O Le Matafaioi Taua a Tamaitai
Saunia e Peresitene M. Russell Ballard
Sui Peresitene o le Korama a Aposetolo e Toasefululua
Mai se lauga i le Konafesi a Tamaitai o le Iunivesite o Polika Iaga, “Women of Dedication, Faith, Determination, and Action,” (“Tamaitai o le Tuuto Atu, Faatuatua, Naunautai, ma Faatinoga,”) na fofogaina i le aso 1 o Me, 2015.
E le mafai ona faataunuuina le faamoemoega moni o le galuega o le malo o le Atua e aunoa ma le alualu i luma i le galulue faatasi ma tamaitai faamaoni, ma ofoofogia o le Ekalesia.
E i ai faatosinaga ofoofogia a tamaitai. E leai se isi tagata e mafai ona fesoasoani e faagaoioi le alualu i luma o le malo o le talalelei ma faia ia avea le lalolagi o se nofoaga sili atu e pei ona latou mafaia.
A outou auai faatasi ma isi tamaitai o le feagaiga i le lotogatasi ma le fealofani, e leai se tapulaa i la outou uunaiga mo le lelei. Ua ou molimauina o outou aafiaga taua ma le faavavau i olaga o tagata taitoatasi faapea ai ma aiga, ma ua ou vaai i ai i le anoanoai o aganuu ma atunuu i le salafa o le lalolagi.
Ua ou vaaia mea e mafai ona outou faataunuuina i paranesi, uarota, siteki, misiona, malumalu, ma tofiga aoao o le Ekalesia. O a outou saofaga—i pisinisi laiti ma galuega limafoai, faapea foi ma faalapotopotoga faalemalo, faaleaoaoga, soifua maloloina, ma taaloga—ua le mafaatusalia.
Tamaitai i Aufono
E tele tausaga o ou talanoa e uiga i le malosiaga o aufono faatasi ma tamaitai faamaoni o loo auai. O o outou manatu ma fautuaga e matua taua lava. I le taimi nei ua matuai faamanuiaina lava e le Alii le Ekalesia ma le lalolagi ona o le toatele o faifeautalai tamaitai o loo auauna atu ma le faamaoni i tofiga faaletaitai faamisiona ma auai i fonotaga faaleautaitai faamisiona. E toatele atu isi ua latou vave maua o latou faaeega paia, ma faateleina ai le aofaiga o tamaitai o feagaiga o le malumalu o loo auauna atu i le Ekalesia. O tuafafine taitai i Au Peresitene Aoao o loo tatalo ma lauga i konafesi aoao.
Tamaitai i Tusitusiga Paia
O nisi tamaitai e momoo maimau pe ana latou mauaina nisi tala se tele e uiga i tamaitai i tusitusiga paia ma i talafaasolopito o le Ekalesia. E tatau ona tatou atiina ae le tomai e saili ai a latou faatosinaga, e pei ona faia e se tasi o tuafafine talavou. Fai mai a ia, “Atonu sa i ai ia Mamona se toalua maoae na tausia se atalii ofoofogia e pei o Moronae!”
Afai e te vaavaai toto’a ma le agaga sa’o, e mafai ona e mauaina ni faaaliga tali tutusa o le faafaileleina lelei i tusitusiga paia.
Mo ni nai tausaga, ua taulai atu le Ekalesia i tuafafine faamaoni o le Ekalesia ma o latou sao. Mo se faataitaiga, ou te valaaulia outou e suesue le autu “Women of Conviction” o loo maua i le history.ChurchofJesusChrist.org
Sa ofoofogia le matafaioi a tuafafine paionia. I tusitusiga e uiga i paionia, na ta’ua e se tasi tusitala, e le o se tagata o le Au Paia o Aso e Gata Ai, na faapea mai, “Na ofoofogia o latou tamaitai.”1
A o tatou vaavaai ma saili ia tamaitai i a tatou tusitusiga paia ma a tatou talafaasolopito, o le a tatou vaai atili ai i le mana ma aafiaga o tamaitai i o tatou aiga, nuu, le Ekalesia, ma le lalolagi.
