Aafiaga o le Mana o le Perisitua

Na fesiligia tamaitai o loo fesoasoani e taitai le Ekalesia e uiga i auala e aafia ai o latou olaga i le mana o le perisitua. O nisi nei o manatu sa latou faasoaina mai.

Ata na tusia e Matisse Hales

“Ua i ai i alii ma tamaitai ni tiutetauave eseese ae tutusa lava le taua i le aiga ma le Ekalesia. O le mana o le perisitua e mafai ona fesoasoani i tagata taitoatasi e faatino na tiutetauave mo le manuia o tagata uma.

“Talu ai ona ua i ai le mana o le perisitua a le Atua i le lalolagi i aso nei, ua i ai faamanuiaga e tele mo tagata agavaa uma o le Ekalesia, pe ua matutua pe laiti, alii po o se tamaitai, nofofua pe faaipoipo foi.”

—Peresitene Joy D. Jones, Peresitene Aoao o le Peraimeri

“O le auaunaga e faatupu tele ai o tatou agaga, e faalauteleina ai la tatou vaaiga ma mafai ai ona faateleina lo tatou taulai atu i le mana o le Atua. Ua silafia e le Alii lenei mea, ma e faapena foi Satani. I lana taumafaiga ma le faaeteete e faataumamao i tatou mai le mana o le Atua, o le a lofituina i tatou e le fili pe faapogai ai foi ona tatou lagonaina o le mea e tatau ona tatou ofoina atu e le atoatoa. …

“… Aua nei fesiligia faalua se faatinoga o le agalelei.

“O le faia ma le loto i ai o se auaunaga i isi o se vaega o lo tatou olaga, o le a tatou iloa ai mealilo a le Atua. O le a tatou maua le filemu, maua le malosi, ma maua ai se mana faateleina a o tatou auauna atu i lo tatou Faaola, o Iesu Keriso.”

—Peresitene Bonnie H. Cordon, Peresitene Aoao o Tamaitai Talavou

“O le tele o taimi, e faatusatusa e tamaitai i latou lava i isi. Ae e leai se tasi o i tatou e fiafia i lena faatusatusaga. E tofu tamaitai taitoatasi ma se tuufaatasiga tulaga ese o tomai ma taleni, ma o meaalofa uma na tuuina mai e le Atua. E le faapea ona o oe ma au e le tutusa—pe o soo se aofaiga lava o tamaitai e le tutusa—e le faia ai i tatou ia itiiti pe sili atu foi. E manaomia ona tatou sailia a tatou meaalofa ma atiina ae, manatua po o ai na tuuina mai ia i tatou, ona faaaoga lea mo Ona faamoemoega. A o tatou faasoa atu a tatou meaalofa ina ia faamanuiaina ai isi, ua tatou mauaina le mana o le perisitua i o tatou olaga.”

— Peresitene Jean B. Bingham, Peresitene Aoao o le Aualofa

“Ia vaavaai e le aunoa mo ni avanoa e faateleina ai lou malamalama e uiga i ‘aoaoga faavae o le perisitua.’ O i tatou uma o le a manaomia ona sailia lenei malamalamaaga mo i tatou lava.

“O le suesueina o tusitusiga paia ma upu a perofeta o ona po nei o le a maua ai se faavae silisili mo lenei malamalama ina ia tuputupu ae. E faapena foi i le usitai i poloaiga a le Atua ma ola faamaoni i feagaiga ua tatou osia e ala i sauniga o le perisitua. E tuuina mai e le Atua ia i tatou le malamalama i “lea fuaitau i luga o lea fuaitau, ma lea mataupu i luga o lea mataupu” [2 Nifae 28:30]. E ala i faaaliga faaletagata lava ia, e ‘to ifo’ i luga o o tatou agaga ‘e pei o le sau mai le lagi’ [Mataupu Faavae ma Feagaiga 121:45].”

—Sister Lisa L. Harkness, Fesoasoani Muamua i le Au Peresitene Aoao o le Peraimeri

“O i tatou taitoatasi o loo i se savaliga sopo. … Tatou te uia luitau o le sootaga, luitau tau tupe, ma luitau o le soifua maloloina o le mafaufau ma le tino. Tatou te uia tofitofiga lofituina ma a tatou lisi o mea e fai i aso taitasi. O nisi o i tatou e ono savalia le tiga, po o le tuuatoatasi pe musua. E eseese o tatou luitau, ae ua tofu i tatou uma (ma luitau).

