Ol Blesing blong Fasin blong Stap Dipen long Yuwan
Bisnis I Stap Gro Bigwan
From ol samting we hem i bin lanem insaed long ol klas blong indipenden laef, taem wan doa i bin sat long Teddy Reyes, wan nara doa i bin open long hem.
FOTO I KAM LONG RAUL SANDOVAL
Hem i 4 klok moning long Santo Domingo, Dominik Ripablik, mo Teddy Reyes i wekap finis mo i stap wok. Hem i gat plante samting blong mekem tedei blong mekem se bisnis blong hem i gohed blong gro. Hem i stap katkatem ol tomato mo bred. Afta, bae hem i mekem spesel sos blong hem.
Long 6 klok moning, tufala wokman i kam helpem hem, mo oli rere long ol samting hariap. Taem 8 klok moning i kam, oli mekem 300 sanwij finis, we oli kavremap gud long plastik mo putum long ol smol bag. Sikis moa wokman oli kam, mo ful tim i go aot blong salem ol kaekae ia.
Taem 9 klok moning i kam, evri sanwij oli salem finis—tri o fo nomo we Teddy i putum i stap blong fidim tim blong hem.
Bisnis blong Teddy i stap gro gud. Be ol samting i no bin isi oltaem. Wanem i tru, i we blong ol las faef yia, hem i no bin save faenem wan wok, we bae i wok long hem longtaem long kaen wok we hem i bin jusum—olsem wan loya.
So, ?olsem wanem nao Teddy, i jenis, i kamaot long wok blong givim advaes long ol kastoma, i go blong salem ol sanwij? I tekem plante hadwok, be yes, i nidim tu blong mas praktisim gud ol prinsipol we hem i bin lanem insaed long ol klas we hem i bin tekem tru long Indipenden Laef Seves blong Jos.
Lusum Wok blong Hem
Faef yia i pas, laef blong Teddy i gud tumas. Hem i gat wan gudfala wok olsem wan loya, hem i jes mared, mo hem i jes baptaesem waef blong hem. Hem i talem: “Be mifala i gat sam jalenj mo mi lusum wok blong mi.”
Long ol nekis fo yia, Teddy i traehad blong faenem wok. “I gat fulap wok we mi bin save mekem, be i no gat wan i wantem pem mi. Mi traem blong statem sam defdefren wok miwan, be i no bin wok.”
Waef blong hem, Stefani, i bin gat wan gud wok, be salari blong hemwan i no save pem evri bil. I no longtaem afta, tufala i gat wan pikinini. Tufala i glad tumas, be mane blong tufala i stap kam sot. Tufala i lusum haos blong tufala; tufala i mas salem trak, mo tufala i yusum evri mane we tufala i bin sevem. Long en, oli mas muv i go long wan smol haos we mama blong Stefani i gat.
Be Teddy i no givap. I no longtaem afta, wan janis i kamkamaot long hem.
Paoa blong Stap Dipen long Yuwan
Afta plante yia we hem i bin stap traehad, Teddy i bin save se i taem blong jenis.
“Mi disaed blong tekem ol kos blong indipenden laef we Jos i stap givim,” hem i talem. “Mi harem se oli stap tokbaot, be oltaem, mi ting se oli no blong mi. Mi ting se oli blong lan blong mekem samting yuwan. Be ol klas ia oli gud tumas.”
Faswan, Teddy i bin joenem wan grup blong Mane blong Yuwan. Afta long hemia, hem i joenem Statem Bisnis mo Mekem i Gro. Ol grup klas ia oli bin helpem Teddy wetem bisnis save blong hem, be tu, i bin helpem hem blong kam antap long saed blong spirit.
Hem i talem: “Taem mi tekem ol klas ia, i jenisim evri samting. Mi disaed blong mekem evri samting we oli tijim. Mo faenens blong mi i jenis kwiktaem. Mi stat blong pem wan ful taeting, prea evri dei, stadi ol skripja, mo praktisim fet blong mi. Mo ol samting oli jenis—mi stat blong sevem sam mane mo blong kipim Sabat dei i tabu. Evri prinsipol oli blesem mi.”
Long grup blong hem blong Statem Bisnis mo Mekem I Gro, Teddy i lanem olsem wanem blong faenem wan gudfala prodak blong salem we bae i helpem ol kastoma long ples we hem i stap long hem. Taem hem i skelem wanem nao ol pipol oli stap lukaotem, insperesen i stat blong kam. Long eria blong hem, ol pipol oli laekem ol fres sanwij, be tu, oli laekem blong putum oda from—mo blong man i tekem i go long ples blong olgeta.
“Plante restrong oli gat wan spesel sos we i mekem kaekae blong olgeta i defren long ol narawan,” Teddy i talem. “!Mekem se mi mekemap wan spesel sos blong sanwij blong mi!”
Stap Mekem Bisnis blong Hem I Gro
Long dei we hem i statem bisnis blong hem, Teddy i mekem 30 sanwij.
“Teti minit afta, mi gobak hom,” hem i talem. “Waef blong mi i wari taem hem i luk mi stap slip long sofa. Hem i askem wanem mi stap mekem we mi kambak long haos finis—se mi sapos blong salem ol sanwij, ?no? Mi salem olgeta evriwan finis!”
Long ol nekis wik we oli kam afta, Teddy i ring i go long ol lokol bisnis mo ol skul. Plante oli wantem pem sanwij blong hem, mo bisnis blong hem i stat blong gro. Kwiktaem hem i lanem olsem wanem blong lukaotgud long ol fres vejetebol blong oli save stap longtaem. Hem i save stret se spesel sos ia bae i gud blong hamas taem. Hem i stap putum oda mo pikimap bred evri naet. Hem i pem ol vejetebol long ol Satedei long praes we oli katemdaon, we i no sas tumas be bae i gud yet long Mandei.
I no longtaem afta, hem i stap kasem ol oda blong ol spesel sanwij, mo ol bigfala namba blong ol sanwij blong ol spesel taem. Hem i nidim help mo i stat blong karem man i kam wok.
Taem hem i krietem ol gudfala rilesensip wetem ol lokol skul mo ol bisnis, Teddy i krietem wan grup blong kastoma we oli help gud mo oli kambak oltaem. Long fo manis taem, hem i gat eit wokman, mo i stap salem 300 sanwij long wan dei, faef dei long wan wik. Tim blong hem, blong salem sanwij i wok gud tumas, mekem se oli stap salem evri sanwij, iven long taem we ol skul oli klosem doa. Naoia, Teddy i rere blong mekem bisnis i go bigwan moa.
From se hem i tekem ol klas blong indipenden laef, hem i kasem insperesen blong kam antap wetem bisnis blong mekem sanwij. “From daereksen ia we mi kasem long Jos mo from ol blesing we mi bin kasem, mi gat wan strong testemoni abaot Jos mo Jisas Kraes.”