Laef I Wan Longfala Resis
Olgeta yangfala Lata-dei Sent ia oli stap laef tedei long ples ia we Aposol Pol i bin stap laef long hem long taem blong Niu Testeman. Mo oli stap laef folem ol toktok blong hem.
“Mi bin lanem se gospel i semmak long evri ples. Taem mi bin laef ovasi, mi bin lanem blong lukluk plante long ol trutok blong gospel, mo blong filim Spirit, i no blong kalja i pulumaot tingting blong mi.”—Bryana W., 15 yia
“Mi raetem toktok ia, tingbaot, long mira blong mi blong mi tingbaot evri samting we i bin hapen long yia ia: BYKS, Yang Woman Kamp, seminari. Hemia i helpem mi blong tingbaot se mi kam wea.”—Marie H., 17 yia
“Mi save se taem mi go long seminari, mi save harem gud from se mi save se mi stap mekem wanem mi nidim blong mekem, mo mi save se evri samting bae i oraet.”—Lizzie T., 17 yia
Loukia c, 15 yia, i serem testemoni blong hem blong fas taem long Yang Woman Kamp, mo afta, hem i kasem baptaes.
“Bes pat blong BYKS i ol spot, danis, mo ol grup miting we oli ol moning divosen mo riviu. Hemia i bin helpem mi blong mi stap help moa, mo gat fasin blong save wet longtaem, mo blong laekem moa ol skripja.”—Haig T., 14 yia
“Long BYSK, mifala i stat blong kam wan grup, mo i mekem mifala i kam strong moa. Hem i bin help blong sepem mo lidim yut program long Gris from se naoia, mifala i save mifala i gud moa.”—Alexis H., 18 yia
“Blong singsing antap long stej long BYKS, i wan long ol samting we i nidim fulap strong paoa long tingting; mo mi mekem hemia mo i bin wan long ol majik taem we mi bin gat. Naoia i stap, mi bin lanem hamas yumi impoten insaed long naes wol ia.”—Irini S., 17 yia
“Long Yang Woman Kamp, mi bin lanem se laef i olsem wan longfala resis ia we oli singaotem maraton. Hem i helpem mi blong gro long fet blong mi blong save se yumi mas gohed long stret rod, semmak nomo olsem we taem yumi stap ron long wan maraton. Eksperiens ia i helpem mi blong gro long testemoni blong mi, mo blong gohed blong gat fet mo stap long stret rod.”—Winifred K., 14 yia
“Mi rili laekem blong luk se i olsem wanem blong stap raon long ol yut mifala i gat ol semmak bilif. Mi bin filim se mifala evriwan i joen long wan spesel wei, i moa bitim blong jes save nem blong mifala.”—Pavlos K., 15 yia
“Mi glad se mi gat janis ia blong mit wetem ol nara yut we oli stap gotru long ol sem samting we mi stap mekem evri dei.”—Pavlos K., 15 yia
“Long BYKS mo Yang Woman Kamp, yumi gat ol semmak filing, i nomata weaples yu go long hem long wol ia. Mi bin laekem smol grup blong Yang Woman Kamp from se i isi blong save wanwan long mifala.”—Pavlos K., 15 yia
“Mi mi no wan memba blong Jos, be mi stap kam evri wik we mi save kam. Mi laekem tumas wanem we ol yang woman oli stap stanap from.”—Irene C., 14 yia
Sam manis i pas, wan seminari klas i hapen long hil ia, Mars, kolosap long Aten long Gris, ples ia we Aposol Pol i bin givim wan toktok we i gat paoa long hem (luk long Ol Wok 17:22–34). Ol studen oli tokbaot olsem wanem seminari i gat paoa insaed long laef blong olgeta, mo i tekem tu ol tijing blong Pol.
“Blong stap laef long Gris i mekem se Niu Testeman i kam laef,” Alexis H, we i gat 18 yia i talem. “Papa blong mi i laekem blong go long ol defren olfala ples we Pol i bin tij long hem, mo bae i serem wan skripja, o talem wan stori abaot ples ia we wan samting i bin hapen long hem.”
