Ol Eksampol blong Fet
Bob mo Lori Thurston
We Tufala I bin Givim Seves long Kambodia Pno Pen Misin
“Taem mitufala i faenemaot se oli bin singaotem mitufala long Pno Pen Misin, mitufala i krae. !Mitufala i glad tumas!” Brata Bob Thurston i talem. “Bae mitufala i no jusum Kambodia, !be i bin wan presen! !Hem i wan blesing!” Sista Thurston i talem.
Tufala Thurston i filim wan spesel rilesensip wetem ol pipol long Kambodia. “Mitufala i lavem olgeta, mo oli lavem mitufala tu,” Sista Thurston i talem. “Ol pipol long Kambodia oli bin soem fasin we i kaen bigwan.”
Aot long evri responsabiliti we tufala Thurston i bin gat long misin blong tufala, oli bin laekem tumas blong gat janis blong visitim ol memba insaed long hom blong olgeta.
Sista Thurston i tingbaot se hem i stap lukluk long olgeta we hem i bin stap givim seves long olgeta long Kambodia, mo tingting se: “Mi no save wet kasem taem mi luk yufala bakegen long nekis laef; long tetaem ia nomo bae mi rere blong talem long yufala olgeta samting we mi filim blong yufala mo lav ia we mi gat long yufala.”
Long fasfala misin tugeta, Bob mo Lori Thurston, tufala i lanem se fasin blong givhan wetem mining i save hapen nomata we lanwis i no semmak mo kalja i defren, from se yumi evriwan, yumi ol pikinini blong God.
Leslie Nilsson, hem we i tekem foto
Bob:
Bifo Lori mo mi i mared, mitufala i stap tokbaot blong go givim seves long misin taem bae mitufala i nomo wok. Mitufala tugeta i bin go finis long wanwan misin. Lori i bin go long misin long Kobe, Japan, mo mi givim seves long Brisban, Ostrelia. Taem mifala i kam we mifala i rere blong stop blong wok, mitufala i talem ol pikinini se mitufala i wantem go wok long plante misin.
Mitufala i laki tumas we mitufala i save stop blong wok, we mitufala i yangfala nomo. Taem mitufala i harem se ol senia kapol oli no save go wok long sam ples, olsem ol pua kantri long wol from ol problem blong helt mo ol nara samting, mitufala i tingting: “Be yumitu i no kasem 60 yia yet !Mitufala i helti! !Yusum mitufala!”
Mi stop blong wok jes tu dei afta long namba 56 betdei blong mi. Mitufala i kasem misin koling blong mitufala taem mi bin stap wok yet. Taem mitufala i openem koling leta blong mitufala mo faenemaot se oli bin singaotem mitufala long Pno Pen Misin, mitufala i krae. !Mitufala i glad tumas!
Lori:
Kambodia i no stap long tingting blong mitufala nating. Mi stap ting se bae mitufala i go long Afrika o wan ples olsem. Mitufala i stat blong askem mitufalawan: “Okei, ?Wanem samting nao i stap wet long yumitu?” Bae mitufala i no jusum Kambodia, !be i bin wan presen! !Hem i wan blesing! Lod i moa smat long yumi. Hem i sendem mitufala long ples we mitufala i nid blong stap long hem.
Mitufala i go long wan yumaniterian misin. Mitufala i wok long ol projek blong LDS Charities, fulumap ol ripot, mo askem ol niufala projek. Oli askem mitufala tu blong jekem ol projek we i pas finis, olsem ol wel we oli bin drilim tu yia i pas finis. Mitufala i givim seves long sam nara wei tu.
Mitufala i go long ol stek mo distrik konfrens blong help blong trenem ol lida mo ol misinari, mitufala i help blong jekem ol apatmen blong ol misinari mo mifala i bin visitim ol memba insaed long haos blong olgeta. Mitufala i mekem eni kaen samting blong help blong misin i ron gud.
I no gat tu dei we i semmak long misin. Sam dei, mifala i stap long dak bus, we wota o sofmad i kasem ni blong mitufala. Sam nara dei, mitufala i spendem insaed long misin ofis. Wetem ol misinari blong Pablik Afea, mifala i go visitim Ministri blong Relijin mo Wosip Grup Long Kambodia, toktok ia, wosip grup, i no wan nogud samting. Ofisol relijin i Buda—Evri nara samting, i wan wosip grup. Mifala i go visitim Ministri blong help blong talem se Jos blong Jisas Kraes blong Ol Lata-dei Sent i wan gudfala oganaesesen, mo oli save trastem mifala.
