Trifala Lesen abaot Lav, Glad mo Pis
I Kam long Brian K. Ashton
Seken Kaonsela long Sandei Skul Jeneral Presidensi
I kam long wan divosen toktok, “Happiness, Deceit, and Small Things,” we hem i bin givim long Brigham Yang Yunivesiti long 5 Disemba 2017.
Sapos yu folem ol trifala step ia, i save mekem wan samting i defren bigwan insaed long laef blong yu mo i save helpem yu blong filim ol frut blong Spirit.
Taem mi wan studen, mi tingting plante abaot fiuja blong mi. Taem mi stap insaed long fiuja ia—we i minim laef afta long yunivesiti—mi lanem trifala impoten lesen we i mekem plante samting i defren long laef blong mi. Mi wanem serem ol lesen ia wetem yu, wetem hop ia se yu no tekem tumas taem olsem mi, blong lanem olgeta lesen ia. Bae oli save helpem yu blong faenem bigfala moa glad long laef—mo long en, yu save kam olsem wan god wetem Papa blong yumi long Heven.
1. Lukaotem Hapines, Pis, mo Tabu Spirit
Mi mitim waef blong mi, Melinda long taem we mi skul long yunivesiti, mo samples sikis manis afta we mi kambak long misin. Mi save wantaem se mi wantem maredem Melinda. Be, Melinda i no gat sem eksperiens ia. Hem i tekem faef yia blong hem i kasem wan ansa se i oraet blong maredem mi.
Long ol faef yia ia, mi bin gat wan tes long laef we i moa had long evriwan. Mi bin save huia mi mas maredem, mo Spirit i pusum mi, be mi no save kasem gol ia nomo.
I no longtaem afta we mi graduet, Melinda i disaed se bae hem i go long misin—mo mi save stret se hemia i blong hem i ronwe long mi. I bin gat ol taem we, taem hem i bin stap long misin, we mi harem nogud tumas from mi lukluk tumas long wanem we mi no gat. Be, mi bin stap stadi long ol skripja mo stap prea evri dei, mo stap givim seves insaed long Jos, mo stap traehad blong mekem olgeta samting we i stap tekem Tabu Spirit insaed long laef blong mi.
Wan eli, kolkol Sandei moning, long Miniapolis, Minesota, YSA, taem mi stap draev i go long wan miting blong Jos, mi tingting se: “Mi mi sapos blong harem nogud ia naoia. I no gat wan samting we i go olsem we mi mi wantem “!Be mi no mas harem nogud! !Mi filim we mi hapi tumas!”
Nao, ?olsem wanem nao bae mi hapi sapos mi stap gotru wan samting, we long mi, i wan tes we i had tumas?
Ansa i stap long Galesia 5: 22–23: “Be Tabu Spirit, hem i stap mekem ol man oli gat narafala fasin. Hem i stap mekem we oltaem olgeta oli stap lavem ol man, mo oli stap glad, mo oli gat pis long tingting blong olgeta. Hem i stap mekem we tingting blong olgeta i longfala, mo oli gat sore long man, mo we fasin blong olgeta i gud nomo, mo i stret oltaem we i no save jenis. Hem i stap mekem we olgeta oli kwaet man, mo oli save blokem ol samting we olgeta nomo oli wantem.”
From se mi bin stap mekem olgeta samting ia we i stap tekem Spirit i kam insaed long laef blong mi, mi bin filim lav blong God. Mi bin filim glad mo pis. Mi save safa longtaem mo save stap hapi tu.
Blong gat lav, glad mo pis insaed long laef blong yumi, insaed long famli blong yumi, mo insaed long mared blong yumi, i no kam from se yumi gat wan bigfala haos, ol naes trak, ol gudfala sas klos, gat gudfala sakses long wok, o eni nara samting blong wol ia we yumi save talem se i tekem hapines i kam. Wanem i tru, i we, from se ol filing blong lav, glad mo pis oli stap kam long Spirit, blong filim olgeta samting ia, i no nid blong yumi joenem i go wetem ol situesen blong yumi long laef ia.
Plis andastanem se mi mi no stap talem se bae yumi hapi oltaem, o se situesen blong yumi long laef ia bae i no mekem jenis long hapines blong yumi. Wanem i tru, i we, sapos yumi no testem samting we i konkon, yumi no save wanem we i swit (luk long Doktrin mo Ol Kavenan 29:39; luk tu long Moses 6:55).
Yumi nidim blong traehad samtaem. Moa long hemia, sam samting long saed blong bodi mo filing i save mekem yumi safa bigwan, mo i mekem se i had tumas blong yumi filim Spirit. Be, sapos yumi stap traehad blong gat Spirit insaed long laef blong yumi mo yumi stap trastem God, yumi save stap hapi.
