Digital Lamang
Pagkat-on mahitungod sa mga Tradisyon sa Kristiyano Mihimo sa Pasko sa Pagkabanhaw nga Mas Makahuluganon Kanako
Human sa pagkuha og klase sa mga relihiyon sa kalibutan diha sa kolehiyo, nakaamgo ako nga makahimo ako sa Pasko sa Pagkabanhaw nga mas makahuluganon gani ngari kanako isip usa ka Santos sa Ulahing mga Adlaw.
Sa panahon sa usa ka semestre sa kolehiyo, samtang naglingkod ako sa usa ka gamay nga hawanan sa lekturanan sa pagkat-on mahitungod sa mga relihiyon sa tibuok kalibutan, ako kanunay nakakaplag og usa ka butang nga ikalabut sa akong personal nga panaw isip usa ka disipulo ni Jesukristo, mahimong usa ka ritwal, naggiya nga baruganan, o bersikulo sa sagradong basahon.
Ang labing importanting nakat-unan nga akong naangkon gikan sa klase mao ang kahibalo nga ang Dios nagdasig sa Iyang mga anak sa tanang dapit. Nakagusto ako sa unsay gisulti ni Elder Dieter F. Uchtdorf sa Korum sa Napulog Duha ka mga Apostoles:
“Pasidunggan ug tahuron nato ang matinuoron nga mga kalag gikan sa tanang mga relihiyon, bisan kon diin o kanus-a sila nabuhi, kinsa nahigugma sa Dios, bisan pa kon wala pa makabaton sa kahingpitan sa ebanghelyo. … Ato silang gihangop isip mga igsoon nga mga lalaki ug mga babaye, mga anak sa atong Langitnong Amahan. …
“Makadungog Siya sa mga pag-ampo sa mapainubsanon ug matinuoron sa matag kanasuran, pinulongan ug katawhan. Hatagan Niya og kahayag kadtong kinsa nagsiksik ug nagpasidungog Kaniya ug andam nga mosunod sa Iyang mga sugo.”1
Uban sa nagsingabut nga panahon sa Pasko sa Pagkabanhaw, ania ang pipila ka mga kalihokan nga makita sa tibuok kalibutan nga akong nakita nga makapadasig. Bisan og kita isip mga miyembro sa Simbahan wala magbuhat sa tanan niini nga mga tradisyon, ang pagtan-aw kon giunsa sa ubang pipila ka mga Kristiyano paghinumdom ang Manluluwas makatabang kanato sa paghimo sa atong kaugalingong mga pagsaulog sa Pasko sa Pagkabanhaw nga mas makahuluganon usab.
Kwaresma
Ang kwaresma usa ka tradisyon nga gisaulog sa pipila ka mga Kristiyano sa tibuok kalibutan. Usa kini ka panahon sa espirituhanong pagkamapainubsanon ug pagtubo nga nagsugod sa unom ka semana sa wala pa ang Pasko sa Pagkabanhaw diin ang mga tumutuo nangandam sa ilang mga kaugalingon alang sa pista opisyal pinaagi sa personal nga sakripisyo. Kini naglakip sa espesyal nga mga adlaw sa pagpuasa ug paghatag og halad. Sa panahon sa kwaresma, ang mga tumutuo usab giawhag sa paglikay gikan sa butang nga pisikal—sama sa usa ka paborito nga pagkaon, dula, salida sa TV, o lingaw-lingaw—ug ihalad ang sobra nga oras nga igahin unta niana butang ngadto sa espiritwal nga pagtuon ug pag-ampo.
Gusto ko sa ideya nga ang Pasko sa Pagkabanhaw mahimo nga usa ka makapausab nga kasinatian tali sa Manluluwas ug kanako. Isip mga Santos sa Ulahing mga Adlaw, kita wala magsaulog og Kwaresma, apan ang pagkat-on mahitungod niini nakahimo kanako sa paghatag og mas daghan sa akong panahon sa paghinumdom ug sa pag-andam sa espiritwal nga paagi alang sa Pasko sa Pagkabanhaw, ma-pinaagi man sa pagpuasa, pagtuon sa kinabuhi sa Manluluwas diha sa mga kasulatan, o gani paghimo sa buhat sa family history o indexing aron matabangan ako sa paghinumdom kon unsa ka dako ang kahulugan sa sakripisyo sa Manluluwas ngari kanako ug sa akong tanan nga mga katigulangan.
