Pagsinati sa Gahum sa Pagkapari
Ang kababayen-an kinsa mitabang sa pagpangulo sa Simbahan gipangutana mahitungod kon sa unsang paagi nga ang gahum sa pagkapari nakaapekto sa ilang mga kinabuhi. Ania ang pipila sa mga hunahuna nga ilang gipaambit.
Mga paghulagway ni Matisse Hales
“Ang kalalakin-an ug kababayen-an adunay lainlain apan parehas ka importante nga mga responsibilidad sa panimalay ug sa Simbahan. Ang gahum sa pagkapari makatabang sa matag tawo nga mobuhat niadto nga mga responsibilidad alang sa kaayohan sa tanan.
“Tungod kay ang gahum sa pagkapari sa Dios ania sa yuta karon, ang talagsaong mga panalangin anaa para sa tanang takus nga mga miyembro sa Simbahan, bisan kon sila tigulang o batan-on, lalaki o babaye, minyo o dili.”
—Presidente Joy D. Jones, Kinatibuk-ang Presidente sa Primary
“Ang pagserbisyo mopalambo sa atong kalag, mopalapad sa atong panglantaw ug magtugot kanato sa paggamit kanunay sa gahum sa Dios. Nahibalo ang Ginoo niini, ug ingon man usab si Satanas. Sa iyang kanunay nga mabinantayon nga pagsulay sa pagpalayo kanato gikan sa gahum sa Dios, ang kaaway molupig kanato o mopabati kanato nga ang unsay atong matanyag dili igo. …
“… Ayaw gayud pagduhaduha sa usa ka buhat sa pagkamabination.
“Pinaagi sa tinuyo nga paglakip sa pagserbisyo sa uban nga kabahin sa atong kinabuhi, atong madiskubrihan ang mga misteryo sa Dios. Makadiskobre kita og kalinaw, makakaplag og kalig-on, ug makadawat og usbaw sa gahum samtang magserbisyo kita sa atong Manluluwas, si Jesukristo.”
—Presidente Bonnie H. Cordon, Kinatibuk-ang Presidente sa Young Women
“Kasagaran, ang kababayen-an motandi sa ilang kaugalingon ngadto sa uban. Apan walay usa kanato nga mobati og maayo niana nga pagkompara. Matag babaye adunay usa ka lahi nga kombinasyon sa mga abilidad ug mga talento, ug ang tanan hinatag sa Dios nga mga gasa. Tungod kay kamo ug ako dili managsama—o bisan unsang gidaghanon sa kababayen-an dili managsama—dili makahimo kanato nga mas minos o mas labaw. Kinahanglan natong makaplagan ang atong mga gasa ug palambuon kini, hinumduman kon si kinsa ang naghatag niini ngari kanato, ug dayon gamiton kini alang sa Iyang mga katuyoan. Samtang mopaambit kita sa atong mga gasa sa pagpanalangin sa uban, kita makasinati sa gahum sa pagkapari diha sa atong mga kinabuhi.”
—Presidente Jean B. Bingham, Kinatibuk-ang Presidente sa Relief Society
“Pangita kanunay og mga oportunidad sa pagpalambo sa inyong pagsabut sa ‘doktrina sa pagkapari.’ Matag usa kanato kinahanglan nga magtinguha niini nga pagsabut alang sa atong kaugalingon.
“Ang pagtuon sa mga kasulatan ug sa mga pulong sa mga propeta sa modernong panahon makahatag og lig-ong pundasyon aron molambo kini nga kahibalo. Mao usab ang pagkamasulundon sa mga sugo sa Dios ug pagpuyo nga matinud-anon sa mga pakigsaad nga atong gihimo pinaagi sa mga ordinansa sa pagkapari. Ang pagsabut ihatag kanato “pagtulun-an human sa usa ka pagtulun-an, lagda human sa usa ka lagda” [2 Nephi 28:30]. Pinaagi sa personal nga pagpadayag, kini ‘motuhop’ sa atong mga kalag ‘ingon sa mga yamog nga gikan sa langit’ [Doktrina ug mga Pakigsaad 121:45]. ”
—Sister Lisa L. Harkness, Unang Magtatambag sa Kinatibuk-ang Kapangulohan sa Primary
“Ang matag usa kanato anaa sa usa ka panaw. … Kita nagpanaw latas sa mga hagit sa relasyon, mga hagit sa pinansyal, ug sa mga hagit sa kahimsog sa pangisip ug panglawas. Kita nagpanaw latas sa bug-at nga mga buluhaton ug sa atong inadlaw-adlaw nga lista sa mga butang nga angayng buhaton. Pipila kanato tingali nagpanaw latas sa kasubo, o gani sa kamingaw o kalaay. Ang atong mga hagit managlahi, apan kitang tanan anaa niini.