Filifiliga e Faapaleni ai
I lo’u olaga ua tatou vaaia ai le toatele o tamaitai e tofia ma filifilia i galuega faalemalō, tauave tofiga e pei o Ofisa Sili o matagaluega ma faalapotopotoga tetele, ma taliaina i le tele o pisinisi lauiloa, tulafono, ma aoga faafomai.
Na saunoa atu Iosefa Samita i le Aualofa i le 1842, “Ma o lenei ua ou tuuina atu le ki ia te outou i le suafa o le Atua, ma o le a olioi lenei sosaiete, ma o le a tafe mai ai le poto ma le malamalama mai lenei taimi—o le amataga lenei o aso sili atu ona lelei mo lenei sosaiete [mo tamaitai].”2
Ua tatou vaaia le faataunuuina o lenei faaaliga faaperofeta o ni avanoa fou ma ni faiga alualu i luma mo tamaitai ua faaalia i ni auala e lei vaaia muamua. O le faapaleniina o mea uma i filifiliga uma o loo maua e mafai ona avea ma se luitau. I le iuga, o le toatele o i tatou e tatau ona filifili i filifiliga e faatautavā.
Ioe, o loo i ai sa tatou mamanu paia e mulimuli ai e pei ona otooto mai i le “O Le Aiga: O se Folafolaga i le Lalolagi,” ae ua tatou iloa o le olaga faaletino e mafai ona faigata. E toatele tamaitai ua nofofua mo ni vaitaimi uumi. O nisi tamaitai ua faaipoipo. O isi e oo ina nofotoatasi pe a maliu se toalua pe tetea foi. Ma o nisi tamaitai atonu e le faaipoipo lava.
E ui i lea, afai tatou te faamaoni ma tumau e oo i le iuga, e leai se manaoga amiotonu o le a faafitia, ma o faamanuiaga uma o le a mauaina lava. E ao ina outou iloa taitoatasi mea ua finagalo ai le Alii mo outou, e ui i filifiliga ua i o outou luma.
O le taimi lava e te iloa ai le finagalo o le Alii, ona mafai loa lea ona e agai i luma i le faatuatua e faataunuu lou lava faamoemoega toatasi.
Faamanuiaga ua Faapolopoloina
Afai e faamaoni tagata o le Ekalesia o e o loo tapuai i le malumalu, o le a latou iloa o loo i ai faamanuiaga ofoofogia a le Alii o loo faapolopoloina mo Ona afafine ma atalii faamaoni i le faavavau atoa.
Ma o a la na faamanuiaga? O lenei malamalamaaga mai ia Peresitene Dallin H. Oaks, Fesoasoani Muamua i le Au Peresitene Sili, o loo faamatalaina mai ai: “O le faamoemoega o le olaga i le tino ma le misiona a Le Ekalesia a Iesu Keriso o le Au Paia o Aso e Gata Ai o le saunia lea o atalii ma afafine o le Atua mo lo latou faamoemoega—ia avea e faapei o o tatou matua faalelagi.”3
O le tala o le talalelei o se tala faaleaiga—e leai se mea e sili atu, pe itiiti ifo. E amata i ni matua faalelagi, ma e faaiu i tamaiti e agai atu i luma i nisi o taimi e faafiafiaina ai, o nisi taimi i luitau lofituina o le olaga nei ma toe foi atu ai i lo latou aiga faalelagi, ina ua latou mauaina sauniga taua uma o le faaeaga e faavavau.
O le tala lena o tatou olaga. Ua auina mai e le Atua ia i tatou le otootoga, ae ua Ia tuu mai ia i tatou ia maioio auiliiliga e ala i a tatou filifiliga ma le faamaoni. O loo i ai se fiafia sili e le gata ua faapolopoloina mo i latou uma o i ai le naunautaiga. Ae a o lei mafai ona tatou mauaina, e tatau ona tatou avea ma tagata e sili atu nai lo le na o ni Ana fanau—e tatau ona avea i tatou ma Ona soo.
