Dijitol Nomo
?Yu Yu Stap Laef Folem Gospel Wetem Haf Hat blong Yu Nomo?
Fasin we yumi gat taem yumi stap mekem ol responsabiliti blong yumi long Jos i rili mekem samting i defren.
“?Mi mas mekem hemia?”
?Yu bin gat kaen tingting ia bifo? I bin krosem tingting blong mi plante taem. Mo mi bin lanem se wan smol tingting nating olsem, i stap soem bigwan fasin blong mi. I tru. Yumi evriwan i save go aot mo givhan long ol narawan; yumi save akseptem mo holem ol koling blong Jos, mo yumi save go long ol miting blong Jos. I nomata sapos yu mekem wetem wan hat we i hafhaf, ol samting ia oli save mekem samting i defren insaed long laef blong yumi. ?Be hemia i putum wan limit long paoa blong God blong save yusum yu? ?Hemia i putum wan limit long paoa blong God blong save jenisim yu? Long mi, hemia i putum wan limit.
Tingting ia i mekem mi tingting long Leman mo Lemyul, we tufala i aot long Jerusalem, we tufala i gobak from ol buk, we tufala i help blong bildimap sip, we tufala i mekem sam samting we tufala i stap obei long ol—be olgeta samting ia, tufala i mekem wetem komplen mo wetem hat we i hafhaf. Tufala i no letem ol eksperiens blong tufala blong jenisim tufala i kam gud moa. Be, tufala i stap komplen oltaem, mo tufala i gat roten fasin long evri kaen situesen we tufala i stap long hem. Afta we mi luksave hemia, mi no bin wantem kam wan Leman o Lemyul.
Tekem smol taem blong rili tingting abaot ol risen biaen long ol aksen blong yu. ?Yu yu stap go aot long ol narawan mo lukluk nomo long ol blesing we oli stap blong yu kasem? O, ?Yu yu stap go aot long ol narawan from se yu rili wantem serem laet ia mo lav ia wetem olgeta? ?Yu yu stap mekem evri samting we yu mas mekem insaed long koling blong yu from se hem i wanem we oli wantem luk se bae yu mekem? O, ?yu yu mekem from se yu wantem givim seves long Lod mo olgeta raon long yu?
Hemia i ol kaen kwestin we mi traem blong askem miwan wanwan taem. ?Mi mi stap mekem evri samting we mi save mekem blong laef olsem wan tru disaepol blong Kraes wetem tru tingting blong mi? ?O hat blong mi i no stap fulwan long gospel ia? Mi ting se Bisop Gérald Caussé, Prisaeding Bisop, i bin talem hemia i klia gud: “?yumi stap praktisim gospel ia, o yumi stap bisi nomo long ol wok blong Jos?” (“Hem i Abaot Ol Pipol,” Liahona, Mei 2018, 112).
Blong Stap Praktisim, agensem, Blong Stap Bisi
Long mi, taem we mi “bisi” nomo long Jos, i minim se tingting nating i kam insaed long maen blong mi. Tingting nating ia, i kamaot long wan fasin we i no smat blong mekem ol samting, o taem mi letem ol wok we oli no impoten long taemtebol blong mi blong oli kam blokem olgeta samting ia we oli rili impoten. Tingting nating ia i kam insaed taem mi stap sidaon long sakramen miting mo mi no lisin gud, o taem mi stap talem prea long naet mo maen blong mi i stat blong tingting long ol nara samting, o taem mi gotru kwik long ol skripja blong mi, mo mi no tingting hevi long olgeta, o taem mi go aot mi go luk wan, blong mi save talem nomo se mi go luk wan man, be mi no traehad blong kam fren wetem olgeta.
Samtaem, mi stap filim kros taem mi no luk eni progres long laef blong mi—taem we mi no wantem save long samting mo mi “bisi” nomo long gospel—mo olgeta filing ia oli stastap kasem taem mi luksave wanem nao i problem. Samtaem, mi mas sidaon smol taem, mi joen bakegen, mo mi askem miwan: “Mi mi stap putum ful tingting mo hat blong mi naoia long koling ia, o long nara man ia, o long prea ia, o long skripja ia?”
Taem mi gat kaen revelesen olsem, long ol taem olsem nao mi stap jenisim laef blong mi. Taem mi prea wetem tru tingting blong luk ol narawan long wei we Papa long Heven i stap lukluk olgeta, taem mi stap prea blong gat ol janis blong givhan, taem mi prea blong kasem help long koling blong mi, long wok blong mi, mo long evri dei laef blong mi, mo moa impoten, taem mi tekem aksen folem ol kwaet toktok we Hem i stap givim long mi, mo taem ol aksen blong mi oli soem stret tru hat blong mi blong kam moa gud—hemia, i taem mi stap praktisim gospel. Hemia, i taem mi filim wan tru jenis long fasin blong mi, insaed long hat blong mi, mo insaed long sol blong mi. Hemia, i taem mi luk ol merikel oli stap hapen. Hemia, i taem mi filim tru hapines insaed long ful laef blong mi. Hemia, i taem mi rili traem blong jenis blong kam gud moa.
Ol Aksen, agensem, Ol Filing
Mi ting se yumi evriwan i save lukluk i gobak long samfala taem, insaed long laef blong yumi, taem ol aksen blong yumi oli bin gud tumas, be ol filing blong yumi, oli no bin gud tumas. Samtaem, laef i mekem yumi bisi; samtaem, bae yumi no save hapi fulwan insaed long ol situesen blong yumi; mo samtaem, ol samting oli no wokaot oltaem olsem we yumi wantem. Yumi no stret evriwan, be, sapos yumi askem Papa long Heven blong Hem i helpem yumi blong putum ful hat blong yumi long ol bigfala wok we i tekem taem mo oli longwan, we oli askem yumi blong mekem, bae yumi lanem blong mekem olgeta long wan wei we i moa olsem wei blong Kraes.
Mi save tingting long sam taem we mi agri blong mekem wan seves projek, be hat blong mi i no bin wantem. Nao afta, hat blong mi i kam sofsof, mo i jenis afta long eksperiens ia. O mi tingbaot wan taem we mi kasem wan koling mo mi komplen se i tekem tumas taem blong mi, mo afta mi kraekrae taem oli bin rilisim mi, from se mi bin lan blong lavem wok ia.
Yumi save serem laet, mekem ol responsabiliti blong yumi, mo kasem ol ansa blong ol prea blong yumi long wan wei we i wok gud moa sapos hat blong yumi i stap long stret ples. Sapos yumi tekem taem blong luklukgud long ol fasin mo ol tingting biaen ol aksen blong yumi, mo mekem evri samting “wetem wan tru hat, wetem wan tru tingting blong wantem save, (Moronae 10:4), bambae yumi save luksave gud moa, han blong Papa long Heven, mo faenem moa bigfala glad, mo mekem plante moa samting i defren insaed long laef blong yumi, mo insaed long laef blong ol narawan.