”Ang pagtuman sa atong mga pakigsaad wala magpasabut nga kini nga mga hagit matangtang, apan kini nagpasabut nga ang Ginoo nagsaad nga magauban kanato.”
—Sister Michelle D. Craig, Unang Magtatambag sa Kinatibuk-ang Kapangulohan sa Young Women
“Akong gianinaw ang gahum sa pagkapari isip sa usa ka nag-inusara, pino, hamis nga puti nga hilo nga nagagikan sa Dios nga nagliyok-liyok, pasulod ug pagawas, pataas ug patuyok, nga daw adunay iyang kaugalingon nga direksyon sa atong kinabuhi. Apan paglabay sa panahon usa ka detalyado kaayo nga sundanan ang gipadayag. Kana nga desinyo nagtabon sa altar sa Dios, ang labing balaan nga dapit diin kita magbugkos dinhi sa yuta ug magbugkos didto sa langit. …
“Sa higayon nga makakita ko og usa ka panapton sa altar diha sa balaan nga templo, bation nako nga kini mao ang usa sa labing gamhanang mga simbolo sa templo kon sa unsang paagi nga ang Ginoo mipahulam sa Iyang gahum ngadto sa Iyang matinud-anong mga anak aron sa pagpundok ug paghiusa sa usa ka detalyado kaayo, balaan nga desinyo.”
—Sister Sharon Eubank, Unang Magtatambag sa Kinatibuk-ang Kapangulohan sa Relief Society
“Pinaagi sa akong kaugalingong mga kasinatian sa kinabuhi, nasayud ko nga ang pagtuman sa mga sugo sa Ginoo, pagbaton og hugot nga pagtuo, ug ang hingpit nga pagsalig Kaniya mao ang mga paagi nga kita makagamit sa Iyang gahum sa pagkapari. …
”… Samtang magpabilin kitang matinud-anon, makadawat kita niadto nga mga gahum ug mga panalangin sa pagkapari sa tanang aspeto sa atong kinabuhi. Kini makahatag kanato og panalipod, kahupayan, kalig-on, kalinaw, ug mga saad nga moabut ngadto sa kahangturan. Pinaagi niana nga gahum sa pagkapari, ang Espiritu Santo motabang usab kanako sa paghinumdom sa mga kasinatian sa akong kinabuhi nga nagpadayon sa paglig-on sa akong pagpamatuod ug hugot nga pagtuo sa Dios.”
—Sister Cristina B. Franco, Ikaduhang Magtatambag sa Kinatibuk-ang Kapangulohan sa Primary
“Mga tuig na ang milabay sukad nga akong nadawat ang akong patriyarkal nga panalangin, apan klaro kong nakahinumdom sa kasinatian. …
”Kana nga kasinatian mihulma sa daghang desisyon nga akong gihimo sa akong tibuok kinabuhi. Nasayud ko nga aron madawat kadtong gitinguha nga mga panalangin, kinahanglan himoon nako ang akong bahin.
”Karon nakita na nako nga gani adunay labaw pa nga gusto sa atong Amahan nga akong madawat, gani labaw pa kay sa gisulti sa akong patriyarkal nga panalangin.”
—Sister Becky Craven, Ikaduhang Magtatambag sa Kinatibuk-ang Kapangulohan sa Young Women
“Miapil ko sa Ang Simbahan ni Jesukristo sa mga Santos sa Ulahing mga Adlaw sa edad nga 26. Bisan tuod og ako adunay usa ka makapahupay nga pagbati sa akong kasingkasing samtang gisunod nako ang tinguha nga mapanalanginan sa Dios pinaagi sa paghimo og pakigsaad uban Kaniya, nasayud ko nga ang akong pagsabut niana nga pakigsaad sama lamang sa usa ka gamay nga binhi nianang panahona.
“Samtang milabay ang katuigan ug samtang naningkamot ko sa pagtuman niana nga pakigsaad sa bunyag ug ubang mga pakigsaad nga gihimo nako uban sa Langitnong Amahan, gibati nako nga Siya mipanalangin kanako og mas lawom nga pagsabut mahitungod Kaniya, mahitungod sa akong Manluluwas, ug mahitungod sa akong tahas isip usa ka anak nga babaye sa pakigsaad sa Langitnong mga Ginikanan.”
—Sister Reyna I. Aburto, Ikaduhang Magtatambag sa Kinatibuk-ang Kapangulohan sa Relief Society