Filim Niu
Hem we i raet i stap long Teksas, YSA.
Estonia
“Mi gat wan sapraes! Ema (Mama) i talem taem hem i pikimap Rasmus long skul. Tufala tugeta i wokbaot i go daon long ol rod we laen blong ol kalkala bilding oli folfolem olgeta.
“?I gat Rosolje blong kakae long naet?” Rasmus i talem wetem hop. Oli jes kakae nomo long las wik blong namba seven betdei blong hem. !Be hem i save kakae moa poteto mo bitrut salad wetem drae fis we i sol!
Ema i seksekem hed blong hem, mo i smael. “Mi mitim tu yang woman long bas tedei long moning. Ol misinari. Oli kam visit tedei long naet blong tokbaot jos blong olgeta.”
Rasmus i lukluk hem, i wantem save moa. Hem i neva mitim ol misinari bifo.
Hem i stap long bedrum blong hem, i stap plei wetem faea trak blong hem taem ol misinari oli kam. “!Tere! “!Tere! !Halo!” oli talem long Ema taem tufala i wokbaot i kam insaed long apatmen. Tufala i tekemaot hevi but blong tufala, putum ol slipa blong haos we Ema i putum i stap blong olgeta we oli kam visit. Ema i soem rod i go long sofa we i orenj. Be Rasmus i stap long doa.
Woman we i tolfala moa i luk hem mo i smael. Blak nem tag blong hem i talem Õde Craig (Sista Craig). Hem i talem: “Mama blong yu i talem se betdei blong yu i jes pas. “Mitufala i tekem wan smol samting i kam.” Hem i holem wan smol kad. Rasmus i luklukgud long kad ia.
I gat pikja blong wan man i stap long hem. Hem i werem wan waet longfala klos, mo han blong hem i open i stap.
“?Yu yu save se huia Hem?” Õde Craig i askem.
Rasmus i no save nem blong man ia. Hem i neva luk pikja ia bifo. Be man ia, fes blong hem i luk se hem i kaen mo i gat paoa. “Mi ting se !hem i wan king!” Rasmus i talem.
Tufala misinari ia i smael. “!Yes, hem i wan king! !Hem i King blong ol king! Nem blong Hem, hem i Jisas Kraes.” Õde Craig i pulumaot wan buk wetem blu kova. “Mo hemia i wan buk we i stap tij abaot Hem, oli singaotem Mormoni Raamat. Buk blong Momon.”
Hem mo Ema, tufala i stat blong ridim Buk blong Momon evri dei bifo hem i go long skul. Long taem blong skul, Rasmus mo klas blong hem i stap go wokbaot long bus, mo afta, oli go stap slip smol. Afta long skul, hem mo Ema, plante taem bae tufala i mitim ol misinari. Oli toktok wetem ol misinari abaot wanem oli bin ridim insaed long Buk blong Momon. Samtaem, bae Ema i kukum kringel, we i wan sinamon bred we oli bekem, mo fidim evriwan wetem. Long ol wiken, hem mo Ema oli ron long baeskel mo go piknik long solwota. Samtaem, oli go mekem ol longfala wokbaot long bus, o folem reva we oli laekem.
Long wan long ol wokbaot ia long bus, Ema i talem long hem se hem i wantem baptaes. Rasmus i toktok smol. Ol misinari oli bin askem Ema blong prea se bae hem i baptaes o nogat. !I luk olsem se hem i gat ansa blong hem finis!
“Mo naoia, mi save stret weaples bae mi kasem baptaes,” hem i talem wetem wan smael. “?Yu save traem talem?”
Rasmus i tingbaot lesen blong ol misinari long saed blong baptaes. Oli bin soem wan pikja we i soem se Jisas, wetem Jon Baptaes, tufala i stap long wan reva. …
“!Reva!” hem i talem. “Fevret reva blong yumitu.”
Wan wik afta, Rasmus i stanap long saed blong reva wetem ol misinari mo sam narafala pipol blong jos. Ema i rere blong kasem baptaes. Hem i go andanit evriwan long wota, semmak olsem Jisas i bin mekem. Taem hem i kam antap, hem i stap smael. Rasmus i wantem blong tingbaot taem ia blong oltaem—blu wota, ol waet wael flaoa long grin gras, mo smael blong mama blong hem.
Afta, hem i askem: “?I fil olsem wanem blong kasem baptaes?”; hem i askem hemia taem evriwan i stap kakae kuki we ol misinari oli bin tekem.
“I gud tumas” Ema i talem long hem. “Mi wantem blong stap insaed long reva blong oltaem. !Mi filim we mi niu evriwan!” Ema i haggem hem strong.
“Long nekis betdei blong mi, mi wantem kasem baptaes, semmak olsem yu mo Jisas,” hem i talem long Ema. “Mi tu, mi wantem filim niu!