Ol Kwestin mo Ansa
“?Olsem wanem petriakel blesing blong mi i save helpem mi blong mekem ol desisen?”
Liahona blong Yumiwan
Ol petriakel blesing oli wan wei we i stap, we Papa long Heven i stap helpem yumi blong save aedentiti blong yumi bifo yumi kam long wol, aedentiti long laef blong yumi long wol ia, mo hemia blong taem we i no save finis. Taem yumi save ol trifala spesel trutok abaot yumiwan, i helpem yumi blong folem plan we God i gat long wanwan long yumi. Yumi save huia yumi, from wanem yumi stap long ples ia, mo weaples yumi save stap long hem. Taem Liahona i wok wetem fet mo strong tingting blong Nifae mo famli blong hem blong stap folem ol kaonsel we hem i givim (luk long 1 Nifae 16:28), yumi tu, yumi save stap fetful mo wok strong blong folem Liahona blong yumiwan, mo ol kaonsel we hem i givim, we i lidim yumi blong kasem ol tabu paoa we yumi gat blong kasem.
Elda Utai, 20 yia, Ajentina Salta Misin
Lukluk I Go long Taem we I No Save Finis
Mi no gat eni tingting long wanem desisen blong mekem, mi lukluk long petriakel blesing blong mi, mo tingting hevi long tabu revelesen we i stap. Afta, blong disaed i kam isi nomo. Hemia i stap helpem mi blong stap strong long laef long wol ia mo kasem ol blesing blong promes, be tu, i stap mekem mi tingbaot se mi mas mekem miwan i rere blong stap klin inaf blong go insaed long kingdom blong Lod wan dei. Hem i stap helpem mi blong gro long fet, blong trastem tingting blong Lod, mo blong laef wetem wan lukluk we i luk long taem we i no save finis.
Abegail F., 18 yia, Kagayan Vale, Filipin
Kaonsel we I Kam long Heven
Petriakel blesing blong mi i givim mi advaes we i kam long Papa long Heven. Sapos mi folem kaonsel ia, mi save se bambae mi kasem revelesen ia abaot ol desisen we mi nidim blong mekem. Hem i stap ansarem sam long ol kwestin blong mi iven bifo mi askem.
Kami H., 16 yia, Yuta, YSA
Lisin long Spirit
Sapos yu stap lukaotem blong gat kamfot, mo blong Spirit i lidim yu, o yu stap lukaotem wan ansa long wan kwestin we i strong long maen blong yu, yu save prea wetem tru tingting from hemia, mo ridim petriakel blesing blong yu wetem tru tingting long hat, mo semtaem, stap lisin long Spirit. Sapos yu luklukgud long ol skripja, bae i save help tu. Mi biliv se, sapos yu mekem hemia wetem ril fet, bambae Lod i ansarem yu, long stret taem mo long bes wei.
Kezia B., 15 yia, Hawae, YSA
Ol Blesing we Hem I Promesem
Ol petriakel blesing oli talem long yumi wanem God i wantem blesem yumi wetem. Hem i givim yumi ol woning mo i eksplenem olsem wanem yumi save kam moa olsem Hem. Taem yumi save wanem Papa long Heven i gat blong givim long yumi, mo olsem wanem blong kasem, nao bambae yumi mekem ol joes mo mekem samting i stret folem blong yumi save kasem.
Hunter H., 18 yia, Yuta, YSA