Ol Yang Adalt
?God i Stap Helpem Mi o Nogat?
Laef blong yumi, oli fulap long ol bigfala joes: rod blong wanem kaen wok blong tekem, huia blong maredem, weaples blong go long skul long hem, mo ol narawan moa. Laef blong yumi oli fulap tu long evri dei wari: stap jusum bes wei blong yusum taem, traem blong andastanem doktrin, mo faenem pis long medel blong ol tes. Afta evri samting, yumi nidim revelesen we i blong yumiwan nomo. Be samtaem, i had blong save olsem wanem blong kasem kaen revelesen ia, mo olsem wanem blong luksave taem yumi kasem. Taem yumi no stap kasem ansa, o no stap luksave ol ansa, bae yumi save askem yumiwan bakegen: “?Hemia Hem i Spirit, o i jes tingting blong mi nomo?” “?From wanem nao mi filim insperesen blong mekem hemia, be afta, i no wokaot?” “?From wanem mi filim olsem se God i no stap ansarem ol prea blong mi?”
I gud we, insaed long atikol ia, “Mekem Ol Desisen: Fridom blong Mekem Joes o Revelesen,” long pej 44, Erin i serem stori blong hem abaot fasin blong kasem revelesen we i blong hemwan nomo long wan taem we hem i mas mekem wan desisen we bae i jenisim laef blong hem. Wanem we i stap, i we, God i wantem lidim yumi, be tu, Hem i wantem helpem yumi blong lanem blong dipen long fridom blong yumi blong mekem ol gudfala joes.
Blong stap lanem olsem wanem Tabu Spirit i stap toktok long yu stret, hemia i wan nara impoten pat blong kasem mo luksave revelesen. Hem i defren long wanwan long yumi. Long pej 48, plante yang adalt oli stap serem olsem wanem oli kasem revelesen.
Long wan atikol we i kamaot onlaen nomo, Aspen i eksplenem se revelesen we i blong yuwan nomo i nidim blong yu “Stap Mekem Ol Masel blong Spirit blong Yu Oli Wok.”
Blong stap tingting long fiuja, hem i wan bigfala samting we i save mekem tu se yu fraet. Speseli taem yu wan yang adalt. Be taem mi tingbaot olsem wanem God i bin lidim laef blong mi bifo finis i kam, hemia i givim strong paoa long tingting blong mi blong mi muv i go fored mo mi tekem aksen, mo mi trastem se bambae Hem i gohed blong lidim mi taem mi nidim folem rod ia.
Wetem tru hat,
Katie Sue Embley