Kot we I Lus
Hem we i raetem hemia i stap long Aeowa, YSA.
“Mi, Lod, bambae mi fogivim huia we bambae mi fogivim; be yufala, mi talem se yufala i mas fogivim evri man” (Doktrin mo Ol Kavenan 64:10).
“Mama, !kot blong mi i lus!” Brad i talem. Hem i taem blong aot long jos blong gobak long haos, be Brad i no save faenem kot blong hem.
“?Yu tru se yu hangem i stap?” mama i askem.
“Yes. i stap ia nomo.” Kot blong Brad i braet blu mo red. Bae i isi blong faenem.
“Maet wan i putum nara ples. Yumi lukaot raon long bilding,” Papa i talem.
Mama, Papa, mo Brad oli seraot mo jekem ol defren rum. Oli lukluk insaed long bokis blong ol samting we oli lusum mo faenem, oli lukluk insaed long japel, insaed long Sandei Skul klasrum, mo long evri ples blong hangem kot. Oli lukluk tu long ol batrum, be oli no faenem kot.
“Ating wan i mestem, nao i tekem. Mi sua se bae oli tekem i kambak long nekis wik taem bae oli luk se i no blong olgeta,” Papa i talem.
“Be naoia, yu save werem olfala kot blong yu,” Mama i talem.
Brad i mekem fes blong hem i nogud. Hem i no laekem olfala kot ia. Kaliko i tintin, i nomo gat kala mo i smol tumas long hem. Hem i laekem tumas niufala red mo blu kot, we i mekem hem i luk olsem wan supa hiro.
Brad i tingting: “Ating wan i luk se kot blong mi i gud tumas nao i stilim.” ?Be samting ia i save hapen long jos? Evriwan i sapos blong stap ones. Brad bae i no letem wan stilman i ronwe wetem kot ia. Hem i gat wan plan. Long nekis Sandei, bae hem i luklukgud ol man, se huia i stap werem kot ia. Nao bae hem i pulumbak mo singaot: “!Yu stop, yu stilman!” Bae oli sore ia sapos oli tekem kot ia.
Brad i no save wet se Sandei i kam kwik blong hem i mekem folem plan blong hem. Be long nekis Sandei, ples i hot tumas blong man i werem kot, mo nekis Sandei afta tu.
Be nambatri Sandei afta, Brad i lukluk long ol boe, wetem nogud ae insaed long Praemeri, i stap tingting se huia i stilim kot blong hem. ?Hem i tolfala boe ia? ?Maet i gel ia? Hem i filim se hem i no save trastem eniwan. Brad i no laekem filing ia tu.
Afta long Jos, Brad i hariap i go raon long bilding, i stap lukluk ol famli oli werem kot blong olgeta. Be hem i no luk kot blong hem long eni ples. Hem i go jekem bokis blong samting we oli lusum mo faenem … be i no gat kot. ?Be, i stap wea?
Taem hem i stap gobak hom, Brad i tingting long wan niu plan. Bae hem i prea. Hem i bin save se Papa long Heven i save faenem ol samting we oli lus. Long naet ia, Brad i prea mo talem: “Papa long Heven, plis talem long mi huia i tekem kot blong mi. Mi wantem kot i kambak.”
Brad i wet se nem o fes blong stilman bae i kam long maen blong hem. Be, hemia i no hapen; hem i stat blong tingbaot fren blong hem, Karl. Brad i stap sidaon kolosap long Karl plante taem long Praemeri. Tufala i stap tok fani mo laf tugeta plante. Be Karl i no bin kam long jos plante wik nao. Brad i misim hem.
?Be olsem wanem sapos Karl nao i tekem kot blong hem? Maet Karl i fraet blong kam long jos naoia from se hem i ting se Brad i nomo fren blong hem. Brad i wantem Karl i kam long jos bakegen. Sapos Karl nao i tekem kot blong hem, Brad i disaed finis se bae hem i no rao long hem. Bae i fogivim hem.
Brad i go long bed, i harem gud smol.
Long nekis Sandei, long Praemeri, Karl i no stap, be i gat wan niu boe i stap. Hem i stap werem wan nektae we i red mo blu.
Brad i talem: “Naes nektae,” mo i sidaon long saed blong boe ia. “I mekem yu luk olsem wan supa hiro.”
Boe ia i smael.
Brad i smael tu. Hem i nomo stap lukaotem stilman bakegen. Hem i stap lukaotem ol fren.