Mifala i developem wan gudfala rilesensip wetem olgeta, mo olgeta i bin kwik blong askem help. Bae oli ring mo talem: “Mifala, bigfala wota i ron, mo mifala i nidim kaekae blong 200 famli we oli bin muvum olgeta.” Oli bin save se oli save dipen long Jos blong karem samfala samting i go long weaples i gat bigfala nid long hem, mo joenem ol samting wetem wanem we oli no gat.
?Wanem nao mifala i gotru long hem long Kambodia? !Yu nomo yu talem! !Evri kaen samting! Mitufala i bin sidaon long ol floa we i no gud gud tumas—fulap taem i jes graon nomo, o bambu—plante taem mitufala i sidaon insaed long haos we oli no flas nating. Mitufala i bin go tu long ol bigbigfala haos blong ol wokman blong gavman. Bob tu i bin givim seves insaed long wan branj presidensi blong smol taem.
Bob:
Bae misin presiden i ring mo talem: “Ei, mi wantem yu blong kam seken kaonsela long wan branj.” Wan yia haf afta, mi bin stap long siling rum blong Hong Kong Jaena Tempol wetem branj presiden ia we mi bin stap wok wetem. !Hem i go insaed long tempol blong fas taem! Hem mo famli blong hem i bin sevem mane, mo traem seven taem blong go long tempol, be oltaem bae i gat wan aksiden, o wan bae i sik. Oltaem, wan samting i kam blokem rod. Afta seven yia, oli bin sevem 40 dola nomo.
Tri taem long misin blong mifala, mifala i bin save helpem ol Lata-dei Sent long Kambodia blong oli go long tempol. Mifala i tekem plante long ol branj presiden we oli bin stap mekem ol intaviu blong ol tempol rekomen, be olgetawan, oli neva go long tempol. Nao, long Kambodia, i gat wan senia kapol we i stap helpem ol famli ia blong oli mekem rod i go tempol. Oli nidim blong gat wan i stap wetem olgeta from se oli no save olsem wanem blong flae long plen. !Plante oli neva ron long bas tu! Mo naoia, oli mas flae i go long Hong Kong, mo mekem rod blong olgeta i go long tempol. Hem i bin had long olgeta blong mekem samting ia olgetawan nomo. Mifala i glad mo talem tangkyu from Tempol Petron Sapot Basket we i stap help blong lukaotgud long olgeta.
Lori:
Blong stap olsem wan memba blong Jos long Kambodia, hem i wan jalenj. Olsem wan kantri, Kambodia i no gat wan Sabat tingting. Evriwan we i kam long jos, i mas mekem sam sakrifaes blong stap long Jos.
Mo tu, long Kambodia, i gat sikis pesen blong Ol Muslim, mo tu pesen nomo blong Ol Kristin—big haf we i stap oli Ol Budis. Blong kamaot long laef stael blong Budis mo jenis i kam long laef stael blong Ol Kristin, hem i wan had samting. Sam pipol oli lusum wok blong olgeta, mo plante taem, ol narafala pipol raonabaot oli sakemaot olgeta.
Taeting tu, i wan bigfala samting. Bae ol Budis monk oli kam raon long evri moning mo askem raes o sam mane, mo ol pipol oli oraet wetem hemia. Be blong karem salari, mo tekemaot smol blong pem taeting, i wan bigfala problem.
Plante oli gat bigfala hadtaem long laef blong olgeta. From ol Kmea Ruj, wan komunis gavman we i bin rul let long ol yia 70, evriwan we i gat 40 yia i go antap, i gat wan prapa nogud storian blong laef blong hem. Mi no mitim wan, we rul ia i no spolem laef blong hem. Evriwan i gat wan memba blong famli, we oli bin kilimded olgeta. Nomata we oli bin go tru long plante samting, mi no save bilivim se oli save stanap mo gohed, mo hamas oli bin glad blong traem gogohed. Be biaen long fasin blong olgeta blong stanap mo gohed, plante oli no tingting gud abaot olgetawan. Plante oli filim se oli no impoten, o laef blong olgeta i i no gat bigfala praes.
