“!Hemia Nao!”
Richard J. Anderson
Yuta, YSA
Ol droing oli kam long John Kachik
Long wan winta naet, mi kasem haos i let afta we mi mekem sam intaviu olsem wan bisop. Mi taed bigwan. Wok i bin had blong plante wik, mo ol responsabiliti blong famli mo Jos oli mekem mi mas wokhad we i go bitim paoa blong mi.
Long naet ia, mi mas fiksim trak blong mi blong mekem se mi save go long wok long nekis moning. Mi jenisim klos blong mi, mo jenisim rol blong mi olsem bisop i go long hemia blong makanik. Mi stap ledaon long floa long garaj, andanit long trak mo stat wok. ?From wanem bae mi mas harem kolkol, mi taed, mo mi mas mekem fingga blong han i soa afta we mi wok had finis long ful dei ia? Mi harem se mi nomo save slo mo wet, mo mi stat wan prea blong komplen long Papa long Heven.
“?I posibol blong Yu yu helpem mi smol?” mi talem. “Mi strap traem bes blong stap wan gud papa, hasban, mo bisop mo blong laef folem ol komanmen. Yu no ting se bae mi givim moa gud seves sapos mi save spel smol? Plis, Yu helpem mi blong fiksim hemia blong mi save go long bed.”
Kwiktaem nomo, tu klia stret toktok oli kam long maen blong mi: “!Hemia nao!”
“?Wanem?” mi ansa.
Ol toktok ia oli kam bakegen: “!Hemia nao!”
Mi jes stat blong haremsave toktok ia long maen mo hat blong mi taem ol toktok ia oli kambak nambatri taem: “!Hemia nao!” Ol toktok ia oli tekem wan mesej i kam long spirit blong mi. “Hemia,” hem i laef long wol ia, mo mi stap gotru long wan taem blong mi gro, we i blong helpem mi blong kam wanem we Papa long Heven i wantem mi blong kam. I olsem se Spirit i talem long mi: “?Yu yu ting se wokbaot ia long wol ia bae i no gat ol taem we i had?” Taem mi girap long floa ia we i kolkol tumas, mi no wan semmak man.
Ol tes, i dipen nomo long wei we yumi fesem olgeta, be yumi save lukluk olgeta olsem ol presen we oli kam long wan Papa long Heven we i gat lav. Hem i givim yumi janis blong fesem ol tes blong yumi blong yumi save lan blong tanem yumi i go long Hem. Taem yumi mekem, bae yumi gat blesing blong lanem samting mo gro long saed blong spirit.
Ol tufala toktok ia we oli kam long maen blong mi long kolkol naet ia long simen floa blong garaj blong mi, oli bin blesem mi blong moa long 35 yia. Mi traehad blong meksua se mi no westem eni taem blong tes. Mi luk ol tes olsem ol janis blong lanem samting we bae mi no save lanem long wan narafala wei moa.