long nid mo hadtaem, i save kam wan tabu ples blong yumi kam moa kolosap long Hem. Taem yumi mekem hemia, swit pis blong Hem bae i fulumap sol blong yumi, iven long medel blong hadtaem, mo bae yumi faenem paoa mo ol ansa we yumi nidim.