O Tamaitai o ni Soo o Keriso
Ua faatumulia le olaga i mea faalavefau lea ua i ai le gafatia e taitai ese ai i tatou mai aoaoga autu a le Ekalesia—ae maise lava o le Togiola a Iesu Keriso.
Na saunoa le Perofeta o Iosefa Samita, “O mataupu faavae autu o lo tatou talitonuga o molimau a le au Aposetolo ma Perofeta, e faatatau ia Iesu Keriso, o lea na Ia maliu, ma tanumia, ma toetu mai i le aso tolu, ma afio ae i le lagi; ma o isi mea uma e faatatau i lo tatou talitonuga ua na o ni faaopoopoga i ai.”4
O le Togiola a Iesu Keriso o le fatu lea o la tatou savali! O le totonugalemu lea o lo tatou taua. O lo tatou nofoaga autu o le aoaoga faavae. O le fatu lea ma le agaga o Le Ekalesia a Iesu Keriso o le Au Paia o Aso e Gata Ai.
Afai e te lei lagonaina le moni ma le mana o le Togiola a le Faaola i lou olaga, ou te valaaulia outou ina ia toe taulai atu i le savali tutotonu o le Toefuataiga—o se savali o loo folafola mai ai e mafai ona tatou “faaatoatoaina e ala ia Iesu le puluvaga o le feagaiga fou, o le na faia lenei togiola ua atoatoa e ala i le faamaligiina o lona lava toto” (Mataupu Faavae ma Feagaiga 76:69).
Tuafafine, faamolemole ia fai soo se mea e tatau ai ina ia tumau ai le taulai atu i le savali faigofie ma le totonugalemu o le Toefuataiga. Taliaina. Malamalama i ai. Talisapaia. Fiafia i ai. Faasoa atu. Puipui i ai.
Tamaitai o le Mana o Feagaiga
O lenei, ou te fia fai atu ia te outou ia outou faia le mea lava lea e tasi na saunoa ai le perofeta o Iosefa Samita i tuafafine o le Aualofa e fai. “O le … Aualofa a Tamaitai e le gata ina laveaiina e matitiva, ae faaolaina foi o latou agaga,” na ia saunoa ai.5
“O tuafafine uma i lenei Ekalesia, o e ua osi feagaiga ma le Alii, ua ia te i latou se faatagaga paia e fesoasoani ai i le laveaiina o agaga, e taitai tamaitai o le lalolagi, e faamalolosia aiga o Siona ma fausia le malo o le Atua.”6 Faamolemole fesoasoani ia i matou e faatumau le agai i luma o le Ekalesia e ala i le fesoasoani atu e faatautaia le faateleina o le faatuatua i olaga o tagata taitoatasi o le au paia.
O tamaitai amiotonu ma faatuatua sa i ai lava se matafaioi taua i le laveaiina o agaga ma le puipuia o le malo o le Atua. Ae peitai, o outou tamaitai o lenei tisipenisione mulimuli ua i ai ni matafaioi ma tiutetauave faapitoa taua lava e faataunuu. O outou o tamaitai o le naunautaiga, faatuatua, tuuto, ma faatinoga.
E pei o tuafafine faamaoni i le taimi ua tuanai, e manaomia ona outou aoao i le faaaogaina o le pule o le perisitua lea na faaeeina atu ia te outou e maua ai faamanuiaga uma e faavavau ia o le a avea mo outou.
Ou te ole atu i lo tatou Tama Faalelagi e faamanuia outou ina ia mafai ona outou maua le filemu ma le toafimalie mautinoa o mea tou te faia i totonu o le Ekalesia e taua tele i le tuputupu ae ma sauniuniga o lenei lalolagi mo lena aso pe a fetalai mai le Alii ma le Faaola, “Soia,” ma o le a afio mai e pule ma nofotupu.
O le a taavale atu i luma le galuega o le malo o le Atua, ae e le mafai ona faataunuuina lona faamoemoega moni e aunoa ma le alualu i luma i le galulue faatasi ma tamaitai faamaoni, ma ofoofogia o le Ekalesia.