Wei we I Moa Bigwan we God I Soemaot Lav blong Hem

I Kam long Presiden M. Russell Ballard

Akting Presiden blong Kworom blong Olgeta Twelef Aposol

I kam long wan toktok blong jeneral konfrens blong Epril 1988.

God i soemaot lav we Hem i gat long yumi taem Hem i givim help we yumi nidim blong progres mo kasem evri tabu paoa we yumi sapos blong kasem. Hem, we i save plante samting abaot yumi, wanem paoa yumi save kasem mo ol janis we oli no save finis we yumi save kasem, i bin givim long yumi wan tabu advaes mo ol komanmen insaed long ol buk blong instraksen blong Hem—ol buk ia oli ol tabu skripja. Taem yumi andastanem mo stap folem olgeta instraksen ia, laef blong yumi i gat wan stamba tingting mo mining. Yumi lanem se Man we i Mekem yumi, i lavem yumi mo i wantem se yumi stap hapi. Blong soemaot tabu lav we Hem i gat long yumi, Hem i sendem Wan Stret Pikinini Ia Nomo blong Hem, Jisas Kraes.

“God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis”

“God i no sanem mi, mi Pikinini blong hem, mi kam long wol ya blong mi jajem ol man long wol. Hem i sanem mi blong mi wok blong hem blong mekem rod blong sevem olgeta” (Jon 3:16–17).

Jisas i bon i kam long laef ia long wol. Hem i gat wan laef we i stret evriwan, mo from Hem i mekem hemia, Hem makem rod ia i stap blong yumi folem. Jisas Kraes i bin tijim ol disaepol blong Hem: “Mi nao, mi olsem laet blong ol man long wol. Man we i biaen long mi, bambae hem i no save wokbaot long tudak. Hem bambae i gat laet blong laef.” (Jon 8:12).

Yumi save stat blong andastanem hamas nao Kraes i lavem yumi taem yumi tekem se Hem i bin glad blong pem praes, mo blong safa from ol sin blong yumi, we i mekem Hem i safa tumas, “Hem we i hae long evriwan, i seksek from soa long bodi, mo blad blong Hem i ronaot long evri hol blong skin blong Hem, mo Hem i safa tugeta long bodi mo long spirit” (Doktrin mo Ol Kavenan 19:18).

Long Ista taem ia, bambae yumi talem spesel tangkyu i go long God from Atonmen mo from Laef Bakegen long Ded blong Pikinini blong Hem we Hem i Lavem Tumas, we i Jisas Kraes. From se Hem, long Hem, mo tru long Hem, laef ia long wol i save kam wan laef we i stap oltaem, we i stret evriwan, mo toktok i no save talemaot glad ia blong yumi.

Evri gud samting long wol ia, oli smol pat blong bigfala Tabu paoa blong Hem mo wei we Hem i soemaot lav blong Hem long yumi. Be yet, merikel ia we i moa bigwan long olgeta merikel, i stap yet blong i kam. Bae hem i hapen taem we, tru long paoa blong Hem, bambae yumi girap long ded mo gref, yumi laef long wan niu wol we bambae i no save ded samtaem; long ples ia, sapos yumi klin inaf, bambae yumi stap wetem Hem mo Papa blong yumi long Heven blong oltaem mo oltaem.