“O le tausia o a tatou feagaiga e le faapea o le a aveesea ai nei luitau, ae o lona uiga ua folafola mai e le Alii le faatasi mai ia i tatou.”

—Sister Michelle D. Craig, Fesoasoani Muamua i le Au Peresitene Aoao o Tamaitai Talavou

“Ou te vaai faalemafaufau i le mana o le perisitua o se filo paepae se tasi, lelei, lamolemole lea e sau mai le Atua ma faamatasele i totonu ma fafo, i luga ma autafa, e foliga mai e i ai sana lava taitaiga i o tatou olaga. Ae o le aluga o taimi e faaalia ai se mamanu lavelave. O lena mamanu e ufitia ai le fata faitaulaga a le Atua, le nofoaga e sili ona paia lea tatou te fusifusia ai i le lalolagi ma fusifusia ai i le lagi. …

“Soo se taimi lava ou te vaai ai i se ie o le fatafaitaulaga i le malumalu paia, ou te lagona o se tasi o faatusa sili ona mamana o le malumalu ona o le auala e tuuina mai ai e le Alii Lona mana i Ana fanau faamaoni ina ia mafai ona faapotopoto ma fusia faatasi i se mamanu lavelave, paia.”

—Sister Sharon Eubank, Fesoasoani Muamua i le Au Peresitene Aoao o le Aualofa

“E ala i ou lava aafiaga o le olaga, ou te iloa ai o le tausia o poloaiga a le Alii, o le i ai o le faatuatua, ma le faalagolago atoatoa ia te Ia, o auala ia tatou te maua ai Lona mana o le perisitua. …

“… A o tatou tumau i le faamaoni, e mafai ona tatou maua na mana ma faamanuiaga o le perisitua i vaega uma o lo tatou olaga. E mafai ona tuuina mai ai ia i tatou le puipuiga, faamafanafanaga, malosi, filemu, ma folafolaga ia e oo atu i le faavavau. E ala mai i lena mana o le perisitua, e fesoasoani mai foi le Agaga Paia ia te au e manatua aafiaga i lo’u olaga ia e faaauau ai pea ona fausia la’u molimau ma le faatuatua i le Atua.”

—Sister Cristina B. Franco, Fesoasoani Lua i le Au Peresitene Aoao o le Peraimeri

“Ua mavae tausaga talu ona maua lo’u faamanuiaga faapeteriaka, ae ou te manatua lelei lava le aafiaga. …

“O lena aafiaga na mamanuina ai le tele o filifiliga sa ou faia i lou olaga atoa. Sa ou iloa e tatau ona faia la’u vaega ina ia iloa ai na faamanuiaga manaomia.

“Ua ou vaai nei o loo i ai se isi mea e finagalo lo tatou Tama ou te mauaina, e sili atu nai lo na o mea na taua i lou faamanuiaga faapeteriaka.”

—Sister Becky Craven, Fesoasoani Lua i le Au Peresitene Aoao o Tamaitai Talavou

“Sa ou auai i Le Ekalesia a Iesu Keriso o le Au Paia o Aso e Gata Ai i le 26 o ou tausaga. E ui lava ina sa ou maua se lagona mālū i totonu o lou loto a o ou mulimuli i le manao ina ia faamanuiaina e le Atua e ala i le osia o se feagaiga ma Ia, ou te iloa o lou malamalamaaga e uiga i lena feagaiga sa pei lava o se fatu itiiti i lena taimi.

“A o mavae atu tausaga ma a o ou faia se taumafaiga e tausia lena feagaiga o le papatisoga ma isi feagaiga na ou osia ma le Tama Faalelagi, ou te lagona ua Ia faamanuiaina au i se malamalamaaga loloto atu e uiga ia te Ia, e uiga i lou Faaola, ma e uiga i lou tiute o se afafine o le feagaiga a ni Matua Faalelagi.”

—Sister Reyna I. Aburto, Fesoasoani Lua i le Au Peresitene Aoao o le Aualofa