Presen we I Moa Bigwan long Ol Narawan we God i Givim

I Kam long Presiden Russell M. Nelson

I kamaot long “Thanks Be to God,” Liahona, May 2012, 77–80.

Wan dei, Sista Nelson mo mi i luk sam kalkala fis long wan akwariom. Ol fis oli gat braet kala mo ol defren sep mo saes, we oli swim go kam. Mi askem wan wokman: “?huia i stap fidim ol naes fis ia?”

Hem i ansa: “Mi ia.”

Afta, mi askem: “?Be ol fis ia oli talem tangkyu long yu?”

Hem i ansa: “!No yet!

Sam pipol oli olsem fis ia. Oli no luksave God mo gud fasin blong Hem long olgeta. Bae i gud tumas sapos yumi luksave moa lav we God i gat long yumi, mo sapos yumi stap talem tangkyu long Hem.

Mi tangkyu from Jisas Kraes

God i sendem Pikinini blong Hem, Jisas Kraes, blong helpem yumi. Hem i mekem hemia from se Hem i lavem yumi tumas.

Jisas i kam blong i pemaot yumi.

From Atonmen blong Hem, bambae yumi save laef bakegen afta we yumi ded.

From Atonmen blong Hem, yumi save gobak laef wetem Papa long Heven blong oltaem.

Jisas i eksplenem:

“Mi nao, mi stamba blong laef bakegen long ded. Mi nao mi stamba blong laef. Man we i bilif long mi, nating we bambae i ded, hem bambae i mas laef. Mo man we i laef, i bilif long mi, hem bambae i no save ded samtaem” Jon 11:25–26)

!Hemia nao gudfala mesej blong Ista!

Jisas Kraes Hem I Sevya blong Mi

Jisas i bin laef bakegen long ded long Ista moning. Ridim ol sentens ia blong faenemaot wanem Hem i bin mekem blong yumi. Kalarem wanwan laet blong san afta we yu ridim wanwan sentens. Afta, kalarem ful pikja.

Jisas i bin safa long Getsemane, mo antap long kros, blong sevem yumi long evri sin blong yumi.
Jisas i bin ded mo i bin laef bakegen long ded blong Hem i sevem yumi long ded.
Jisas i givim sakramen long yumi blong helpem yumi blong tingbaot Hem.
Jisas i bin tijim yumi blong fogivim ol narafala man.
Jisas i bin soem long yumi olsem wanem blong stap kaen.
From Jisas, bae yumi evriwan i laef bakegen long ded afta we yumi ded.