Ua Na’o Tusiga Faatekinolosi: Talavou Matutua

Faatoilaloina o le Lotovaivai

Saunia e le Tautua mo le Ola Tutoatasi

E lotovaivai uma lava tagata, peitai o le faaumiumi o le popole e uiga i le toilalo e le gata ina taofia ai lou alualu i luma ae e leaga foi mo lou soifua maloloina faalemafaufau.

Talafatu #1: Sa tatou fananau uma mai lava ia fiafia.

Talafatu #2: Tatou te le mauaina lava mea tatou te manaomia ia fiafia ai, aisea la tatou te taumafai ai fua?

O le taunuuga o nei talafatu uma e lua e faalotovaivai tagata—o le lagona lea tatou te mauaina pe a tatou le ausia faamoemoega na tatou setiina mo i tatou lava, pe afai e leai ni a tatou faamoemoega ae na o le taliaina o o tatou tulaga o i ai nei. E masani ona oo mai le toilalo ao lei oo mai le lotovaivai, pe ua tatou lagona le pei ua tatou fananau mai o se toilalopopo, ua le mafai ai ona tatou ausia mea o faamoemoe mai ia i tatou, pe ua tatou faia le mea sili tatou te mafaia ae e le o tulaga mai lava i le mea o tatou mananao ai.

Peitai o le lotovaivai o se vaega o le olaga, ma e mafai moni lava ona aoga tele pe a tatou aoao i le auala e galulue ai. O motugaafa la nei e 10 i le auala e liua ai lou lotovaivai i le alualu i luma:

Faailoa atu le toilalo ma nafa ma lau vaega o i ai. O le mea moni e i ai taimi e le tutupu ai mea i le ala o tatou mananao ai ma e leai ma se mea e mafai ona tatou faia e suia ai, ae o le tele o taimi, e mafai ona tatou faia se mea e ese mai ai. Saili e aoao mai mea o e toilalo ai.
Tatalo e uiga i ai. Tatalo, e le o mea uma ina ia lelei ina ia e toe maua ai le fiafia, ae ia malamalama, ia maua se lesona, ma maua ai se uiga faaalia lelei ina ia mafai ona e agai i luma.
Foia se faafitauli. O le popole o se aafiaga ese mai le mea o manaomia. Taumafai e sui mai ou mafaufauga mai le vaega faalelagona o lou faiai i le vaega talafeagai—ina ia mafai ona e faaputuputu mai ai au punaoa e faia ai se fuafuaga.
Toe tatalo. Afai loa ua i ai sau fuafuaga lelei ua faataatia e faatoilalo ai le lotovaivai, tatalo mo se faamaoniga o lau fuafuaga o se fuafuaga lelei. O le a fesoasoani le Alii ia te oe e agai i tua atu o le toilalo lea e mafua ai le lotovaivai i le taimi muamua.
Galue loa. Afai ua leai sau galuega, galue i le aofai e tasi o itula i aso uma e saili ai mo se galuega fou e pei o e faigaluega i lau galuega tuai. Afai o le faafitauli o se fegalegaleaiga, alu e faigaluega e toe faaleleia ai se faaletonu. Po o le a lava se mea o e faatoilaloina—aemaise lava pe afai o se agasala o mafua ai ona e lotovaivai—galue e sui ma ausia ni sini laititi.
Ia faasolosolo lelei i le tasi le aso i le taimi. E oo lava i sini ia o loo avea ma vaega o lau fuafuaga e tatau ona laiti ma e tatau ona tuleia oe i le ala sa’o.
Faaaoga lau upegafesootai lagolago. O uo ma aiga o ni punaoa maoae. Faailoa atu ia i latou e uiga i lou tulaga e aunoa ma le matuai le lelei. O uo moni e faalogo ma lagolagosua. O nisi taimi o se tagata e faalogologo ia te oe e mafai ona faia se eseesega atoa.
Talosaga mo se faamanuiaga faaleperisitua. E leai se tapulaa o le aofai o faamanuiaga faaleperisitua e mafai ona e mauaina. Afai e te manaomia se [faamanuiaga], talosaga mo se [faamanuiaga].
Tumau ai ma le onosai. O nisi taimi e na o sina taimi e manaomia e faamuta ai taimi faigata.
Faitau ou manuia. Fai se lisi o mea uma e te faafetai ai. Faaopoopo i ai i aso uma ma ia iloa lelei o le iuga, o le fiafia e faatalitali mai mo i tatou uma.

Ioe, e faigata le olaga. E faigata mo i tatou uma. Ae ui i lea, e tuputupu ae lo tatou faatuatua ao tatou tali atu i o tatou luitau i se auala lelei. E sili atu ona tatou lagonaina le alofa o le Atua mo i tatou aua o loo tatou alualu i luma, faia le mea sili tatou te mafaia, ma ole atu mo Lana fesoasoani.