O le Ola Faamanuiaina i le avea ai ma se Faifeautalai i taimi o le KOVITI-19
O lau taulaiga e faia ai se eseesega tele.
Afai e fesili mai se tasi ia te au i ni nai masina talu ai poo le a saʼu vaaiga faalemafaufau e uiga i laʼu misiona, o le a le mafai lava ona ou iloaina le mea o loo faatalitali mai ia te aʼu. Ae o le mea e tasi e tutusa lava: O au lava o se faifeautalai mo Le Ekalesia a Iesu Keriso o le Au Paia o Aso e Gata Ai—ae o le taimi nei, o a’u foi o se faifeautalai i le taimi o le fa’ama’i.
O le a la le uiga o lena mea?
O lona uiga o le manao e fai le finagalo o le Alii i se auala e sili atu ona loloto. O lona uiga o le taumafai e auauna atu i le Alii ma Ana fanau a o feagai ma se suiga faifai pea. O lona uiga o le aoao ia vave ona fetuunai i tulaga fou. O lona uiga o le aoao ia sili atu ona fetuutuunai, faapalepale, onosai, ma agaalofa i aso uma.
O lona uiga foi o le feagai ma le tele o le le mautonu ma fai atu ni fesili e pei o le:
“Pe o le a auina atu ea lau soa i le fale a taeao?”
“Pe o le a ma siitia atu ea i se eria ese ona o le vairasi?”
“O le a le mea o le a tupu i tagata o loo ma aoaoina pe a ou alu?”
Sa matou faaauau pea a matou aoaoga o le talalelei i luga o ala o faasalalauga faaagafesootai, ae e le faigofie i taimi uma—ma e mautinoa lava e le o se aafiaga lea o le misiona na mafaufauina e se isi o i matou. Ae ui i lea, o loo matou i ai pea iinei, i la matou filifiliga mautu e auauna atu i le Alii e tusa lava po o le a le tulaga po o le ala e faia ai, ia aapa atu i loto o ana fanau.
Aisea ua ou filifili ai pea e auauna atu?
Ioe, o faigata o le olaga faafaifeautalai e faaletino, faalemafaufau, ma faaleagaga—ma ua matou aafia uma ai lava i se tasi o na mea. Ioe, sa matou feagai ma le tele o le tauiviga ma o le a faaauau pea ona feagai ma luitau faaopoopo, ae o le faafetai atu ia Iesu Keriso, o le na tuuina mai lona soifua mo i tatou, ua matou iloa ai e aoga tele lava.
Ua ou iloa e silafia i tatou uma e le Tama Faalelagi. Sa ia iloaina e i ai faifeautalai o le a le mafai ona o i le malumalu pe tuvae i totonu o se nofoaga autu e aoao ai faifeautalai a o lei malaga atu i la latou misiona. Sa ia silafia o le a le maua e nisi talavou le avanoa e auauna atu ai i nuu na valaauina ai i latou. Ae peitai ua iloa e nei faifeautalai e alofa ma puipuia i tatou e le Alii e pei lava ona Ia finagalo ai i taimi uma. Ma ua lava lo tatou taumafai i Ona fofoga. Ua tatou aoaoina uma lava e mafai ona tatou auauna atu i le Alii ma faasoa atu Lana talalelei i soo se tulaga lava ma soo se mea. E taua tele.
O le a le mea o loo faatumauina ai aʼu i le agai pea i luma?
I aso faigata, na ou iloa ai e lua auala e vaʼavaʼai ai i lenei taimi:
-
Faatasi ai ma se uiga masalosalo, o le faatalitali onosai mo mea e toe foi i le tulaga masani.
-
Po o se vaaiga fou, faatutuina o ni sini, fuafuaina ma le lelei ma le patino, e faaaoga ai lenei tulaga o se avanoa e faia ai ni suiga ua leva ona tatou mananao ai ae tolopoina.
Ou te taumafai e filifili le filifiliga lona lua. A o ou mafaufau i tulaga o i ai nei i le lalolagi, sa ou mafaufau pe o KOVITI-19 o se avanoa lea e fesoasoani ai ia i tatou e talisapaia atili a tatou sootaga po o le uunaia foi o i tatou e tatala o tatou loto aga’i atu i lo tatou Foafoa ma naunau e faalogo atu ia te ia. Ma faamuamua le talalelei nai lo se isi lava taimi.
E le na o se taimi faigata lenei mo faifeautalai—e faigata mo tagata uma. Ae e pei lava ona valaauina e le Ta’ita’iau o Moronae isi ia auai i le faamoemoe mo le saolotoga (tagai Alema 46), ua valaauina foi i tatou e tutulai aʼe ma aua le matatau. Ma ia iloa o lo tatou Tama Faalelagi e moni lava e faatasi ma i tatou, e mafai ai ona tatou auauna atu ma o tatou loto atoa, mafaufau atoa, manatu atoa, ma le malosi, e tusa lava po o le a (tagai Mataupu Faavae ma Feagaiga 4:2).
I le avea ai ma faifeautalai a le Alii, e tatau ona tumau lo tatou taulai atu pea i lo tatou Faaola ma la tatou sini e faavavau. Sei o tatou manatua e alofa le Tama Faalelagi i Ana fanau uma ma e finagalo ia tatou toe foi atu ia te Ia.
Mea moni, e tusa lava pe faigata ona avea ma se faifeautalai i le taimi o le KOVITI-19, e mafai ona tatou faia lenei taimi o se tasi o mea e sili ona lelei i o tatou olaga. I le faamaoni uma, ose mea sili mo au lava! Ma o mea uma ona o lo’u taulai atu, aua ou te taumafai lava e le aunoa e manatua lo’u alofa i le Tama Faalelagi ma lo’u manao e fesoasoani ia te Ia e faapotopoto mai Isaraelu ua faataapeapeina. Ma ua ou iloa o le a Ia tuuina mai i Ana faifeautalai taitoatasi le alofa mutimutivale a o tatou faia le mea sili tatou te mafaia e faataunuu ai lenei valaauga ua Ia tuuina mai ia i tatou.