Mi testifae, aot long eksperiens blong miwan, se hemia i tru. Stat long eksperiens blong mi taem we Melinda i bin stap long misin, mi bin luk se sapos mi stap mekem olgeta samting we i tekem Spirit i kam insaed long laef blong mi, wetem hemia blong jusum blong biliv mo akseptem se ol samting bae oli wokaot olsem we God i wantem, plante taem, mi mi stap hapi (luk long Jekob 3:2).1
2. Yu No Foldaon long Ol Giaman Samting
Setan i stap yusum ol giaman rod, o i stap mekem giaman kopi blong evri samting we God i stap mekem, blong traem mekem yumi konfius mo i trikim yumi. Nomata se Setan i stap traem blong winim tingting blong yumi, Sevya, Hem i stap tijim yumi se “wan rabis tri i no save karem ol gudfala frut” (3 Nifae 14:18). From se Setan i wan rabis tri, hem i no save mekem yumi filim lav, stap glad, pis, gat tingting we i longwan, stap gud long ol man, fet, gat tingting we i stap daon, mo save gat kontrol long yumiwan (Galesia 5:22–23). Be, Setan i wantem luk se yumi harem nogud tumas (luk long 2 Nifae 2:27).
?So Setan i stap mekem wanem? Hem i traem blong giaman long yumi.
Wan fren blong mi, wan we God i jusum, Setan i giaman long hem. Fren blong mi i go long wan misin mo i wan gudfala misinari. Taem hem i kambak hom afta long misin blong hem, hem i gat tingting blong mekem evri smol samting we i bin tekem Spirit i kam insaed long laef blong hem, mo i bin mekem hem i kam strong long misin blong hem. Mo hem i mekem blong sot taem.
Be afta, hem i luk ol fren, plante long olgeta oli ol riten misinari, we oli kam long jos evri Sandei, be aotsaed long jos, oli laef folem fasin blong wol. Oli luk hapi nomo. Oli stap mekem ol samting we oli gat “gud taem” long hem. Mo i luk se laef stael blong olgeta i gud, oli no wok tumas olsem hem.
Sloslo, hem i stop blong mekem olgeta smol samting we i bin tekem paoa blong Spirit long misin blong hem. Hem i gat wan testemoni i stap yet, be hem i talem long mi se hem i mekem tingting blong hem se, “sapos mi gohed blong kam long ol miting blong Jos, bae mi oraet—mi stap long stret rod.” Hem i talem se: “Be, long saed blong spirit, mi mi no aktiv.”2 Taem hem i bin stap laef folem fasin blong wol ia, hem i mekem wan nogud joes, i go long wan nara nogud joes, mo i no longtaem afta, hem i gat bel.
Ol joes blong hem we oli no stret mo oli no gud, oli kasem hem. Hem i no hapi i stap, mo hem i save. Laki tumas, fren blong mi i luksave se Setan i trikim hem, mo hem i bin sakem sin.
Stori blong hem i soemaot gud se, iven olgeta we oli moa gud long medel blong yumi, Setan i save trikim olgeta. Antap long hemia, stori blong hem i poenemaot se yumi mas oltaem stap lukaotgud, nogud oli giaman long yumi. Yumi mekem hemia i hapen taem yumi stap mekem ol smol samting we i save tekem Spirit i kam insaed long laef blong yumi.
Mi glad blong talem se, tedei, fren blong mi i hapi, i stap traehad blong obei olgeta komanmen, mo hem i aktiv long bodi mo long spirit insaed long gospel.
Ol giaman trik blong Setan oli kam long ol defren wei. Bae mi tokbaot sam nomo.
Setan i stap traem blong winim tingting blong yumi blong putum faswan ol samting blong laef ia i kam faswan long ol samting long saed blong spirit. Yumi save talem se ol fas samting blong yumi oli go rong taem yumi luksave hamas taem yumi stap talem, “Mi bisi tumas mo mi taed tumas naoia blong _____________.” Putum sot sentens ia long waet spes ia, go long tempol, go givhan, stadi mo tingting hevi long ol skripja, mekem koling blong mi, o iven, talem prea blong mi.
Wan risen we yumi filim bisi tumas, i we Setan i stap wokhad blong pulumaot tingting blong yumi. Hem i stap yusum smatfon long han blong yu, redio insaed long trak, o televisen insaed long hom, mo plante kaen samting we i mekem se i pulum tingting blong yumi evri taem. Long en, yumi filim se yumi bisi i bitim wanem i rili stap hapen.
Wan nara risal blong kaen fasin ia, i we, yumi nomo stap tingting hevi long ol samting. Setan i wok blong pulumaot tingting blong yumi, from se hem i save se fasin blong stap tingting hevi, speseli long ol skripja, i lidim yumi blong jenis bigwan, mo i lidim yumi blong kasem revelesen.
