Faenem Pis blong Yuwan mo blong Ol Narawan long Ol Trabol Taem
Hemia eit wei blong helpem yuwan mo ol narawan blong filim pis taem laef i kam strong tumas.
Bakgraon mo pikja oli kam long Getty Images
Samtaem, laef i go apsaed daon, mo i tantanem. Maet yu wari, yu gat tingting long famli, yu gat problem long helt, ol problem long skul, o eni kaen trabol nomo we i stap hapen long wol tedei. ?Olsem wanem nao yumi save faenem pis we i blong yumiwan insaed long wan wol we i trabol? Maet yu no gat pis from sam samting we oli hapen we oli aotsaed long kontrol blong yu, o from ol samting we yu save lidim mo jenisim; be hemia samfala aedia blong save helpem yu blong faenem pis insaed long yu tru long Jisas Kraes.
4 Wei blong Faenem Pis we i blong Yuwan
-
Lukluk nomo long wanem we i no save finis
Hem i had blong filim pis taem yu stap lukluk nomo long ol wari we oli blong sot taem. Be sapos yu stap lukluk long bigfala pikja, we i plan blong stap glad we i kam long God, bae yu save faenem pis ia blong save se wanem we i soa naoia, bae i no stap blong longtaem. Eksampol. Tempol i stap helpem yumi blong lukluk nomo i go long taem we i no save finis. Presiden Gordon B. Hinckley (1910–2008) i bin talem se, insaed long tempol, “bambae yu save wan pis ia we bae yu no save faenem long eni nara ples moa.”1
-
Lego samting ia we yu no save kontrolem
Taem i gat wan samting we yu no save kontrolem i stap karemaot pis blong yu, blong stap lusum hop o stap kros, i kam olsem wan temtesen. Be blong stastap holemtaet ol samting olsem we yu no save jenisim, bae i no helpem yu. Be, yu mas kam kolosap long Sevya blong save faenem pis we i stap insaed long yu, iven taem laef i mekem yu stap gotru long wan nogud taem. Hem i bin promesem yu se bae Hem i sendem Spirit blong Givhan i kam long yu, we i Tabu Spirit (luk long Jon 14:26–27).
-
Fogivim Ol Nara Man
Plante taem, samting we i had moa blong lego, hem i ol nogud samting we yu stap filim taem wan i mekem nogud long yu. Be, Elda Dieter F. Uchtdorf blong Kworom blong Olgeta Twelef Aposol i bin tijim: “Bambae yumi kasem glad ia blong save fogiv insaed long laef blong yumiwan taem bae yumi glad blong givim glad ia i go long ol narawan tu. … Long en, bae Spirit blong Lod bae i fulumap sol blong yumi wetem glad ia we i kam wetem pis long tingting (luk long Mosaea 4:2–3).”2 Blong tanem yumi i go long Sevya i save help blong yu fri long ol trabol long filing mo bae yu fulap wetem pis.
-
Sakem sin mo dipen long Kraes
I nomata wanem nara samting i stap gohed insaed long laef blong yu, blong stap tekem hevi trabol blong sin, hemia, bae i stilim pis blong yu. Samtaem, yumi nidim bisop blong yumi blong yumi save sakem sin fulwan. Be, yumi evriwan i nid blong stap sakem sin oltaem, mo tru long Atonmen blong Jisas Kraes, yumi kam klin long evri samting we i stap holemtaet yumi blong kam moa olsem Hem.
4 Wei blong Helpem Ol Narawan blong Faenem Pis
-
Serem gospel blong Jisas Kraes
Semmak olsem we yumi save faenem pis blong yumiwan taem yumi lukluk nomo i go long Sevya, semmak, yumi save poenem ol nara man oli go long Hem, we i “stamba man blong pis” (Mosaea 15:18). Eksampol. Traem serem wan skripja o kwotem wan konfrens toktok we i bin helpem yu blong lanem moa abaot Jisas Kraes.
-
Stap wan blong mekem pis
Helpem ol fren blong yu o ol brata mo sista blong yu blong stretem ol problem. Olsem Ol Antae-Nifae-Lihae insaed long buk blong Alma, yumi save berem ol tul blong faet—ol tul olsem, gosip, fasin blong givimbak, o blong stap selfis—mo sakem olgeta mo tekem ol tul blong putum pis: toktok wetem kaen fasin, obei long ol komanmen blong God, mo fogivim ol narawan (luk long Alma 24:19).
-
Stap wan gudfala man o woman blong stap lisin
Samtaem, ol pipol we oli stap gat trabol, oli nidim nomo blong talem ol tingting mo ol filing blong olgeta long wan narawan, be i no blong stap holemtaet wetem olgeta nomo. Yumi no nid blong stretem ol problem blong olgeta, be yumi save lisin nomo long ol wari blong olgeta, mo givim sapot, blong soem lav mo andastaning olsem hemia blong Kraes.
-
Givhan long olgeta insaed long wod mo komuniti blong yu
Yu save kam volontia long wan selta blong olgeta we oli no gat haos, o blong stap olsem wan blong givhan long fren, o blong tekem naes kaekae i go long wan niu famli long ples we yu stap slip long hem. Helpem ol pipol blong oli faenem pis long ol smol samting. Blong gat wan ples blong save stap kakae mo slip long hem, blong gat wan we i save tijim tingting mo yu trastem hem, o wan smol save long maen se wan i stap kea long yu, olgeta samting ia i save help bigwan.
Jisas i talem ol toktok blong kamfot ia long evriwan we i stap traehad blong faenem pis: “Mi putum pis blong mi i stap wetem yufala. Mi nomo mi givim pis ya long yufala. Mo pis ya we mi mi givim i no olsem pis we ol man blong wol oli save givim. Yufala i no letem tingting blong yufala i trabol, yufala i no fraet.” (Jon 14:27). Sapos yumi tekem yumiwan, mo ol narawan, oli kam kolosap moa long Jisas Kraes, bambae yumi save faenem pis taem laef i kam strong tumas.