Reykjavík, Aeslan

Wetem sno we i kavremap Esja Hil long baksaed, kalkala kapitol siti blong Aeslan, Reykjavík, i stap welkamem wan aelan nesen we i stap moa long 1,600 kilometa long men graon blong Yurop. Long taem bifo, Ol Viking nao oli stap ia, long 874 A.K.D.; Reykjavik i hat blong kalja, ekonomi mo gavman aktiviti blong Aeslan, mo tu, i wan long ol siti long wol we i moa klin, i moa grin mo i moa sef.

Tufala man Aeslan we tufala i bin baptaes, tufala i baptaes long Denmak long 1851 I no longtaem afta, tufala i gobak long Aeslan, mo long 1853, fas branj i oganaes. Tedei, i gat kolosap 300 memba long Aeslan; oli stap long tri branj, long Reykjavik, Akuyeri mo Selfos. Tempol we i moa kolosap, hem i London, Inglan, we i stap 1,894 kilometa longwe long Reykjavik.

Nomata we namba blong ol memba i smol, Jos i stap gohed blong stap gro. I nomata we oli stap olgetawan nomo, we i no gat translesen blong ol tul o buk blong Jos, i nomata se weta i nogud, mo kalja i defren, ol lida blong Jos oli bin promesem se, wan dei, bae Aeslan i stap olsem wan laet long ol nara kantri. Presiden Gordon B. Hinckley (1910–2008) i bin visitim Aeslan mo i bin rimaenem ol memba se oli “ol pipol we ‘bae oli stap strong mo oli gat paoa mo save’ mekem plante bigfala samting” (“Wonderful to Have Sweet, Good Land,” Church News, 21 Sept 2002, 10).

Aeslan Misin i bin oganaes long 1894, be misinari wok i bin stop long 1914. Aeslan i kam pat blong Denmak Kopenagen Misin long 1975.
Long 1977, Elda Joseph B. Wirthlin (1917–2008), we long tetaem ia i wan memba blong Fas Kworom blong Olgeta Seventi, i bin dediketem Aeslan blong oli prijim gospel long hem.
Long 1981, oli pablisim Buk blong Momon long lanwis blong Aeslan—we i wan lanwis we oli no stap toktok long hem long eni nara ples long wol.