Revelesen we i blong Yuwan Nomo

?Olsem wanem yu save talem wanem i defren bitwin revelesen mo ol stret tingting blong yuwan nomo?

Yumi stap laef long wan wol we i gat fulap janis i stap. Mifala i gat fridom blong jusum wanem kaen wok, wanem skul, wijwan hasban o waef, o weaples mifala i wantem stap long hem, mo plante moa samting. I tru, hemia i wan blesing blong jeneresen blong yumi. Be long nara han, i mekem se joes i kam had moa from se i had blong mekem ol joes taem i gat fulap rod i stap mo fulap janis i stap we oli stap lidim man blong mekem ol gud samting. ?Olsem wanem yumi jusum raet taem we i gat fulap janis we oli stap, we oli gud? Taem yu filim se yu lus mo yu konfius long strong win ia blong mekem ol desisen, yu mas save se Papa long Heven i wantem lidim yu. Yu save jusum stret rod mo karem ol ansa we yu stap lukaotem sapos yu stap folem voes blong Hem. Luksave olsem wanem Hem i stap toktok long yu, trastem Hem, folem profet, gat longfala tingting, gat moa hop, mo gat fet, mo long en, bambae Hem i lidim yu long stret daereksen.

—Vira Vashchenko, Kyiv, Yukren

Truaot long laef blong mi, mi bin luk olsem wanem Lod i bin lidim mi, mo mi luksave se evri samting we mi bin kasem, i from Hem mo from Hem i bin lidim mi. Iven long ol taem we mi bin stap tingting se mi stap wokbaot miwan, Hem i bin letem mi save mo filim se Hem i stap ia wetem mi. From hemia nao mi bin mekem desisen blong gohed blong muv fored oltaem wetem fet, iven taem mi filim se mi stap wokbaot miwan. Long mi, rod blong mi i no klia oltaem, mo mi no save luk oltaem ol samting we oli stap long fored blong mi long fiuja; be oltaem, mi tekem ol step blong fet, mo afta, mi stat blong luk laet mo luksave han blong God insaed long laef blong mi. Mi save se Papa blong yumi long Heven, mo Pikinini blong Hem, Jisas Kraes, Tufala i lavem yumi mo Tufala i wantem blong lidim yumi; be tu, Tufala i wantem luk se yumi putum fet blong yumi i stap long Tufala, mo yumi tekem aksen taem yumi kasem ol kwaet toktok we oli kam long Spirit.

—Indhira Mejia, Dominik Ripablik

Taem mi stap gro mi kam olfala, mi bin lanem lanwis blong Spirit. Spirit i toktok long mi tru long ol simpol tingting. Mi bin nidim blong praktis blong save kam blong save gud Hem, be plante taem, Spirit i kam long mi long ol kwaet ples, olsem taem mi stap draev i go long wok, insaed long trak blong mi. Mi save se i no ol tingting blong mi, from se, plante taem bae Spirit i jiam i kam taem mi no stap tingting long topik we Hem i toktok long mi from.

—Clarissa Mae Taylor, Yuta, YSA

Mi ting se wan long ol wei we i moa fit we yumi mas save gud hao blong yusum, hem i blong luksave ol kwaet toktok blong Tabu Spirit. Fasin blong stap strong blong stap mekem skripja stadi i bin pusum mi blong mi lanem gud hemia. Oltaem mi stap biliv se man we i lukaotem wetem wan strong tingting, bambae i faenem; mo ol sikret blong God bae oli kamkamaot long fored blong hem tru long paoa blong Tabu Spirit (luk long 1 Nifae 10:19). Long nara toktok, sapos mi wantem luksave Spirit, mi no save letem mi i go blong gat ol krangke tingting, o ol tumas wari blong laef, be, mi mas daeva insaed long wok mo fogetem miwan. Bae mi mekem hemia i gud moa from se bae mi save luksave o haremsave Spirit moa, !from se mi rere from! Long semfala wei ia we wan sip i no save ron gud tru long strong win, yumi, bae yumi no save harem Spirit sapos yumi draon long ol evri dei samting blong laef we yumi no save stap kontrolem.

—Emmanuel Borngreat Dogbey, Akra, Gana

Long smol famli blong yumi, yumi luksave Spirit from pis ia we yumi stap filim, speseli hasban blong mi mo mi, olsem wan kapol. Taem hem i ol tingting blong mitufala nomo, mitufala i neva save filim se hem i raet samting—i gat wan fraet o tu tingting i slip i stap. Be taem hem i revelesen, oltaem mitufala i filim pis, iven sapos mitufala i stap mekem eskius, mo ol samting oli no luk se i stret long fas ples. Taem mitufala i stap folem, mo mekem i gotru, nao oltaem mitufala i luk ol samting oli foldaon long stret ples mo evri samting i wokaot gud. Tetaem ia nao bae mitufala i lukluk mitufala, mo talem: “!O, naoia nao i luk se i stret!”

—Maryana Wright, Yuta, YSA

I nomata se yumi evriwan i kasem revelesen we i blong yumiwan long ol defren wei, wan samting we i tru nomo i stap, i we: God i stap toktok long yumi plante taem. Yumi jes nid blong wantem traehad blong kam antap long paoa blong yumi blong luksave mo haremsave voes blong Hem. Olsem we Presiden Russel M. Nelson i givim kaonsel long yumi: “Prea long nem blong Jisas Kraes abaot ol wari blong yu, ol fraet blong yu, ol wiknes blong yu—yes ol samting we i hevi long hat blong yu. !Mo afta, yu lisin! Raetemdaon ol tingting we oli kam long maen blong yu. Raetemdaon ol filing blong yu, mo folem wetem ol aksen we Spirit i talem yu blong mekem. Taem yu stap ripitim wei ia dei afta dei, manis afta manis, yia afta yia, bambae yu ‘gro long prinsipol ia blong revelesen’”(“Revelesen blong Jos, Revelesen blong Laef blong Yumi,” Liahona, Mei 2018, 95).