Bae Mi Luk Hem Bakegen

I Kam long Reyna I. Aburto

Seken Kaonsela long Jeneral Presidensi blong Rilif Sosaeti

Mi groap long Nikaragwa. Taem mi smol, mi mekem evri samting wetem bigfala brata blong mi. Mitufala i go long skul tugeta. Mitufala i go long stoa tugeta. Mitufala i stap gat eni kaen pleplei long yad blong mifala. Mitufala i hapi.

Afta, taem mi gat naen yia, wan nogud samting i hapen. Brata blong mi i ded long wan etkwek. Long fas taem, mi no filim se hem i go. Mi stap tingting se bae hem i kam noknok long doa blong haos. Se bae hem i kam talem se hem i go samples. Bae mi stap mo stap lukluk i go long doa blong longtaem, mi wantem se bae i mas hapen. Mi wantem tumas blong luk hem bakegen.

Wetem taem, ol samting oli kam isi smol. Mi stil misim brata blong mi, be mi save filim hapi bakegen.

Long tetaem ia, mi no wan memba blong Jos blong Jisas Kraes blong Ol Lata-dei Sent. Be mi bin groap, mo mi bin lanem abaot jos mo mi kasem baptaes. Wan dei, mi bin stap wasem ol plet. Hem i Ista taem. Mi bin stap tingting long Laef Bakegen long Ded mo mi tingting i go long brata blong mi.

Kwiktaem, wan filing i kavremap mi. Mi stap tingting long dei drim we mi bin gat long brata blong mi. !Mi bin luksave se i no wan nogud samting nating! Hemia i kam long Tabu Spirit, blong i leftemap tingting mo gaedem mi. Sam dei, bae brata blong mi bae i laef bakegen long ded. Mi rili wantem blong luk hem bakegen.

Sapos wan we yu lavem i ded, hem i oraet blong misim olgeta mo filim nogud smol. Toktok wetem famli blong yu, o wan we i bigwan taem yu rere from. Prea long Papa long Heven mo talem filing blong yu. Hem i save helpem yu blong filim pis bakegen.

I nomata wanem, tingbaot se Jisas Kraes i lavem yu. Long Ista taem, yumi stap tingbaot sakrifaes we Hem i mekem blong yumi. From Hem, yumi evriwan bae i laef bakegen long ded, mo yumi save laef wetem ol famli blong yumi blong oltaem.

Ol Harem Gud Kad

Katemaot ol kad ia. Yu save foldem olgeta long haf mo yusum olgeta blong makem pej blong buk. Putum i stap insaed long ol skripja blong yu, insaed long wan nara ples blong yu luk olgeta taem yu filim se yu no hapi, yu stap yuwan, o yu fraet.

“Taem mi mi aot long yufala, mi no save lego yufala i stap nomo olsem. Bambae mi mi save kambak bakegen long yufala.”

Jon 14:18

“[Mo God bambae i waepemaot] evri wota long ae blong olgeta.”

Revelesen 21:4.

“Yufala i stap glad, mo yufala i no fraet, from we mi Lod, mi stap wetem yufala, mo bae mi stanap wetem yufala.”

Doktrin mo Ol Kavenan 68:6.