Bae Wan Hariken I No Save Stopem Mifala

Koraima Santiago de Jesus

San Ruan, Pueto Riko

I no longtaem afta we mi kambak long misin blong mi, mi kasem wan invitesen blong go long wan danis. Long danis ia, mi putum fon blong mi samples, mo wan yang man i kam talem se bae i helpem mi blong faenem fon. Taem mitufala i stap storian, mitufala i faenemaot se mitufala i riten misinari mo mitufala i gat plante semfala aedia mo gol.

Rilesensip blong mitufala i gohed blong gro, mo mitufala i promes blong kasem mared. Drim blong mitufala blong sil insaed long Wasington D.K. Tempol bifo hem i klos blong oli mekemgud bakegen long Maj 2018. Be afta we mitufala i mekem desisen ia, mitufala i fesem wan tes. Faswan, mi lusum wok blong mi, mo mi no gat wan mane i stap blong pem rod blong mitufala i go long tempol. Nekiswan, wan hariken i stap long rod blong kasem Pueto Riko, jes bifo dei blong mared blong mitufala.

Taem Hariken Maria i kasem mifala, i prapa spolem naes aelan blong mifala. Ol stoa oli klos. Mifala i nomo gat lektrisiti, wota mo kaekae, mo ol nara besik samting oli kam had blong faenem. Mitufala i lusum evri samting we mitufala i plan from blong mared blong mitufala. Mitufala i mas kanselem lafet, mo i luk olsem se bae mitufala i mas kanselem mared tu. Blong travel i go kam long Pueto Riko, i no isi, i no gat tumas plen, mo mifala i no save se bae i go kasem wetaem. Mi stat blong slakem tingting, mo mi fulap long tu tingting mo mi konfius.

Wan naet, fiuja waef mo mi i tokbaot situesen blong mitufala. Blong travel, i no sua, mo bae mitufala i no gat lafet, o klos blong mared, be Spirit i konfemem long mitufala se mitufala i mas trastem Lod. Samting we i moa impoten i blong mitufala i bin sil long tempol. Mitufala i prea long Papa long Heven blong kasem help.

Taem plen i save flae i go aot long Pueto Riko, mitufala i mas mekem niu plan, mo jenisim deit blong siling. Blong plante wik, afta long hariken, i no gat rod blong toktok i go aotsaed, be mobaelfon blong wan fren i wok. Hem i letem mitufala i kontaktem tempol. !Mifala i bin save arenjem evri samting blong mitufala i save sil! Sam wik bifo trip blong mitufala, ol memba blong famli mo ol fren oli givim ol sus, mo ol klos, mo oli helpem mitufala blong kasem ol samting from mared blong mitufala.

Nao mitufala i go insaed long tempol, mitufala i lego evri wari i stap biaen. Mitufala i holem han blong mitufala blong statem fiuja blong mitufala tugeta. Mi save talem se mi bin filim tru han blong Lod we i lidim mo i talem gud bakegen long mitufala se, sapos mitufala i stap gohed blong trastem Hem, bae evri samting bae i oraet. Tedei, mitufala i gat blesing blong gat wan naes boe, mo mifala i wan famli we i sil blong ful taem we i no save finis.