Semmak olsem we Pol i bin fesem ol jalenj long taem blong hem, ol yut long Gris tu oli stap fesem ol problem long saed blong sosaeti, politik, mo mane. Ol yut konfrens mo ol kamp blong ol Yang Woman oli no ol samting we oli hapen oltaem long Gris, mo tu, blong go long seminari i wan had samting blong i tekples. Nomata long olgeta jalenj ia mo samfala moa, ol yut long Gris oli praktisim gudfala toktok blong Pol blong “[oli] gat wan tingting nomo, [oli] stap stanap strong, nao [oli] stap wok olsem wan tim nomo, blong traehad blong mekem ol man oli bilif long gud nius.” (Filipae 1:27).
Blong stap laef long Gris i minim se ol yangfala memba ia oli gat ples we i hot, ol solwota, kaekae mo danis. Oli laekem tu blong kam tugeta. From oli stap mit long seminari mo ol aktiviti blong branj, oli kam strong moa long fet mo frensip blong olgeta.
Seminari long Hil Mars
Seminari grup long fored blong mitinghaos blong Aten.
Leeann Heder i glad blong serem ol foto
Taem seminari i sat long Gris sam yia i pas, i gat faef studen nomo. Oli mit tri moning long wan wik, mo sam oli joen onlaen long vidio konfrens. Oli mit tu long ol Wenesdei aftenun blong gat seminari, mo afta i gat aktiviti. Oli kam kolosap long olgeta mo oli kam wan laet long ol fren blong olgeta, we oli bin luk eksampol blong olgeta. Taem fren blong olgeta i askem ol kwestin, ol yut oli tekem olgeta oli kam long seminari mo ol aktiviti blong Miutuol.
Wan yang man, Pavlos K, we i gat 15 yia, i talem: “Blong stap go long seminari i wan gudfala wei blong statem dei, mo i stap helpem mi blong stap strong. Hem i mekem se maen blong mi i gat strong tingting blong stap wan eksampol long ol narawan. Hem i helpem mi blong statem dei wetem tingting i stap long Jisas Kraes.”
Taem ol yut ia oli stap gro long paoa mo yuniti, ol blesing mo ol janis tu oli stap kam. Eksampol. Long 2017, oli bin gat blesing ia blong go long Blong Ol Yut Oli Kam Strong (BYKS o FSY), we i wan bigfala yut konfrens blong rijin. Ol yang woman tu oli tekpat long fasfala Yang Woman kamp long Gris. Long en, oli gro oli kam kolkolosap long olgeta olsem wan grup, mo tu yang woman i kam joenem Jos.
Intanasonol BYKS Konfrens
Long KYKS konfrens, we stap spelem toktok ia “Askem” we i stap long Jemes 1:5
Konfrens ia, we oli bin holem long long Jemani, i tekem tugeta ol yangfala Lata-dei Sent raon long Yurop. Ol yut blong Gris mo Saepres oli travel plante kilometa, mo eksperiens blong konfrens i bin tajem olgeta bigwan. Long Maximos A, we i gat 14 yia, “samting we bae i stap long memori blong mi long BYKS, i taem ia we mifala i bin serem ol testemoni blong mifala. Evriwan i bin filim Spirit, mo i givim insperesen long mi blong developem testemoni blong miwan bakegen.”
“Long fas taem, i gat fo yut nomo oli stap go,” Loukia C, 15 yia i talem; “be long en, mifala 15 i go—hemia wan top rekod blong Gris—mo i bin gat 3 fren we oli no memba.
“I bin naes blong stap tugeta samples we yu serem semfala gospel ia, mo yu no defren long ol narawan. Mifala evriwan i stap tugeta, mo mifala i stap filim semfala Spirit. Olgeta samting ia oli bin helpem mi.”
“Papa blong mi i no wan memba mo bae i no letem mi blong go long BYKS, o kasem baptaes,” Jesiana, 16 yia, i talem. “Be ol memba blong branj oli bin livim kakae from mi, mo bubuwoman blong mi i toktok long papa blong mi. Afta long hemia, !hem i talem se mi save go!”
Long BYKS, hem i mekem plante samting blong fas taem, olsem, “blong tekpat long ol lesen mo ol aktiviti, mo talem testemoni blong mi i bin helpem mi blong andastanem se hem i wanem stret blong filim Tabu Spirit. Mi neva bin filim Spirit olsem bifo, mo mi bin hapi tumas mo mi glad tumas. Mi talem testemoni blong mi blong fas taem.”
