Ngaahi Tefitoʻi Moʻoni ʻo e Ngāue Fakaetauhí
Ngāue Fakaetauhi ʻaki e Fakakaukau ki he Moʻui Lelei Fakaeʻatamaí
ʻE lava ke tau vahevahe atu e ʻofa ʻa e Fakamoʻuí mo kinautolu ʻoku nau moʻui ʻi he faingataʻaʻia fakaeʻatamaí mo e fakaelotó.
Naʻe fakatokangaʻi ʻe ha faʻē kei talavou ʻokú ne fefaʻuhi mo e loto-mafasiá. Naʻá ne ngāue mo e kau toketaá ke maʻu e faitoʻo totonú, ka naʻe kiʻi fuofuoloa e ngāue ki aí. Naʻe ʻi ai ha ʻaho ne fuʻu faingataʻa ʻaupito ki ai, peá ne fetuʻutaki fakavavevave ki heʻene toketaá. Naʻá na fakatou tui leva ʻoku totonu ke ʻave ia ki he falemahakí.
Naʻe ʻaʻahi fakataha mai e kāingalotú, tokangaʻi ʻene fānaú, pea tokoni ki hono ngaohi e meʻatokoní. Hili ha ngaahi uike mo e māhina mei ai, koeʻuhí ko e loto-mafasia ʻa e fefiné naʻe faingataʻa ai ki ai ke ne kole ha tokoni, ko ia ne ako leva ʻa e kāingalotu ʻi he uōtí ke ʻuluaki foaki atu ha tokoni.
Naʻe pehē ʻe he fefiné kimui ange, naʻe tataki fakalaumālie e ngaahi tokoni ko iá, ʻi he taimi pē naʻe fuʻu fie maʻu lahi taha ai iá. Naʻá ne pehē ko e taha ʻo e ngaahi meʻa mahuʻinga taha naʻe hoko he taimi ko iá ko hono ʻiloʻi ʻoku tokangaʻi ia ʻe hono kāingá pea ʻoku nau loto-fiemāie ke tokoniʻi ia. Naʻá ne ongoʻi e ʻofa ʻa e Fakamoʻuí mei he tokoni ʻa e kāingalotu ʻi hono uōtí. Naʻá ne ʻiloʻi ʻokú Ne ʻafioʻi ia mo ʻene ngaahi faingataʻaʻiá pea ʻi Heʻene tokoní naʻá ne lava ai ʻo kātekina hono ngaahi faingataʻaʻiá ʻaki e tuí.
Ngaahi Fakakaukau ki he Ngāue Fakaetauhí
Ko e meʻa angamaheni pē ʻa e fokoutua fakaeʻatamaí mo fakaelotó, neongo ʻoku ʻi ai ha niʻihi tokolahi he ʻikai fie maʻu ia ke leleakiʻi ki falemahaki. ʻOku meimei ke maʻu e ngaahi faingataʻaʻia ko ʻení ʻe he kau mēmipa ʻo e uooti pe kolo kotoa pē. ʻE lava ke ne uesia e kakai mei he fonua mo e tapa kotoa pē ʻo e moʻuí.
ʻI hoʻo ngāue fakaetauhí, mahalo te ke felongoaki ai mo ha taha ʻoku ʻi ai ʻene faingataʻaʻia fakasōsiale pe fakaeloto. Kapau ʻe hoko ia kiate koe, kātaki ʻo fakakaukau ki he faleʻi meia Palesiteni Henelī B. ʻAealingi ko e Tokoni Ua ʻi he Kau Palesitenisī ʻUluakí: “ʻI he taimi te ke fetaulaki ai mo ha tahá, fakakaukau pē ʻoku nau mātuʻaki faingataʻaʻia moʻoni, pea meimei ke tonu maʻu pē hoʻo fakafeangaí.”1 ʻE malava pē ke hoko ʻa e palopalema fakaʻatamai, fakasōsiale, pe fakaelotó ko ha ʻuhinga ʻoku faingataʻaʻia ai ha tahá.
Ko e niʻihi ʻeni ʻo e ngaahi fakakaukau ki he anga ʻo e ngāue fakaetauhí:
-
Fakafanongo ke ke ako. Fakaʻatā ʻa e tokotahá ke ne vahevahe ki he lahi tahá pe ʻi he fakamatala nounou tahá ʻo fakatatau ki heʻene ongoʻi fiemālie ke fetuʻutakí. ʻOkú ke tokoniʻi ia ʻi hoʻo fakafanongó pē; mahalo te ke maʻu ha ueʻi fakalaumālie ki ha ngaahi founga ke ʻoatu ai ha fakafiemālie. (Ki ha ngaahi fakakaukau lahi ange, vakai, “Meʻa ʻe Nima ʻOku Fai ʻe he Kau Fakafanongo Leleí,” Liahona, Sune 2018, 6–9.)
-
Fakahaaʻi ʻo e manavaʻofá. Feinga ke kamataʻi mo fakaʻosi e fengāueʻaki kotoa pē ʻaki hano fakahaaʻi moʻoni ʻo e ʻofá mo ha tokanga fakamātoato ki he tokotaha ko iá. (Ki ha ngaahi fakakaukau lahi ange, vakai, “Ala Atu ʻo Tokoni ʻi he Manavaʻofa,” Liahona, Siulai 2018, 6–9.)
-
Fakahoko ha tokoni. ʻOku ʻikai ke faingofua mo vave e fakaakeake mei he ngaahi faingataʻaʻia fakasōsialé pe fakaelotó. ʻE ʻi ai ha ngaahi taimi te ne loto ai ke tuku ange hano kiʻi taimi pe mahalo naʻa kole tokoni. Fai ha tokoni ʻi he taimi mo e founga ʻoku lava ai ʻe he tokotahá ʻo tali lelei iá. (Ki ha ngaahi fakakaukau lahi ange, vakai, “Ko Hono Fakatupulaki ʻo e Loto-ʻOfa ke Ngāue Fakaetauhí,” Liahona, Fēpueli 2019, 8–11.)
-
Fealeaʻaki mo e kau takí. ʻOku ʻikai ke ke tuēnoa. Kumi tokoni mei he kau takí mo e niʻihi kehé. Kapau ʻe fakangofua, vahevahe e ngaahi fiemaʻu ʻa e tokotaha faingataʻaʻiá mo e ngaahi founga ʻe malava ai ke fai ha tokoní. (Ke maʻu ha ngaahi fakakaukau lahi angē, vakai, “Ko e Kumi Tokoni ke Tokoniʻi ʻa e Niʻihi Kehé,” Liahona, ʻOkatopa 2018, 6–9.)
Fakatokanga‘i ange: Kapau ʻoku ngali tuʻu fakatuʻutāmaki e tokotaha ʻokú ke ngāue fakaetauhi ki aí, kiate ia pe niʻihi kehe, mahalo naʻa sai ke tokoni mai e kau maʻu mafai totonú.