Pagkaibog sa Sama og Sekso: Nahisakop Kamo

Kon nakasinati kamo og pagkaibog sa sama og sekso, hibaloi nga ang Dios nahigugma kaninyo. Adunay usa ka dapit alang kaninyo sa Iyang gingharian.

Alang ni bisan kinsa nga nakasinati og pagkaibog sa sama og sekso, tingali naghunahuna kamo kon mohaom ba kamo sa Simbahan, o gani kon magamit ba ang plano sa kalipay sa Dios diha kaninyo.

Ang inyong mga pagbati tingali daw mosukwahi sa daghang mga gilaoman. Tingali naghunahuna kamo: “Nganong nahitabo man kini kanako? Nahigugma ba gayod ang Dios kanako? Aduna bay dapit alang kanako sa Iyang gingharian?”

1. Ang Dios Nahigugma Kaninyo

Ang unang butang nga angayng mahibaloan mao nga ang Langitnong Amahan nahigugma kaninyo. Ang gugma sa Dios hingpit, malungtaron, ug makapahibulong. Ug Siya nahigugma kaninyo sa tinagsa-tagsa. Nakaila Siya sa inyong ngalan.

Si Presidente Dieter F. Uchtdorf, kaniadto Ikaduhang Magtatambag sa Unang Kapangulohan, mitudlo:

“Ang Dios dili magtan-aw sa panagway sa gawas sa tawo. Ako mituo nga Siya wala maghunahuna bisan gamay kon kita nagpuyo ba sa usa ka palasyo o sa usa ka payag, kon kita ba gwapo o yano, kon kita ba inila o kinalimtan. Bisan kita dili hingpit, hingpit ang gugma sa Dios kanato. Bisan kita dili perpekto, perpekto ang gugma Niya kanato. Bisan og gibati nato ingon og nawala ug walay kompas, ang gugma sa Dios hingpit nga naglib[o]t kanato.

“Iya kitang gihigugma tungod kay Siya puno sa walay sukod nga balaan, lunsay ug dili mahulagway nga gugma. Importante kita sa Dios dili tungod sa atong résumé apan tungod kay kita Iyang mga anak. Siya nahigugma kanatong tanan” (“Ang Gugma sa Dios,” Okt. 2009 nga kinatibuk-ang komperensiya [Liahona, Nob. 2009, 22]).

“Ang Dios nahigugma kanatong tanan. Nahigugma Siya niadtong nahisakop sa lain-laing mga tinuohan ug niadtong walay bisan unsang tinuohan. Nahigugma Siya niadtong nag-antos. Pareho Siyang nahigugma sa adunahan ug kabos. Nahigugma Siya sa matag kaliwat ug kultura, sa minyo o dili minyo, ug niadtong kinsa nakasinati og pagkaibog sa sama og sekso” (ChurchofJesusChrist.org/topics/gay).

2. Nahisakop Kamo

Kitang tanan managlahi sa lain-laing paagi. Kita adunay managlahi nga mga kaliwat, mga kagikan, mga kaagi, ug mga kultura. Ang uban kanato natawo nga ang ilang mga ginikanan miyembro na sa Simbahan; ang uban mga bag-ong kinabig. Ug ang uban nakasinati og pagkaibog sa sama og sekso, samtang ang uban wala.

Kitang tanan nahisakop. Ang karaang Apostol nga si Pedro mitudlo, “Ang Dios walay pinalabi: Ang mahadlokon kaniya ug nagbuhat sa matarong iyang dawaton bisag taga-diin pa siya” (Mga Buhat 10:34–35). Iyang gipasabot nga ang tanan nga maningkamot sa pagsunod sa mga sugo makadawat sa Iyang mga panalangin, bisan unsa pa ang ilang kaagi.

Si Elder L. Whitney Clayton, emeritus nga sakop sa Seventy, mitudlo: “Ako karon direkta nga mamulong ngadto sa mga miyembro sa Simbahan kinsa nakasinati og pagkaibog sa sama og sekso. … Gusto kami nga makahibalo kamo nga kami nahigugma kaninyo. Welcome kamo. Gusto kami nga kamo mahimong kabahin sa among mga kongregasyon. Kamo adunay talagsaon nga mga talento ug mga abilidad nga ikatanyag sa gingharian sa Dios dinhi sa yuta, ug giila namo ang daghang bililhon nga mga kontribusyon nga inyong gihimo” (ChurchofJesusChrist.org/topics/gay).

3. Dangop ngadto sa Dios—Siya Motabang Kaninyo

Bisan tuod kita walay mga tubag kanunay kon ngano nga ang mga butang mahitabo sa atong kinabuhi, nasayod kita nga ang Langitnong Amahan nasayod sa unsay inyong giagian. Ug tungod sa Pag-ula sa Iyang Anak, si Jesukristo, ang tanang anak sa Dios makakaplag og grasya, mapanalanginan, ug makabalik ngadto Kaniya.

Busa kon kamo nakasinati og pagkaibog sa sama og sekso, unsay inyong buhaton karon?

Aniay nakatabang sa usa ka young adult samtang nakaamgo siya nga nakasinati siya og pagkaibog sa sama og sekso:

“Mihimo ako sa desisyon gikan sa sinugdanan gayod nga dapiton ang Dios diha sa matag lakang sa akong panaw, ug kana nahimo nga usa ka espirituhanong kasinatian alang kanako.

“Dili ako makatag-an kon unsa kaha ang akong kinabuhi sulod sa mosunod nga 20 ka tuig. Dili nako hingpit nga malantaw ang akong mahangtoron nga potensiyal, ug wala kaayo ako masayod kon unsa ang akong gikinahanglan nga kahupayan o direksiyon, apan ang Dios nasayod sa tanan niana nga mga butang. Wala ako masayod kon giunsa nako paglahutay ang miaging pipila ka tuig kon wala ang Iyang tabang.

“Ang yano nga mga butang—pag-ampo, pagtuon sa kasulatan, pagtambong sa templo ug simbahan—makahimo gayod og kalainan. Kini nakahatag og kalig-on ug suporta gayod sa akong kinabuhi karon kay sa kaniadto. Ang Langitnong Amahan mas nakaila kanako kay sa akong pagkaila sa akong kaugalingon, mao nga dili kinahanglan nga motago gikan Kaniya. Mangayo ako Kaniya og tabang ug mosalig nga gusto Niya ang akong kalipay labaw pa kay sa akong gitinguha. Naningkamot usab ako nga pahibaloon ang uban nga nagkinahanglan ako og gakos o usa ka pahinumdom nga sila nahigugma kanako. Akong nakat-onan nga wala gayod nako kinahanglana nga molahutay sa mga kalisod nga mag-inusara.”

Laura F., Utah

4. Makakaplag Kamo og Kalinaw

Gusto sa Langitnong Amahan nga makakaplag kamo og kalinaw ug kalipay. Gusto Niya nga higugmaon ninyo ang inyong kaugalingon ug mangita og kalipay sa inyong mortal nga panaw. Ug Siya maanaa uban kaninyo sa tibuok nga kasinatian—bisan sa mga panahon nga mobati kamo nga wala kamo mahisakop. Nahisakop kamo Kaniya—ug kanunay gayod kamong mahisakop.

Alang sa dugang nga impormasyon, adto sa ChurchofJesusChrist.org/topics/gay.