Antap long kaekae long saed blong spirit, ol yut oli bin save tekem spel mo gat gud taem tugeta long konfrens. Haig T., 14, i aot long Saepres mo i go long konfrens. Mi lanem blong mi miks moa, blong gat ol ril fren, mo blong gat gud taem iven long ol hadtaem.”
Yang Woman Kamp
Ol yang woman long Maraton, Gris.
Yang Woman kamp i mekem semmak samting. Twelef yang woman oli bin mit wetem ol lida blong olgeta kolosap long ol ples blong bifo we oli mekem Longfala Resis ia, Maraton. Oli spendem tri dei tugeta, oli lanem olsem wanem blong dipen long wanwan long olgeta blong gat moa paoa mo stap leftemap tingting blong olgeta.
Loukia i talem: “Taem mi bin gat 12 yia, mi go long jos blong fas taem mo mi bin hapi tumas, be afta, mi luksave se mi mi miwan nomo we mi gat 12 yia. Naoia, tu yia afta, i gat fulap yang woman, mekem se, blong fas taem, mifala i save gat Yang Woman Kamp.” Hem i talem se: “Taem mifala i mit tugeta, mi luksave se i minim wanem blong stap wan Lata-dei Sent. Taem yumi stap laef folem gospel, wan laet i raonem yumi.”
Yang Woman Kamp, 2017—faswan we i tekem ples long Gris.
Long Bryana W., 15 yia, BYKS mo Yang Woman Kamp oli bin helpem hem blong nomo fraet mo toktok wetem ol narawan. “Famli blong mi i stap muv fulap, mo mi gat hadtaem blong joen gud wetem ol narawan from se mi semsem,” hem i talem. “Be from se mi kam kolosap long grup blong mifala long BYKS, mi gat sam gudgudfala fren. Long taem blong testemoni miting, mifala i serem ol filing blong mifala, mo mi luksave se ol narawan oli filim semmak olsem mi.”
Marie H., 17 yia, i tingbaot stamba toktok blong kamp, “Laef i wan longfala resis, i no wan sot kwik resis.” Ol yang woman mo ol lida blong olgeta oli stap toktok raon long hamas i impoten blong stap strong mo finisim resis ia, hem i talem. “I rimaenem mi se mi save stap strong, folem spid blong mi, mo stap lukluk nomo i go long finis laen. Afta, mi save mekem ol samting we Papa long Heven i nidim mi blong mekem.”
“Lukluk san i girap i tekem wan spirit we i kwaet mo i naes.”—Lizzie T.
Wan long ol haelaet blong kamp i wan divosen long taem san i girap, long solwota long las moning. Lizzie T., 17 yia, i talem: “Mifala i tekem ol skripja, gat divosen, mo lukluk san i girap. Mifala evriwan i filim lav blong God. Hem i wan gudfala samting blong endem taem ia we mifala i bin spenem tugeta.”
No Fraet blong Fesem Fiuja
Irini S, 17 yia i talem: “Aot long BYSK mo Yang Woman Kamp, mi bin lanem fulap samting abaot gospel mo olsem wanem nao hem i save helpem mi long laef blong mi. Mi winim plante fren mo lanem hamas i impoten blong talemaot ol tingting mo ol filing blong mi. Mi filim Tabu Spirit mo lav blong Sevya blong yumi, Jisas Kraes, dip insaed long hat blong mi.”
Blong stap raon wetem ol Lata-dei Sent yut, hem i talem, i mekem mi gat moa tras long miwan. “Bifo long BYKS, mi no bin save luk ol gudfala mo naes samting we God i bin mekem blong yumi, mo tu, ol plan we Hem i stap mekem yet blong yumi.”
Manasseh A., 17 yia, i talem: “Yumi no mas letem wan man o wan samting raon long yumi i traem blong pulumaot yumi blong stap laef folem gospel. Gospel i semmak long evri ples mo yumi mas traem, oltaem, blong stap long stret rod.”
Mo i nomata se hem i long Gris o wan nara ples long wol, blong wokbaot tugeta long rod ia i mekem se bae yumi wan long spirit.