Digital Lamang
Sakramento atol sa Quarantine: Usa Ka Daklit nga Pagtan-aw sa Gugma sa Dios
Ang pagpangalagad sa sakramento diha sa panimalay nagpahinumdom kanako pag-usab nga mas klaro sa tinuod nga kahulugan niini.
Usahay ang kapamilyar ug ang naandan nga buhat adunay kalagmitan nga mokawat sa sagradong mga higayon sa ilang hingpit nga kahulugan. Alang kanako, ako mitugot sa sakramento nga mawad-an sa pipila niining gitinguha nga kahulugan. Matag semana, naminaw ako sa sagradong mga pag-ampo sa sakramento samtang milingkod sa hapit samang bangko diha sa samang chapel, gilibutan sa usa ka pamilyar nga kongregasyon.
Apan ang COVID-19 nga pandemya miputol niini nga naandan nga buhat ug giusab ang akong talan-awon.
Wala makaapil sa uban diha sa chapel, nakaplagan ko ang akong kaugalingon nga nagdawat sa sakramento sa usa ka bag-ong kahimtang––nagpundok libut sa akong lamesa nga kan-anan uban sa akong gamay nga pamilya. Ang paghimo og butang nga pamilyar ug naandan dinhi niining bag-ong dapit midala og usa ka lab-as nga talan-awon ug, uban nianang bag-o nga talan-awon, gibag-o nga kahulugan.
Bisan og ako nakaapil sa ordinansa sa sakramento gatusan ka higayon sa akong kinabuhi, ang paghimo niini diin ako kasagaran nag-uban sa akong pamilya alang sa pagkaon ug panagsinultihanay mipatigbabaw ang sama sa pamilya nga mga paghagawhaw sa sakramento sa mga paagi nga ako wala midayeg kaniadto.
Usa ka piho nga Dominggo, samtang ako miluhod ug militok sa mga pulong, “Kami mangayo kanimo pinaagi sa ngalan sa imong Anak, si Jesukristo” (Moroni 4:3), ang akong atensyon miadto sa akong mahal nga kwatro anyos ang panuigon nga anak nga lalaki naglingkod sikit kanako. Didto siya milingkod uban sa iyang mga bukton nga gikyugpos, naminaw sa pag-ampo, nagdan-ag og ka inosente ug kamaayo.
Uban niining masanag nga panan-aw diha sa akong hunahuna, mipadayon ako sa paghalad sa pag-ampo. Samtang naglitok ako sa mga pulong, “sa lawas sa imong Anak,” usa ka pangutana misulod sa akong hunahuna. Sama kaha kini sa unsa ang andam sa pagsakripisyo niining walay sala nako nga anak ug itugyan siya ngadto sa dili matugkad nga kasakit ug pag-antus?
Sa usa ka pulong, dili katuohan.
Namalandong niining imposible nga pangutana, mipadayon ako sa pag-ampo. Ang mga pulong nga “sa pagdala nganha kanila sa ngalan sa imong Anak” midala og laing pangutana sa akong hunahuna. Ang Dios usa usab ka Amahan. Giunsa nga nakaako Siya sa pagsakripisyo sa Iyang Anak? Samtang gitan-aw ko ang akong ubang mga sakop sa pamilya, kinsa, sama kanako, nanginahanglan pag-ayo sa sakramento, ang yano apan tulukibon nga tubag miabut: balaan nga gugma (tan-awa sa Juan 3:16).
Daw ingon og ang mga tamboanan sa langit giablihan og kadiyot sa pagpadayag og usa ka bahin sa putli nga gugma sa atong Langitnong Amahan—hilabihan ka dako nga gugma nga Siya misakripisyo sa Iyang tinuod inosente, hingpit nga Anak alang kanato, Iyang uban nga mga anak.
Naghunahuna niini nga sakripisyo, walay pagsapayan sa mga kalisdanan ug sa pagkadili makiangayon sa kinabuhi—lakip ang usa ka makamatay nga pandemya, nabalda nga ekonomiya, sibil nga kagubot, usa ka dili matuohon nga kalibutan, ug kinatibuk-ang walay kasiguroan—sa unsang paagi kita seryosong magduha-duha sa Iyang gugma alang kanato?
Aron dili kalimtan, ang sakramento nagsilbi isip usa ka sinemana nga pahinumdom niining lig-on ug malungtaron nga gugma. Sa naandang paghunahuna sa dili hitupngan nga gasa sa Iyang Anak, kita makakaplag og paghupay ug pagbuntog sa tintasyon sa pagduha-duha sa gugma ug pagpakabana sa Amahan alang kanato atol sa mahagitong mga panahon.
Walay tukma nga paghunahuna sa mahangturong pagka-amahan sa Dios ug sa Iyang tahas sa Pag-ula ni Jesukristo, ang sakramento nga ordinansa akong gibati nga dili kompleto ngari kanako karon. Kini nagbarug isip usa ka kanunay nga pahinumdom kanako sa sakripisyo ni Jesukristo ug sa pagpahayag sa gugma sa Langitnong Amahan alang kanako.
Ug kini tungod niini nga leksyon sa gugma nga kanunay kong mahalon ang atong kasinatian sa sakramento diha sa atong panimalay.