Stap Traem blong Gohed long Laef Afta Wan Prapa Nogud Taem

Long wan taem long laef, eli o afta, ol pikinini oli stap fesem wan prapa nogud taem, mo i save hapen kolosap long hom, o longwe. Be “iven taem wol i stap muvmuv raon long yumi, yumi save kasem blesing ia blong gat pis insaed long yumi.”¹ Wanem nao sam samting yu save mekem blong helpem ol pikinini blong filim kaen pis ia?

Fasin blong Stap Kwaet

Taem wan nogud samting i hapen, ol pikinini oli save filim se wol blong olgeta i no stap balens gud. Stap olsem wan eksampol blong fasin blong no stap muvmuv long olgeta. Toktok wetem kwaet fasin mo wetem tras abaot problem we i stap. Holemtaet wan evri dei fasin oltaem. Mekem evri samting we yu save mekem blong gohed blong gat famli haos naet, skripja stadi, prea, mo ol nara evri dei famli fasin. Wetem taem, ol pikinini oli save lanem se, iven we wol blong olgeta i stap seksek, gospel i tekem wan niu lukluk mo laef i stap gohed.

Fasin blong Gat Respek

Soem respek long pikinini long wanem filing hem i gat. Lisin long ol pikinini mo talem se yu luksave hao oli stap filim. Soem long olgeta se yu stap tingting hevi long ol wari blong olgeta. Givim sam spes long olgeta sapos oli nidim, be letem olgeta oli save se yu yu stap taem oli rere blong toktok. Ansarem ol kwestin wetem ones fasin taem oli askem, mo givim ansa we i go stret wetem yia blong olgeta. Talemaot longol pikinini blong yufala se oli save kam tokbaot ol fraet mo ol wari blong olgeta.

Fasin blong Lidim Wan

Ol pikinini oli save askem: “?From wanem God i letem ol nogud samting oli stap hapen?” Eksplenem se tufala samting ia, ol gud taem mo ol nogud taem, oli pat blong laef mo oli pat blong plan ia we i no save finis, blong God. Hem i letem wanwan man o woman blong i mekem joes blong olgeta, mo samtaem, ol pipol oli mekem ol joes we i no stret, we i mekem oli safa. Sam nara taem, ol prapa nogud taem oli kam be i no rong blong eniwan, be i jes pat blong laef long wol ia. I nomata wanem i stap hapen, Papa long Heven i stap olsem blong helpem yumi. Wetem help blong Hem, yumi save lanem samting mo yumi save gro, iven tru long ol eksperiens we i mekem yumi harem hat i soa tumas. Yumi save tanem yumi i go long Hem blong faenem pis.

Givim Paoa

Soem long ol pikinini se oli gat paoa blong mekem samting i defren taem yufala i stap givim olgeta wan wei blong givhan. Eksampol. Oli save kolektem ol donesen blong givim long ol viktim blong ol disasta; oli save visitim wan fren we i sik o i kasem kil mo stap long hospital; oli save mekem wan i smael afta we hem i lusum wan memba blong famli; o hem i save prea from olgeta we oli stap gat hadtaem. Yumi no save stretem evri samting, be yumi gat paoa blong mekem plante gud samting, mo “yumi wok from pis long eni taem we yumi stap help blong karemaot safaring blong wan narawan.”²

Kamfot

Mekem ol pikinini blong yufala oli tingbaot se God i stap lavem olgeta, mo we yufala i stap lavem olgeta tu. Yufala i no givim ol giaman promes, no talem se bae i no gat wan nogud samting bae i hapen long olgeta, be talem gud long olgeta se oli stap sef naoia, mo bae yu mekem evri samting blong save protektem olgeta. Talem gud long olgeta bakegen se Papa long Heven bae i helpem olgeta blong gotru long eni tes we i kam long rod blong olgeta.

Taem yu faenem se hat blong yu i no fil gud from samting we i kam agensem yu, tingbaot se, long en, bae gud i win ova long ivel. “Yumi stap faetem wan wo agensem sin, … be yumi no mas lusum hop,” Presiden Thomas S. Monson (1927–2018) i tijim. “Hem i wan wo we yumi save winim, mo bae yumi winim. Papa blong yumi long Heven i givim yumi ol tul we yumi nidim blong mekem olsem. Hem i stap long stia. Yumi no gat fraet.”³