KOVITI-19: O Se Avanoa e toe Taulai Atu ai i le Fatu o le Talalelei
I le talafaasolopito atoa, sa i ai lava vaitau faigata. O aso nei, ua tatou feagai ai ma ni faigata ogaoga e mafua mai i le KOVITI -19. Ua tatou faalogoina ma toe faalogo foi i ai: o taimi faigata nei e le’i fuafuaina. O le toatele o i tatou e popole i lo tatou ola maloloina ma le soifua manuia o e pele ia i tatou. Ua tatou lagonaina uma aafiaga faale-tamaoaiga ma faale-lagona e mafua mai i lenei vairasi. E foliga mai e leai se mea o toe sologa lelei. Ma ua faalavelaveina ai le auaunaga faafaifeautalai ma galuega o le malumalu. E toatele tagata ua lagona le lofituina i le galuega o le toe faatulagaina o faiga masani i le aiga.
O le feagai ai ma se lumanai le mautinoa e mafai ona mafua ai lagona o le atuatuvale po o le popolevale foi—atonu na e te lagonaina lenei mea. Ae i le lotolotoi o nei vevesi uma, o loo i ai se faamoemoe! E ui lava i le le mautonu ma suiga, ae e lei suia lava mea autu ma faavae o le talalelei:
-
O sauniga ma faatasiga aloaia a le Ekalesia atonu ua le faataunu’uina pe faaitiitia fo’i mo se taimi le tumau, ae e lei faalavelavea ai lava le ola i le talalelei! E mafai ona tatou faaauau ona tapuai, auauna atu, ma faatino le talalelei i o tatou aiga.
-
O loo i ai pea le Atua i Lona afioaga.
-
O lona Alo, o Iesu Keriso, o loo tu pea i le ulu o lenei galuega. E malamalama o Ia i faigata o le lalolagi faapea ai foi ma o tatou lava tauiviga patino. Sa Ia folafola mai, “Ou te le tuua outou o matuaoti” (Ioane 14:18). Na te auina mai le Agaga Paia e faatasi ma i tatou.1
-
Na valaauina e le Atua ia perofeta, tagatavaai, ma talifaaaliga. Ma e ala atu ia i latou, ua ia faataatia lelei ai le mea e manaomia ona tatou taulimaina i lenei afa.2 Mafaufau i le mataupu aoaoina fou e taulai i le aiga, faatasi ai ma isi fetuunaiga, na fesoasoani ia i tatou e saunia ai mo lenei taimi ma ia ola ma auauna atu i auala maualuluga ma paia atu.3 O nei suiga talu ai nei e le faafuaveta—sa tuuina i latou e se Atua e silafia ma alofa.
E ui lava i le vevesi, ma i lo tatou mafaufau i nei mea, e mafai ona tatou toe taulai atu i le fatu o le talalelei, lea e aofia ai le faatuatua i le Alii o Iesu Keriso.
E mafai faapefea ona faatinoina le faatuatua sili atu? Mai lava i le amataga, na faatagaina ai e le Alii ona soo e onosaia ia luitau e aunoa ma le mauaina o tali uma. O aa o lo tatou faatuatua e loloto atu pe a tatou faaaogaina le faitalia ma agai i luma i le feagai ai ma le le mautonu. Sa toe taua e Elder Neil L. Andersen o le Korama a Aposetolo e Toasefululua lenei mea, ma faapea atu, “e te le iloa mea uma, ae ua lava mea ua e iloa!”4
O le tala ia Nifae ma ona uso na taumafai ia maua mai papatusi apamemea o se faataitaiga sili lea o lenei mea. Sa latou iloa le mea e tatau ona latou faia: aumai papatusi! Sa i ai foi ia i latou se manatu lelei i le mafuaaga. Sa latou leiloa pe faapefea ona fai lena mea. Ina ua mavae ona toilalo faalua (tagai 1 Nifae 3:10–27), na le toe faalagolago ai Nifae i ona lava tomai. Nai lo le fiu, sa ia toe taumafai tasi. Ia matau le faaaogaina tuusao o upu a Nifae i o tatou tulaga i aso nei:
“Ma sa taitai aʼu e le Agaga, ona sa ou lē muaʼi iloa muamua mea e tatau ona ou faia.
“E ui i lea sa ou alu atu” (1 Nifae 4:6–7).
E ui lava i le tele o mau fesili i o tatou olaga, ae afai tatou te “o atu” e pei o Nifae, ma faalagolago i le Atua ma mulimuli i Ana perofeta ma taulai atu i le faatuatua, o le a ia taitaia ma mamanuina i tatou. E i ai se taimi i lenei faagasologa, o le a mafai ai ona avea a tatou fesili faafitauli ma ni vaega faavae maualuga.
Ia faateleina lo tatou faatuatua ia Iesu Keriso, lo tatou faatuatuaga i ana auauna, ma lo tatou alofa o le tasi i le isi a o tatou feagai ma le lumanai. O lenei taimi o le faanoanoa ma faigata i le lalolagi atoa e mafai ona avea ma se nofoaga paia mo i tatou e latalata atili atu ai ia te ia. A o tatou faia faapea, o lona filemu matagofie o le a faatumulia ai o tatou agaga, e oo lava i le lotolotoi o faigata, ma o le a tatou maua le malosi ma tali tatou te manaomia.