Luk Papa i Stap Singsing

Maria Oka

Kalifonia, YSA

Droing i kam long Allen Garns

Mi bin stap long misin blong mi long Honolulu, Hawae, YSA, blong fo mo haf manis nomo, nao mi kasem sik we bodi blong mi i seksek bigwan, mo afta, oli faenem se mi gat sik blong faol. Ol manis afta, mi go long ol visit long hospital, mekem plante tes, mo tekem niu meresin we i mekem plante nogud samting long mi.

Bifo long hemia, mi lukluk plante nomo long misinari wok, mo mi no homsik tumas, be afta we mi sik, hat blong mi i harem nogud. Mi misim papa mo mama blong mi, mi filim se mi stap miwan i nomata plante gud pipol we oli kea oli raonem mi. Mi no wantem go hom, be mi bin wantem filim pis.

Wetem raet blong misin presiden blong mi, mi toktok long papa mo mama blong mi long telefon long saed blong meresin blong mi. Papa blong mi, we i jes mekem wan longtaem drim blong hem blong joenem Tabenakol Kwaea long Tempol Skwea, i talem gud long mi se bae hem i stap singsing long mi, insaed long hat blong hem, long jeneral konfrens, we i stat long nekis dei.

Long nekis moning, mi prea strong blong kasem pis we mi bin nidim bigwan. Bifo finis, mi bin kasem ol ansa long ol stret kwestin we mi gat long taem blong jeneral konfrens, mo mi trastem se Spirit i save lidim mi bakegen. Taem konfrens i open, kwaea i singsing, “Dearest Children, God Is Near You” (Hymns, no. 96). I no wan minit yet be mi luk papa blong mi long TV skrin. Kamera i tekem fes blong hem i kolosap blong longtaem smol.

Wota blong ae blong mi i ron mo wan bigfala filing blong pis i kavremap mi. Mi bin save se God i lavem mi. Hem i bin save stret wanem mi bin nidim long dei ia—wan kwaet smol gud saen se Hem i stap kolosap mo i save situesen blong mi. Mi bin filim lav blong God, mo i go kasem lav blong famli blong mi, ol kompanion blong mi, mo misin presiden blong mi. Mi no harem trabol i hevi, be naoia mi luk wan janis blong gro i kam kolosap long Lod.

Ol jalenj blong helt blong mi oli no go lus. Mi mas aot long misin blong mi afta long evri samting ia, be mi bin save se God i bin stap ia, mo we Hem i lavem mi. Kwaet saen ia i stap wetem mi tru long plante nara taem we hat blong mi i harem nogud, mo i bin givim hop long mi long ol taem we oli bin tudak. Ol narawan bae oli talem se i jes hapen nomo. Be mi save se taem mi luk papa blong mi i singsing abaot lav blong God, hemia i bin wan smol merikel long taem we mi bin stap long nid.