Dijitol Nomo
Joes: ?Blong Kam Wan Bigfala Artis, o Wan Gudgudfala Mama?
Evriwan i talem long mi se i no posibol blong kam gud long tufala samting ia. ?Be i tru o no?
Mi tingbaot se mi no fil gud nating, long yunivesiti, taem mi lanem abaot laef blong ol bigfala artis. I luk olsem se ol gudfala artis we man i save tingbaot olgeta, oli kam ol bigfala artis from se oli lego famli blong olgeta i stap, mo oli sakrifaesem gud tingting blong olgeta. Ol bigfala artis oli stap peint long moning blong Krismes taem we pikinini blong olgeta i stap openem ol presen. Wan i mared sikis taem. Wan narawan i katemaot sora blong hem mo i sendem i go long famli blong hem. !Wan narawan i kilimded wan nara man! Mi stat blong tingting se, blong kam wan bigfala artis, mo semtaem stap olsem wan gudfala waef mo mama (!mo semtaem kipim gud tingting i stap!), ?bae i posibol o no?
Ol profesa blong mi oli tijim se sapos yumi rili wantem kam nambawan olgeta, yumi mas mekem sam sakrifaes from. Bae yumi mas wokhad moa i bitim ol narafala man. Bae yumi mas putum art i kam faswan long laef blong yumi. Maen blong mi, plante taem i askem kwestin ia: “Be sapos wan artis i obei long ol komanmen, i putum ol fas samting oli kam fastaem, mo i gat Spirit blong Lod i stap blong lidim wok blong olgeta, ?bae oli save kam gud mo ating bae oli kam nambawan olgeta?” Kwestin ia i stap wetem mi truaot long ol taem we mi bin stap stadi.
Taem we hasban blong mi mo mi i graduet, mitufala i bin mared wan yia finis. Elda Russel M. Nelson (long tetaem ia, hem i wan memba blong Kworom blong Olgeta Twelef Aposol) i bin kam blong toktok long graduesen blong mifala. Wan smol kaekae i folem, mo i gat 16 studen nomo we oli invaetem blong go long hem. Mi sapraes we oli bin jusum hasban blong mi mo mi. Taem we taem blong askem kwestin mo kasem ansa i kam, Mi leftemap han blong mi, mi lukluk Elda Nelson stret long ae blong hem, mo talemaot wari blong mi blong stap, tugeta, wan artis mo wan mama. Mi bin wokhad blong bildimap ol talen blong mi long skul, mo mi bin wantem blong gohed blong wokhad mo kam antap moa, be tu, mi bin save se blong stap olsem wan mama bae i kam faswan. ?I gat wan wei blong mekem tufala tugeta? Ae blong Elda Nelson i saen, mo hem i ansa: “”!Be Yes!” Hem i leftemap tingting blong mi blong kam antap long ol talen blong mi, mo blong prea long Papa long Heven blong kasem help blong save hao mi save mekem tugeta samting ia, mo bae wetem Hem, bae mi save mekem olgeta samting we mi bin ting se i no posibol blong mekem. Mi putum advaes ia long hat blong mi.
Wan Komitmen we I Stap long Ol Stamba Tingting blong Hem
Hasban blong mi mo mi, i gat fo pikinini naoia. Mitufala i bin lanem danis ia mo holemtaet fasin blong stap olsem papa mo mama. Long stat, mi statem dei blong mi long 4 klok moning, blong mi peint bifo ol pikinini blong mi oli wekap. Mi traem blong peint sikis dei long wan wik, iven sapos mi save peint 30 minit nomo long wan dei. Evri taem mi peint, mi stat wetem wan prea, from mi save se mi nating sapos mi no gat help blong Lod. Mi no prea nomo blong mi gat paoa long art blong mi, be tu, blong mi save wanem i moa impoten long dei ia, mo mi komitim mi blong putum ol stamba tingting blong Hem oli kam faswan. Progres i no hapen kwiktaem, be i kam sloslo evri taem.
Stat long graduesen blong mi i go fored 12 yia afta; Mi bin gat wan taem we tingting i slak. I olsem se laef i gat fulap samting blong mekem. Blong stap olsem mama i bin gat fulap moa jalenj bitim we mi bin stap tingting long hem. Mi sidaon long fored blong wud we i holem peinting blong mi, mi stap krae; mi stap askem miwan sapos bae mi kam bigfala artis ia we mi bin stap drim long hem. Mi bin filim strong long tingting blong go pulumaot jenol blong mi antap long sef, mo mi tanem long pej ia long 30 Epril 2006, dei ia afta we mi graduet. !Mi fogetem gudfala eksperiens ia we mi bin gat wetem Presiden Nelson! Long sam wei, waelwin blong laef ia i klosap waepemaot memori blong mi. Long fored blong mi, ol toktok ia oli stap, we oli kam long hem we i profet tedei: “!Be Yes!” Wota blong ae ia i tanem i kam krae blong talem tangkyu taem mi lukluk i gobak long evri samting we mi bin save mekem stat long tetaem ia i kam, mo tu, mi bin lukluk i go fored wetem hop.
Mekem Samting we I No Posibol
Sam manis afta, mi kasem wan telefon kol long wan long olgeta disaena blong magasin, Ensign, mo oli bin askem sapos oli save yusum wan long ol peinting blong mi long insaed kova blong Novemba 2018 namba blong Jeneral Konfrens. !Mi sek wantem! Taem mi bin stap groap, fas samting we oltaem mi mekem taem mi kasem ol magasin blong Jos, hem i blong lukaotem ol peinting insaed. !Naoia, wan peinting blong mi bae i stap insaed! Afta long hemia, oli talem se oli wantem joenem peinting blong mi wetem ol toktok blong Presiden Nelson; nao mi save luk han blong God we i stap leftemap tingting blong mi i go fored.
Mi stil gat wan longfala wokbaot blong go long hem long rod blong mi olsem wan artis, be mi talem tangkyu tumas from hop blong Presiden Nelson we hem i gat long Lod mo long yumi. Mi mi talem tangkyu from gudfala tingting blong hem mo tras blong hem. Mi save se, taem yumi praktisim fet long Lod, bambae yumi save mekem ol bigfala samting, iven ol samting we, long wan taem, yumi bin ting se i no posibol blong mekem. “I no gat wan samting we i strong tumas, we God i no save mekem” (Luk 1:37)