Hem i bin gud tumas blong luk hao gospel blong Jisas Kraes i bin helpem olgeta blong oli gro mo jenis i kam gud. Taem oli stap faenemaot se oli gud tumas, mo tu, oli wan pikinini blong God, oli talem: “?Yu tru ia? ?Yu no pleiplei? Naoia, bae mi gat wan samting blong givim.”
Jos bambae i gro i kam bigwan long Kambodia. Plante pipol oli kam blong save Jos. Olgeta Sent longwe, oli ol paeonia, mo olgeta we oli rili akseptem gospel ia, oli kasem ol blesing long plante defren wei from se oli kam blong save huia i Sevya. Hem i rili wan gudfala samting.
Yumi gat plante memba mo ol strong wod raon long wan ples we oli singaotem “Doti Bighil,” we i wan open ples blong doti we ol pipol oli stap laef long hem. Ol memba long ples ia, oli stap pikimap ol samting. Oli mekem mane taem oli karem ol plastik mo aluminom long ples blong doti, mo oli mekem samting wetem. Oli laef long ol smol haos, mo mifala i bin go long ol haos ia plante taem.
Bob:
Wan dei, mifala i bin harem miusik i faerap mo mifala i luk se oli stanemap wan tenet i stap. Long Kambodia, hemia i minim se wan i stap mared, o wan i ded.
Lori:
Mifala i faenem se wan mama blong faef o sikis pikinini, i jes ded. Hasban i no stap. Ol pikinini oli wekap mo oli faenemaot se mama blong olgeta i ded.
Wan gel i stap kraekrae sloslo. Tru long wan transleta, hem i talem: “mi nao mi bigwan long olgeta. Mi gat evri brata mo sista ia. Mi no save wanem blong mekem.”
Mi karem hem insaed long han blong mi. ?I no posibol blong mi no holem hem? Gel ia i jes lusum mama blong hem. Mi toktok long hem long Inglis mo talem: “Mi no save sapos yu andastanem mi, be mi promes se bae yu luk mama blong yu bakegen. Bae yu oraet i stap. Bae yu no stap yuwan.”
Plante eksperiens olsem oli bin givim mifala wan spesel rilesensip wetem ol pipol long Kambodia.
Mifala i filim we oli lavem mifala tu. Ol pipol long Kambodia oli bin soem fasin we i kaen bigwan long mitufala. Mitufala i lavem olgeta from se oli ol pikinini blong God. Oli ol brata mo sista blong mifala.
Wetem sam pipol, mi tingbaot olgeta long tingting blong mi se: “Mi no save wet kasem taem mi luk yu bakegen long nekis laef; long tetaem ia nomo bae mi rere blong talem long yu olgeta samting we mi filim blong yu mo lav ia we mi gat long yu, mo wanem mi laekem abaot yu, from se mi no save talem naoia.”
Misin blong mifala i blesem mifala long plante wei. Sam pipol oli talem: “Mi no save se mi save go long wan misin o nogat. Mi no save lego ol apupikinini blong mi.” Mitufala i gat faef apuboe taem mitufala i aot; oli bin gat faef, fo, tri, tu mo wan yia. Tufala apugel, tufala i bon taem mitufala i stap long misin. Bae mi putum tufala misinari baj blong mi blong Kambodia misin i stap, mo givim long tufala bebi gel blong mi; olsem bae tufala i save se Bubuwoman i no bin stap from hem i stap mekem wanem we Lod i nidim hem blong mekem.
Bob:
I gat plante wei blong givim seves long Lod olsem ol misinari. Mifala i putum long hat blong mifala wanem Elda Jeffrey R. Holland i bin talem abaot senia misinari seves. Hem i talem: “Mi promesem yufala se bambae yufala i mekem ol samting, blong famli blong yufala, taem bae yufala i stap givim seves long Lod; ol samting ia, bambae yufala i neva save mekem sapos yufala i stap hom mo stap lukluk nomo long ol. Hem i wan bigfala presen we ol bubu oli save givim long laen blong olgeta, blong soem aksen mo tu talem: “!Insaed long famli ia, mifala i stap go long ol misin!” [“We Are All Enlisted,” Liahona, Nov. 2011, 46.]”