Wan nara giaman rod blong Setan i kam tru long aedia ia se ol aksen we pablik i luk, i moa impoten bitim wanem we i pusum yumi blong tekem aksen. Taem yumi no gat bigfala tingting blong mekem ol samting long saed blong spirit, yumi mestem janis blong eksperiensem glad ia blong gospel. Olsem risal, fasin blong obei long olgeta komanmen i kam wetem filing blong komplen, mo Setan i save se sapos hem i save mekem yumi filim olsem, bambae yumi stop nomo blong mekem wanem we yumi save se yumi sapos blong mekem.
Setan i stap giaman tu long yumi mo mekem yumi biliv se glad mo hapines i kam taem yumi gat wan isi laef, o taem yumi stap pleiplei nomo oltaem. Hemia i no olsem. Wanem i tru i we i no gat glad o hapines sapos yumi no winim wan samting we i kam blokem rod (luk long 2 Nifae 2:11, 23).
Laswan long ol trik blong Setan we bae mi tokbaot i we hem i stap traem blong winim tingting blong yumi se fasin nogud, we i gat gud samting long hem blong sot taem, hemia nao i ril hapines. Setan i save se, long sot taem, sam kaen filing oli save (1) mekem yumi ting se yumi stap filim ol frut blong Spirit, (2) haedem ol filing blong yumi blong wantem ol frut ia, o (3) mekem yumi filim se oli ol gud samting we i save tekem ples blong ol frut blong Spirit ia.
Eksampol. Setan i save temtem yumi blong lukaotem fasin blong gat rabis tingting long man long saed blong seks, be i no blong filim lav. Hem i save giaman pulum yumi blong filim glad we i tumas blong sot taem, be i no glad we i stastap oltaem. Hem i traem blong pulumaot tingting blong yumi, be i no givim pis long yumi. Bae i mekem yumi filim se yumi ia nao yumi stret mo gud evriwan, yumi smat mo yumi mekem samting i raet blong ol man, be i no mekem yumi no stap selfis, stap obei oltaem, mo gat wan stret tingting long saed blong spirit. Ol temtesen blong hem i save mekem yumi konfius, mo i save lidim yumi blong tingting se blong brekem ol komanmen bae i tekem hapines i kam.
3. Mekem Ol Smol Samting
Plante taem, ol smol samting nao oli tekem Spirit i kam insaed long laef blong yumi, i holemtaet yumi blong yumi no foldaon long trik, mo long en, i helpem yumi kasem paoa ia blong obei ol komanmen, mo kasem laef we i no save finis. Sevya i tijim prinsipol ia long ol elda blong Jos long Ketlan, Ohaeo: “Taswe, yufala i no taed blong mekem gud samting, from we yufala i stap putum fandesen blong wan bigfala wok. Mo aot long ol smol samting, ol samting we oli bigwan oli kamaot” (Doktrin mo Ol Kavenan 64:33
?From wanem ol smol samting oli impoten tumas? Long ves we i kam afta, Sevya i eksplenem se “Lod i askem blong mas gat wan hat mo wan maen we i wantem mekem samting.” (Doktrin mo Ol Kavenan 64:34). ?From wanem Sevya i joenem fasin blong mekem ol smol samting wetem hat mo maen we i wantem mekem samting? From se, taem yumi stap mekem ol smol samting oltaem oltaem, yumi tanem hat mo maen blong yumi long God, we i mekem yumi kam klin mo i mekem yumi tabu (luk long Hileman 3:35).
Taem yumi kam klin evriwan mo kam tabu, yumi jenisim fasin blong yumi, sloslo, blong yumi save kam moa mo moa olsem Sevya. Hemia i mekem tu se yumi save harem moa ol kwaet toktok blong Tabu Spirit, we i mekem se bae yumi no save foldaon isi long trik blong Setan.
Long ol senia yia blong hae skul, papa blong mi i tijim seminari long mi long haos blong mifala nomo. From se topik blong yia ia i bin Buk blong Momon, papa blong mi i disaed se bae mitufala i rid tugeta, ves afta ves, mo toktok raon long wanem we mitufala i bin lanem. Taem mitufala i stap rid i go, papa blong mi bae i askem ol kwestin we i mekem mi tingting long wanem mitufala i stap ridim, mo bae hem i eksplenem ol samting we mi no andastanem. Mi stil tingbaot se mi stap lan abaot Sevya mo mi filim se i tru se Hem i bin visitim Ol Man blong Nifae, mo i tru se Hem i save fogivim mi long ol sin blong mi from Atonmen blong Hem.
