Traem Sam Niufala Ista Tradisen
Long Ista ia, spenem sam moa taem blong stap tingbaot presen ia we i moa bigwan we oli bin givim long man.
Smol pat blong peinting ia, Wan Pikinini i bon i kam long yumi, i kam long Lynne Millman Weidinger
Taem yumi tokbaot ol holidei, oltaem Krismes i pulum moa tingting blong man. Be yet, wetem ol samting we yumi stap selebretem longtaem finis i kam kasem naoia long Ista, bae Krismes bae i no save stap.
Presiden Gordon B. Hinckley (1910–2008) i bin tijim long wan taem se, “Bae i no gat Krismes sapos i no gat Ista. Smol bebi Jisas blong Betlehem bae i jes wan nara bebi nomo sapos i no bin gat Kraes blong Getsemane we i pemaot man, wetem Kalvari, mo wetem viktri ia we hem i Laef Bakegen long Ded.”1
Hemia samfala tradisen we yu save lukluk long olgeta blong ademap long ol yia selebresen blong yu.
1. Go Singsing ol Krismes Karol long Ista
Lego i stap ol singsing abaot ol dia mo ol smol man; ol singsing blong Krismes oli stap tokbaot Jisas Kraes. Ista i wan stret taem blong gat sam miusik abaot Sevya, mo yes, iven taem oli singsing ol singsing ia long fored blong doa blong ol neba blong yu.
Sapos yu no gat wan tingting nating, jekem seksen blong “ol topik” insaed long hymbuk, andanit long “Easter” (Ista) mo “Atonement” (Atonmen) blong faenem sam singsing. Eni singsing we i stap selebretem Jisas Kraes i stret blong singsing long Ista.
2. Fogivim Wan
?Hamas taem nao yu yu bin talem tangkyu from presen ia we i fasin blong sakem sin? Ista i givim wan janis blong yumi tingting moa long wei blong mekem spirit blong fogivnes ia i go moa, i go kasem ol narafala man.
Jisas i tijim: “Taswe, mi talem long yufala, se yufala i mas fofogivim wanwan long yufala. …
“Mi, Lod, bambae mi fogivim huia we bambae mi fogivim; be yufala, mi talem se yufala i mas fogivim evri man” (Doktrin mo Ol Kavenan 64:9–10).
Askem yuwan: ?Huia nao we yu no laekem hem, yu gat nogud filing agensem hem? Prea blong gat paoa blong fogivim man o woman ia, mo afta, letem Sevya i help blong olgeta filing ia we i mekem yu harem i soa, oli go lus evriwan.
3. Mekem wan Drama, Wan Plei, O nara samting
Yu save mekem wan Ista drama o plei. Wan simpol eksampol bae i wan taem blong ridim skripja long famli haos naet, o wan singsing konset we evriwan i singsing folem yu; hemia yu save mekem long komuniti.
4. Visitim Gref blong Olgeta we Yu Lavem Olgeta
From Jisas Kraes, ded i nomo gat paoa (luk long 1 Korin 15:55). Spenem taem blong visitim ol gref blong olgeta we yu lavem olgeta, mo tingting hevi long gudfala nius ia.
Maet bae yu save ridim laod sam fevret skripja we i tokbaot Laef Bakegen long Ded taem yufala i stap visitim ol gref ia. Samfala long ol plante skripja blong tokbaot long taem ia, oli, 1 Korin 15:20–22; Alma 11:42–44; mo Doktrin mo Ol Kavenan 88:14–16.
5. Kam Moa Gud
Smol pat blong peinting ia, Jisas Kraes I Visitim Ol Amerika, i kam long John Scott
Ista i givim ona long ol samting we oli bin hapen long Getsemane, wanem i bin hapen antap long kros, mo Sevya we i girap long ded long nambatri dei, mo afta, givhan mo tijing blong Hem blong 40 dei bifo Hem i go antap long heven.
Antap long hemia, i no longtaem afta we Hem i bin go antap long heven, we Jisas Kraes i bin kamaot long Ol Man blong Nifae mo i bin tijim olgeta (luk long 3 Nifae 11–28). !Hemia i plante samting blong stap selebretem!
?Bae yu glad blong mekem Ista taem blong yu i longfala moa? Mekem sol blong yu i glad longtaem moa long ol merikel blong Ista. Traehad moa blong kam moa olsem Kraes long ol 40 dei afta long Ista. Blong gat insperesen, tingting long invitesen ia we i kam long Presiden Russel M. Nelson: “ Givim sam taem blong yu, evri wik, blong stat stadi evri samting we Jisas i bin talem, o i bin mekem olsem we oli raetemdaon long OlTesteman, from se Hem i Jehova blong OlTesteman. Stadi long ol loa blong Hem olsem we oli raetemdaon insaed long Niu Testeman, from se Hem i Kraes blong Niu Testeman. Stadi long doktrin blong Hem olsem we oli raetemdaon long Buk blong Momon, from se i no gat wan moa buk blong ol skripja we oli tokbaot misin blong Hem, mo seves blong Hem we i moa klia bitim insaed long Buk blong Momon. Mo stadi long ol toktok blong Hem olsem we oli raetemdaon insaed long Doktrin mo Ol Kavenan, from se Hem i stap gohed blong stap tijim ol pipol blong Hem long dispensesen ia blong tedei.”2
Ol Tradisen blong Yu Oli Wet long Yu
Elda Dieter F. Uchtdorf blong Kworom blong Olgeta Twelef Aposol, i bin tijim: “Blong faenem dei we i impoten moa long histri, yu mas gobak long aftenun ia kolosap 2,000 yia i pas, insaed long Garen blong Getsemane, taem Jisas Kraes i bin nildaon long bigfala prea mo i bin givim laef blong Hem blong pemaot ol sin blong yumi.”3
Ol taem we oli impoten moa insaed long histri, oli gud inaf blong yumi tekem taem blong stap tingting hevi long olgeta, evri yia. Ol tradisen oli stap helpem yumi blong mekem hemia; i nomata se oli ol tradisen we oli stap long lis ia, o eniwan we yu yu jusum.
?Wanem nao bae yu ademap long yia ia?