O Se Faaaliga na Taitaiina atu ai A’u i le Upumoni
Pe na o lou vaai faalemafaufau lava i le faatagata?
I ni nai tausaga ua mavae, sa matou feiloai ai ma faifeautalai, ma sa i ai luitau o lo’u ola maloloina. Sa ou faanoanoa, ma na pau le mea sa ou manao ai o le lagonaina o se ituaiga o taitaiga i lou olaga.
Ou te lei lagonaina se to’a po o se fiafia i se mea, aemaise lava o lenei Ekalesia na talanoa mai ai pea faifeautalai. E ui i lea, sa ou filifili ma le musua e auai atu i le sauniga faamanatuga mo le uluai taimi.
Sa ma o ma lo’u tina, ma ina ua matou taunuu i le fale o le Ekalesia, sa tau nofo lo’u fatu ina ua ou vaaia se faatagata auro feilafi i luga o le taualuga. O se vaaiga sili ona matagofie ua ou vaai i ai! O lenei fale sa foliga toafilemu ma valaaulia lou uiga atoa e suia, ma sa ou alu atu ma le naunautai i totonu.
I le taimi o le faamanatuga, sa moeiini ou mata, ma sa faaali mai le faatusa o Iesu i lou mafaufau. I le tuputupu a’e, sa ou iloa i taimi uma e uiga ia Iesu, ae ou te lei fiafia lava ia te Ia se’ia talu ai nei. Ou te lei faitauina muamua le Tusi Paia. Ma lo’u faamaoni, ou te lei iloa moni lava se mea e uiga i le mafuaaga na maliu ai Iesu Keriso i luga o se satauro, pe aisea foi na i ai ai ni Aposetolo e Toasefululua po o le pogai na a’oa’o mai ai perofeta e uiga ia te Ia.
Ae i lena lava taimi, sa ou lagonaina lou fesootai atu ia te Ia. Na iu lava ina foliga moni mai o Ia ia te au. Sa ou lagonaina se lagona lofituina o le alofa ma se manao ina ia a’oa’o atili. Sa ou talitonu o Ia o le punavai o le upumoni ma le alofa sa ou sailia.
I ni nai aso mulimuli ane, sa ou fesili ai i lo’u tina e uiga i le faatagata na ou matauina. Sa foliga mai sa le mautonu o ia ma fai mai na te lei iloaina se faatagata, ae sa manao o ia e toe ui atu i le fale e vaai i ai ina ua ou faamatalaina le matagofie o lena mea.
Ae ina ua matou taunuu i le falelotu, o le faatagata sa ou vaaia i ni nai aso talu ai ua leai se mea. Sa ou le talitonu i ai! Pe na aveesea e se tasi?
I le lotu i le vaiaso na sosoo ai, sa ou fesili ai i se tagata e uiga i le faatagata. Sa le mautonu o ia ma faapea mai o le fale e lei i ai lava se faatagata na i ai. Ae ina ua ou faamatalaina le foliga o le faatagata, sa ia faapea mai, “Oi! O le uiga o lau tala o le faatagata o Moronae? O faatagata na e le i luga o falelotu o le Ekalesia, ae o lona faatagata o loo i luga o le tele o malumalu. ” Sa ia ta’u mai ia te a’u o Moronae o se perofeta i le Tusi a Mamona ma o loo ia faatinoina foi se vaega o le Toefuataiga.
Sa tonu ia te a’u masalo na ou vaai faalemafaufau i le faatagata. Ae sa ou sailiili i le Tusi a Mamona mo le ta’ua o Moronae. Sa ou aoaoina na aveesea lona aiga ma ana uo, sa tiga o ia i agasala a le lalolagi, ma e ui lava i na mea uma, sa mulimuli lava o ia i le poloaiga a le Atua e puipuia le upumoni. Sa ou aoaoina foi na faaali o ia i a Iosefa Samita i ni taimi se tele e tuuina atu ai ia te ia ni savali mai le Tama Faalelagi. O le aoao e uiga ia Moronae ma ana aoaoga ma le ala na ia alu ai i le taumafaiga tele e mulimuli ia Keriso ma faasaoina le upumoni na fesoasoani ou te liliu moni atu ai lo’u loto atoa i le talalelei.
Ina ua mulimuli ane ou maua le avanoa e asiasi atu ai i le malumalu o Sapporo Iapani, sa ou vaai i le faatagata tonu lava o Moronae mo le uluai taimi. O le faatagata lava lea sa ou vaai i ai i luga o lo’u fale o le Ekalesia. Ae o le faatagata lea na ou vaaia i lena aso sa susulu ma le matagofie e sili atu nai lo lenei lalolagi. Ou te talitonu o le “faatagata feilafi” o se faaaliga mai le Tama Faalelagi, e valaaulia ai a’u e maua Lona alofa ma le upumoni o le talalelei toefuataiina a Iesu Keriso. Ina ia aoao e uiga i perofeta anamua e pei o Moronae o le na molimau mai e uiga ia Keriso ma perofeta soifua o e faia lea lava mea e tasi. Ina ia saili le mea e aga’i i ai lea sa ou matua’i saili i ai.
Ou te iloa na toefuatai mai e le Alii le talalelei a Iesu Keriso e ala mai i le Perofeta o Iosefa Samita ma o loo i ai o tatou perofeta soifua i ona po nei o e ua taialaina e ia e aumaia ia i tatou le upumoni ma fesoasoani ia i tatou ia toe foi atu i le Tama Faalelagi. Ou te iloa o Iesu Keriso o le punavai o le filemu ma le olioli i lenei olaga e faapea foi ma le isi.
O le malamalama o Lana talalelei toefuataiina ma faamanuiaga uma na te foai atu na suia atoa ai lou olaga, ma e pei lava o lena aso muamua o le Ekalesia, ou te iloa o le a taialaina e le Tama Faalelagi lou olaga a o faaauau ona ou mulimuli ia te Ia ma Ana avefeau.