Na’o Tusiga Faatekinolosi
Faamanatuga i le taimi o le Faanofoesea: O se Vaaiga o le Alofa o le Atua
O le faatautaia o le faamanatuga i le fale sa toe faapupulaina ai o’u mata i lona uiga moni.
O nisi taimi o le masani ai ma faiga masani ua fāoa ai taimi paia ma o latou uiga atoatoa. Mo au, sa ou faamatuu ese nisi o uiga faamoemoeina o le faamanatuga. O vaiaso taitasi, ou te faalogologo ai i tatalo paia o le faamanatuga a o nofo ai toetoe lava o le nofoa lava lea e tasi i le falelotu lava e tasi, e siomia e se faapotopotoga masani.
Ae ua faalavelavea e le faama’i o le KOVITI-19 lenei faiga masani ma toe fetuunai ai la’u vaaiga.
I le le mafai ai ona faatasi atu i isi i le falesa, na ou maua ai le mauaina o le faamanatuga i se nofoaga fou—na faapotopoto faataamilo i le laulau o la matou potu ’ai faatasi ma lo’u aiga laitiiti. O le faia o se mea masani ma aga masani i lenei faatulagaga fou na aumaia ai se vaaiga fou ma, faatasi ai ma lena vaaiga fou, o se uiga ua faafouina.
E ui ina sa ou auai i le sauniga faamanatuga i le fia selau o taimi i lou olaga, o le faia ai i lea mea sa masani ai i lo’u faatasi atu i lo’u aiga mo se ’aiga ma se talanoaga na tulaga ese ai i le aiga uiga loloto o le faamanatuga i auala sa ou le talisapaiaina muamua.
E faapitoa lava i se tasi Aso Sa, a o ou tootuli ma faitau upu, “matou te ole atu ia te oe i le suafa o lou Alo, o Iesu Keriso” (Moronae 4:3), sa ou gauai atu i lo’u atalii pele e fa tausaga o nofo latalata mai ia te au. Sa ia nofo ai iina ma pi’ilima ona lima, faalogologo i le tatalo, faasusulu le ta’umamaina ma le lelei.
Faatasi ai ma lenei vaaiga susulu i lou mafaufau, sa faaauau ai pea ona ou ofoina atu le tatalo. A o ou tautala atu i upu, “le tino o lou Alo,” sa oo mai se fesili i lou mafaufau. Faamata o le a faapei le ositaulagaina o lo’u nei atalii taumamaina ma tuuina atu o ia i le tiga ma puapuaga e le mafaamatalaina?
I se upu, e le mafaatusalia.
I le mafaufau loloto ai i lenei fesili, sa faaauau pea lau tatalo. O upu “ave i o latou luga le suafa o lou Alo” na toe aumai ai se isi fesili i lou mafaufau. O le Atua foi o se Tama. E faapefea ona Ia ositaulagaina Lona Atalii? A o ou tilotilo atu i isi tagata o lou aiga, o e na pei o au, sa matuai manaomia lava le faamanatuga, sa oo mai se tali faigofie ae loloto: alofa paia (tagai i le Ioane 3:16).
Sa foliga mai e peiseai na toina pupuni o le lagi ma faaali mai se vaega o le alofa mama o lo tatou Tama Faalelagi—o se alofa silisili lea na Ia ositaulagaina ai Lona Alo ta’umamaina moni, o se Atalii atoatoa mo i tatou, o isi Ana fanau.
I se vaaiga i lenei taulaga, e tusa lava po o a faigata ma sasi o le olaga—e aofia ai se faama’i matautia, tamaoaiga ua faalavelavea, fevesiaiga i malo, se lalolagi le talitonu, ma le le mautonu lautele—e mafai faapefea ona tatou masalosalo i Lona alofa mo i tatou?
Ina nei galo ia i tatou, o le faamanatuga e avea o se faamanatu faalevaiaso o lenei alofa loloto ma tumau. I taimi e manatunatu ai i le le mafaatusalia o le meaalofa a Lona Alo, e mafai ai ona tatou maua le mafanafana ma faatoilalo ai le faaosoosoga e masalosalo i le alofa o le Tama po o le popole mo i tatou i taimi o faigata.
A aunoa ma le mafaufau lelei i tulaga faaletamā faavavau o le Atua ma Lana matafaioi i le Togiola a Iesu Keriso, o le a le atoatoa lagona o le sauniga faamanatuga ia te au i le taimi nei. E tu o se faamanatu faifai pea ia te au e uiga i le taulaga a Iesu Keriso ma le faaalia o le alofa o le Tama Faalelagi mo au.
Ma ona o lenei lesona i le alofa, o le a ou faatauaina ai pea le ma aafiaga o le faamanatuga i le aiga.