Mga Itlog sa Pasko sa Pagkabanhaw
Midako ako sa usa ka panimalay diin ang pagtina og nilapwaan nga mga itlog usa ka gimahal nga tradisyon. Sa pipila ka mga nasud sa Uropa (sama sa Ukraine ug Lithuania), ang proseso may pagkakuti. Imbis ang nilapwaan nga mga itlog yano nga tinaon, ang mga itlog lungagan nga walay mahabilin nga sulod, gilibutan og maanindot nga mga dibuho sa talo [wax patterns], ug dayon pinturahan. Ang nahuman nga produkto usa ka gibuslutan, walay sulod nga itlog nga nagsimbolo sa walay sulod nga lubnganan ug ang matahum nga paglaum nga dala sa Pagkabanhaw.
Kini sayon kaayo nga makalimtan ang gamhanan nga kahulugan luyo sa daghang mga tradisyon nga kita aduna, apan kini importante ang paghatag og higayon sa pagpamalandong kon unsay kahulugan niini ug giunsa kita pagtabang niini. Sa sunod higayon nga ako magtina og mga itlog, gusto ko nga mogahin og dugang pa nga panahon sa paghimo sa mabinantayong paagi og usa ka matahum nga reprersentasyon sa akong mga hunahuna.
Ang Panihapon sa Ginoo
Daghang mga Kristiyano ang nag-ambit sa Panihapon sa Ginoo, o sa sakramento. Mas nakakat-on ako og daghan mahitungod kon unsa ka simbolikanhon ang sakramento ug unsa ka importante kini ngadto sa daghang mga relihiyon, ilabi na sa Ang Simbahan ni Jesukristo sa mga Santos sa Ulahing mga Adlaw, mas nakaamgo ako nga kasagaran akong gihimo kanang matag semana nga gasa nga bale-wala.
Daghang mga Kristiyano naghatag og importansya diha sa pagpangandam alang sa sakramento sa mental ug espiritwal nga paagi sa dili pa sila moambit. Natandog ako pinaagi sa gahum nga gihuptan niana nga sakramento alang niini nga mga tumutuo tungod sa ilang pagpangandam. Ang ilang ehemplo nakahimo kanako sa paghunahuna sa akong kaugalingong pagpangandam alang sa sakramento. Nakahunahuna ako karon sa daghang mga paagi nga makapangandam ako sa espirituhanon nga paagi alang sa sakramento matag semana, naghimo sa ordinansa nga makahuluganon sa akong kinabuhi samtang ako nagtutok diha sa unsa ang tinuod nga gisimbolo niini.
Pagkat-on gikan sa Uban
Sa tibuok kalibutan, ang mga katawhan nagsaulog sa lain-lain, apan kinasingkasing, nga mga paagi. Sa Espanya, mga kampana sa simbahan mohunong sa pagbagting og pipila ka mga adlaw sa wala pa ang Pasko sa Pagkabanhaw aron pasidunggan ang pag-antus ug pagkamatay ni Kristo, ug dayon mobalik sila sa Pasko sa Pagkabanhaw. Sa Russia, pamilya, mga higala, ug mga estranghero magtimbayahay sa usag usa pinaagi sa pag-ingon og, “Nabanhaw Siya,” ug ang laing tawo motubag, “Sa tinuod nabanhaw Siya.”
Gisaulog ang Pasko sa Pagkabanhaw sa labing malipayong panghitabo sa kasaysayan sa kalibutan, usa ka hitabo nga ako nagkuha og nagpadayon nga paglaum. Ang mga ehemplo sa mga tumutuo ug mga kultura sa tibuok kalibutan nagpahinumdom kanako sa paghimo sa akong pagsaulog nga makahuluganon uban sa mahunahunaong pagpangandam ug sa paghalad pa og dugang panahon nga mas magpaduol pa ngadto sa Dios. Ug labing importante, sila nagpahinumdom kanako nganong magsaulog kita niini nga pista opisyal ug sa unsang paagi kini makadala kanato nga mas duol ngadto ni Kristo.