Na o Polokalama Faaeletonika
Pe o E Ola ea Faaafaafa i le Talalelei?
O o tatou uiga faaalia i o tatou tiutetauave i le Ekalesia o le a faia se eseesega tele.
“Pe tatau ea ona ou faia?”
Pe na e maua muamua ea lenei lagona? Na oo mai lava i lou mafaufau i le tele o taimi. Ma na ou iloaina o lea ituaiga manatu e foliga o se manatu le taua ae o se faailoga taua o lou uiga faaalia. Ioe, e mafai ona tatou aapa uma atu ma auauna atu i isi, e mafai ona tatou taliaina ma lagolagoina o tatou valaauga i le Ekalesia, ma e mafai ona tatou auai i a tatou fonotaga i le Ekalesia. E tusa lava pe faia faaafaafa, o nei mea e mafai ona faia se eseesega i o tatou olaga. Ae pe faaitiitia ai le mafaia e le Atua ona faaaoga oe? Pe faaitiitia ai le mafaia e le Atua ona suia oe? Mo au, ou te manatu e mafaia.
O lenei manatu ua mafua ai ona ou mafaufau ia Lamana ma Lemuelu, o e na tuua Ierusalema, o e na toefoi mo papatusi, o e na fesoasoani e fausia le vaa, o e na faia le tele o mea na usitaia—ae na la faia nei mea ma le musua ma le faaafaafa. La te lei faatagaina o la aafiaga e suia i laua mo le lelei. Nai lo lena, na la muimui i taimi uma ma na i ai ni uiga faaalia leaga i soo se tulaga lava na la i ai. Ma ina ua ou iloaina lena mea, ou te lei manao moni lava ia avea o se Lamana po o se Lemuelu.
Faaalu sina taimi e manatunatu ai e uiga i mafuaaga i tua atu o au faatinoga. Pe o e aapa atu i isi ma se taulai atu i faamanuiaga o loo faapolopolo mo oe? Pe o e aapa atu i isi ona e te manao moni lava e faasoa atu le malamalama ma le alofa ia i latou? Pe o e faia ea mea uma e manaomia mo lou valaauga ona o loo faamoemoeina oe e fai? Pe o e faia ea ona e te manao e auauna atu i le Atua ma i latou o siomia oe?
O ituaiga nei o fesili ou te taumafai e fai ia te au lava mai i lea taimi i lea taimi. Pe o ou faia mea uma ou te mafaia e ola ai e pei o se soo moni o Keriso ma le manatu moni i ai? Pe e leo i ai atoa lou loto? Ou te manatu na sili lava le ala na saunoa mai ai Epikopo Gérald Caussé, le Epikopo Pulefaamalumalu: “Pe o tatou malolosi ea i le talalelei, pe ua na ona tatou pisi lava i galuega i le Ekalesia?” (“O Mea Uma Lava e mo Tagata,” Liahona, Me 2018, 112).
Malosi ma le Pisi
Mo au, pe afai na ona ou “pisi” i le Ekalesia, ona oo mai ai lea i lou mafaufau le le popole. O lenei le popole e mafai ona mafua mai i se uiga faaalia o le le naunau po o le le faatagaina foi o ni galuega e le taua tele i lau faatulagaga e faalavelave ai i mea e taua moni lava. O lenei le popole e oso mai pe a ou nofo i totonu o le sauniga faamanatuga ae le o faalogo, pe a ou faia au tatalo i po taitasi ae amata ona alu solo lou mafaufau i isi mea, pe a ou faavave lava ona vaai i au tusitusiga paia e aunoa ma le manatunatu loloto i ai, pe ina ua ou aapa atu i se tasi tau ina ia faapea ai na ou faia nai lo le taumafai faamaoni ia faauo i latou.
O nisi taimi ou te lagonaina le lotovaivai pe a ou le vaaia se alualu i luma i lou olaga—pe a na o lou le popole lava ma “pisi” i le talalelei—ma o nei lagona e tumau pea seia oo ina ou iloaina le faafitauli. O nisi taimi ou te nofo lelei, toe manatunatu, ma fesili ia te au lava ia, “Pe o ou tuuina atu i lenei valaauga po o lenei tagata po o lenei tatalo po o lenei mau lou manatu ma le loto atoa i le taimi nei?”
Ina ua faafuasei ona oo mai lena ituaiga o faaaliga ia te au, o le taimi lena na tupu ai le suia moni lava i lou olaga. Pe a ou tatalo moni lava ia vaai atu i isi i le ala e silasila atu ai le Tama Faalelagi ia i latou, pe a ou tatalo mo avanoa faaleauaunaga, pe a ou tatalo mo le taitaiga i lou valaauga, i lau galuega, ma i lou olaga o aso taitasi, ma le mea e sili ona taua, pe a ou faatino e ala i uunaiga Na te tuuina mai ia te au, pe a faaalia mai e au faatinoga lou manao i totonu ia avea ma se tagata e sili atu—o le taimi lena ou te malosi ai i le talalelei. O le taimi lena ou te lagonaina ai se siitiaga moni i ou uiga faaalia, i lou loto, ma i lou agaga. O le taimi lena ou te vaaia ai ni vavega ua faaalia mai. O le taimi lena ou te lagona ai le fiafia moni ua ulu mai i lou olaga. O le taimi lena ou te taumafai ai moni lava e suia mo le lelei sili atu.
Faatinoga ma Lagona
Ou te manatu e mafai ona tatou vaai uma lava i tua i ni nai minute i o tatou olaga ina ao lelei a tatou faatinoga, ae o o tatou lagona i tua atu sa lei faapena. O nisi taimi e pisi tele le olaga, o nisi taimi tatou te le maua i taimi uma le fiafia atoatoa i o tatou tulaga, ma o nisi taimi e le lelei ai mea uma e pei ona tatou mananao ai. Tatou te le atoatoa, ae afai tatou te ole atu i le Tama Faalelagi e fesoasoani ia i tatou ina ia tuu atoa atu lo tatou loto i mea o nisi taimi e le taua ma faaalu taimi e manaomia ona tatou faia, e mafai ona tatou aoao ia faia i se ala faaKeriso e sili atu.
E mafai ona ou mafaufau i taimi pe a ou ioe toai atu e faia se galuega faatino, ae faatoa faamaluluina lou loto ma suia pe a mavae le aafiaga. Pe o le taimi ou te maua ai se valaauga ma faitio i le tele o lou taimi e alu ai, ae mulimuli ane matua maligi ou loimata pe a faamalolo ona sa ou aoao e fiafia i ai.
E mafai ona tatou faasoa atu le malamalama, faataunuu o tatou tiutetauave, ma maua tali i a tatou tatalo i le ala sili pe a i ai o tatou loto i le nofoaga sao. Afai tatou te faaalu le taimi e iloilo ai uiga faaalia ma manaoga i tua atu o a tatou faatinoga ma faia mea uma tatou te mafaia “ma le loto faamaoni, [ma] le manatu moni i ai” (Moronae 10:4), o le a sili atu ona tatou mafai ona iloa le taitaiga a le Tama Faalelagi, maua le olioli sili atu, ma faia nisi mea e sili atu o se eseesega i o tatou olaga ma i olaga o isi.