O Uluai Tamaitai o le Toefuataiga
Na Puipuia e Ema Tusitusiga Paia
E pei o Ema Samita, e mafai ona tatou faamamaluina tusitusiga paia ma puipuia ma le lototele le upumoni.
Ata na tusia e Toni Oka
I le mavae ai o le vaeluapo i le aso 22 o Setema, 1827, sa agai lemu atu ai se taavale solofanua i talaane o le taulaga e latalata i Manaseta, Niu Ioka, ISA. Sa agai atu Iosefa ma Ema Samita i se mauga lea sa i ai faamaumauga anamua, na tusia i luga o papatusi auro, na faatalitali ai mo i laua. Na tau atu e se agelu e suafa ia Moronae ia Iosefa e aumai le tagata sao ma ia e ave atu talafaamaumau. E ala i faaaliga patino, na silafia ai e Iosefa o lona toalua, o Ema, o le tagata lena.
Sa faatalitali Ema a o mauaina e lana tane-perofeta ia papatusi ona natia lea o i latou i se ogalaau e pu le ogatotonu. Sa amata ona oso ae le la ina ua toe foi atu le ulugalii i le fale.
O le aso na sosoo ai, sa faalogo ai Ema ia Iosefa Samita Le Matua faapea o se vaega o tagata na taupulepule e gaoi ia papatusi auro. Sa ia aveina se solofanua faaleoleo, na ia tietie atu ai i le silia ma se itula e lapatai ia Iosefa , o le sa mafai ona teu malu papatusi i se pusa e loka.
E le na o le pau lea o le taimi na puipuia ai e Ema tusitusiga paia le mafaatauina. I le malaga a le ulugalii e agai atu i Penisilevania, sa ia fesoasoani e nana ia papatusi i se paelo pi. I le taimi o le faagasologa o le faaliliuga, sa tuuina atu e Ema ia Iosefa se ie lino e ufiufi ai papatusi a o la saofafai i luga o se laulau i le umukuka i le ao ma faatau mai se atigipusa lanumumu mo faamatalaga na tusitusia. Sa ia talosaga atu foi i lona tuagane faaletulafono mo se atigipusa, lea sa la teuina ma Iosefa i lalo o lo la moega ma o iina sa loka ai papatusi i po taitasi. I ni nai tausaga mulimuli ane, sa puipuia ai e Ema le tusiga o le Faaliliuga a le Perofeta o le Tusi Paia, ma tauaveina i lalo o lona sakete a o sopoia ai le Vaitafe aisa na malo o le Misisipi.
E le gata i le puipuia o tusitusiga paia, ae na fesoasoani Ema i le faaliliuga o le Tusi a Mamona. O ia o le tusiupu muamua a Iosefa—na tusia ma le faaeteete i lalo ia fuaiupu ia ua tatou faaaogaina i le asō. Sa ia suiina se taga mo se maa talifaaaliga na masani ona faaaoga e Iosefa i nisi taimi e faaliliu ai.
I le faaiuga o lona olaga, sa manatua ai e Ema le matafaioi sa ia faatinoina e fesoasoani ai e faasoa atu nei mau i le lalolagi. “Sa avea au ma se tagata auai malosi,” o lana tala lea. Sa ia molimau mai o Iosefa o se perofeta o le Toefuataiga ma o le Tusi a Mamona “o se mea matagofie ma le ofoofogia.”1