Ol Hom blong Yumi, Ol Famli blong Yumi
Boe blong Mifala I Boe blong Papa long Heven
Hem we i raetem hemia i stap long Arisona, YSA.
Ol toktok we oli no ol toktok blong mi oli kam insaed long maen blong mi: “?Yu yu ting se yu lavem hem moa i bitim mi?”
Foto blong hem we i raet mo boe blong hem
Swit smol boe blong mitufala, Hayden, i bon i kam long wol ia, we bodi blong hem i blu, i no pulum win, mo i traehad blong laef. Hem i no stap krae. Hem i no muv.
Taem ol dokta mo ol nes oli pusum hem kwik insaed long rum blong hospital, mi bin save se wan samting i nogud evriwan. Hasban blong mi mo papa blong mi oli kwik blong givim wan prishud blesing long Hayden, mo afta, oli karem Hayden i go long imejensi kea. I no longtaem afta, oli faenem se hem i gat wan sik blong hat, we i no gat fulap man i kasem. Afta sam dei, oli operetem hat blong hem plante taem.
Tru long merikel paoa blong ol blesing blong prishud, blong livim kaekae, mo blong prea, Hayden i bin winim evri samting mo i bin laef. Mitufala i bin glad tumas blong tekem boe blong mitufala i gohom mo statem wan niu laef tugeta.
Hayden i karem glad we man i no save makem, i kam insaed long laef blong mifala. Mitufala i laekem hem tumas. Be taem we taem i stap pas i go, mi stat blong wari se hem i no stap progres olsem we hem i sapos blong progres. I nomata we ol spesel dokta oli talem se bae hem i kam oraet, ol nogud wari oli gohed taem mi traehad blong helpem boe blong mi.
Hasban blong mi mo mi i stap stadi blong lanem hamas samting we mitufala i save faenemaot abaot sik blong Hayden. Mitufala i mekem evri samting we ol dokta oli talem mitufala blong mekem. Be yet, progres i no kam gud.
Mi kam taed mo mi stap kros. Mi plis long Papa blong mi long Heven blong faenem wan we i save helpem Hayden, be help ia i no kam nomo. Helt blong Hayden i go mowas. Hem i stat blong gat taem we bodi i seksek. Mitufala i fraet. Mitufala i ting se mitufala i stap lusum hem nao.
Wan naet, mi wekap i stap let long naet blong stap lukaotem sam ansa. Mi raetem wan leta i go long Hayden. Mi talem hem se mi lavem hem tumas, mo mi stap traehad blong mekem laef blong hem i isi. Mi promesem se bae mi spenem haf blong laef blong mi blong mekem se hem i kasem help we hem i nidim.
Mi kros mo from mi no save wanem bae i hapen, i mekem se mi harem se ol samting oli bigwan tumas blong mi tekem. Mi nildaon mo askem long Papa blong mi long Heven se: “?From wanem?” Mi ting se Hem i sendem Hayden i kam long mi from se Hem i save se bae mi neva stop blong traem helpem boe blong mi. ?So, from wanem nao mi no save faenem ol ansa? ?From wanem wanwan niu dokta mo wanwan niu tritmen i mekem mifala i go fas long wan nara fanis i stap? ?Weswe? ?Papa long Heven i no lavem Hayden?
Mi bae neva fogetem taem ia. Mi sek, wan bigfala filing blong lav i kam raonem mi. Ol toktok we oli no ol toktok blong mi oli kam insaed long maen blong mi: “Jerlyn, ?Yu yu ting se yu lavem hem moa i bitim mi?”
Mi nomo muv. Taem i stop i stap. Wota blong ae i foldaon, i ron long fes blong mi—i no from mi kros, olsem fastaem; be from mi gat hop, mi andastanem, mo filim lav.
Long wan smol taem ia nomo, evri samting i jenis. Hat blong mi i kam sofsof. Ol kwestin blong mi oli jenis. Mi andastanem naoia se Papa blong yumi long Heven i stap lavem Hayden wetem wan lav we i stret evriwan. Hayden, Hem i sendem i kam blong i gat wan bodi we i stret folem ol nid mo ol janis blong hem, blong hem i save gro mo lanem samting. Hem i gat sam samting we hem i save mekem mo hem i gat sam jalenj, semmak olsem wanwan long yumi. Mi kam blong save se, ol pikinini we oli gat disabiliti, oli impoten tumas long Papa long Heven, mo Hem i lavem olgeta tumas, mo oli gat wan spesel misin, long ples ia, long wol ia.
Hasban blong mi mo mi, oltaem nomo mitufala i stap kasem ol ansa mo ol blesing, be oli stap kam long taem blong Lod, i no folem taem blong mitufala. Mitufala i kasem ol stret buk, ol stret tritmen, ol stret skul mo ol tija blong helpem Hayden blong gat sakses long laef blong hem long wol ia. Mitufala i traehad blong lukaotem rod ia we Papa long Heven i putum i stap blong Hayden, be i no rod ia we mitufala i wantem hem i wokbaot long hem. Mitufala i stap mekem evri samting we mitufala i save mekem blong helpem Hayden i kasem tabu paoa we hem i save kasem, mo gat laef ia we Papa long Heven i putum i stap blong hem. Wanem mitufala i andastanem abaot plan blong Papa long Heven i kam klia moa naoia, mekem se mitufala i andastanem se Hayden i blong Hem bifo Hayden i blong mitufala.