Mi save folemap fandesen blong mi long ol skripja, i go long ol taem ia we papa blong mi mo mi i bin gat tugeta. Mi bin filim wan samting taem mitufala i stap rid. Mo maet wan samting we i moa impoten, ol samting we mi wantem, ol samting we oli pusum tingting blong mi, mo ol aksen blong mi, evri samting ia, oli bin jenis. Mi bin wantem blong kam gud moa. Mi stat blong luk nao weaples Setan i trikim mi long hem. Mi sakem sin fulap taem moa. Taem mi finisim fas yia blong yunivesiti blong mi, mi bin stap ridim ol skripja evri dei.
Samples raon long taem ia, Presiden Ezra Taft Benson (1899–1994) i bin askem ol memba blong Jos blong ridim Buk blong Momon evri dei, mo blong praktisim wanem we oli bin lanem.3 Mo antap long eni samting moa we mi bin stap ridim, mi ridim wan samting insaed long Buk blong Momon.
Long misin blong mi, mi bin lanem olsem wanem blong rili stadi mo lafet long ol skripja. Mi no bin filim Tabu Spirit nomo taem mi bin stap rid, be tu, mi bin stat blong filim glad taem mi bin stap luklukgud insaed long ol skripja blong faenem ol ansa long ol problem blong mi mo ol problem blong ol investigeta blong mi.
Afta long misin blong mi, mi bin gohed blong lafet long ol skripja evri dei. From se mi stap praktisim hemia, mi bin stap invaetem Tabu Spirit insaed long laef blong mi; Hem i soem rod long mi blong mi yusum gud moa taem blong mi. From hemia, mi mi bin mekem gud moa long skul, mo afta, long wok. I bin kam isi moa blong mekem ol desisen. Mi bin prea moa mo mi bin wok strong long ol koling blong mi. Blong lafet long ol skripja blong mi evri dei i no stretem evri problem blong mi, be laef i bin isi moa.
Long Ogis 2005, Presiden Gordon B. Hinckley (1910–2008) i bin givim wan jalenj blong ridim mo ridim bakegen Buk blong Momon bifo long en blong yia.4 From se mi bin stap ridim Buk blong Momon evri dei finis, mi bin stap finis long Ita o Moronae. From hemia, taem mi bin finis wan o tu wik afta, mi tekem se mi bin komplitim jalenj blong Presiden Hinckley nao.
Be afta, wan fetful hom tija i kam visitim famli blong mifala. Hem i askem sapos mi stap mekem wanem Presiden Hinckley i bin askem long invitesen blong hem.
Mi talem long hem se mi bin laki blong statem Buk blong Momon bifo Presiden Hinckley i bin askem. Nao, wetem gud fasin, mi anaonsem se mi bin komplitim wok ia.
Laki tumas, hom tija blong mi i luk samting ia long defren wei. Long fasin we i kaen, hem i stretem mi, mo Spirit i bin talem slo long mi se hom tija blong mi i raet.
Naoia mi mas ridim tufala japta long wan dei blong save finisim buk ia bakegen bifo en blong yia. Taem mi bin stap rid moa long Buk blong Momon, mi bin luk se moa paoa tu i kam insaed long laef blong mi. Mi gat moa glad. Mi luk ol samting i klia moa. Mi stap sakem sin fulap taem moa. Mi bin wantem blong givhan long ol narawan mo help blong sevem ol narawan. Mi no stap harem tumas ol giaman trik mo ol temtesen blong Setan. Mi bin lavem Sevya moa.
Long manis Novemba long yia ia, oli bin singaotem mi mi kam bisop long wod blong mifala. Taem mi bin finisim jalenj blong Presiden Hinckley, mi bin rere from koling ia. Stat long tetaem ia, mi bin luk se moa mi kam bisi long wok o long jos, moa mi nidim blong stadi long ol skripja, speseli Buk blong Momon.
Yu tu, yu save gat ol semfala blesing mo paoa ia insaed long laef blong yu, sapos yu tu, yu glad blong lafet long ol skripja evri dei. Mi promesem yufala se sapos yufala i lafet long ol skripja evri dei, speseli Buk blong Momon, bambae yu stap invaetem Spirit i kam insaed long laef blong yu, mo bae yu kam blong prea evri dei, bae yu sakem sin plante taem moa, mo bae yu faenem i isi blong go long jos mo tekem mo kakae sakramen evri wik.
Mi testifae se taem yu mekem ol smol samting mo trastem Lod, bambae yu save faenem lav, glad, pis mo hapines, i nomata wanem situesen blong yu. Mi testifae tu se, hemia i posibol, from sakrifaes blong Jisas Kraes. Evri gud samting oli kam from Hem (luk long Moronae 7:22, 24).