Pagdawat sa Imong Kaugalingon nga Pagpadayag
Atol sa COVID-19 nga pandemiya, usa ka klerk sa ward ang nakadesisyon sa pagpakigbahin og sinemana nga espirituhanong mga panghunahuna ngadto sa mga miyembro sa iyang ward tungod kay sila dili pwede nga magpundok. Kini ang usa ka sulat nga iyang gipakigbahin mahitungod sa iyang mga kasinatian uban sa personal nga pagpadayag isip usa ka young adult.
Minahal nga mga higala sa ward,
Sa miaging semana, ang “bag-ong” Liahona nga magasin sa Simbahan miabot. Samtang nagsugod ko sa pagbasa niini, akong nabantayan nga ang propeta, si Presidente Russell M. Nelson, naghisgot na usab kabahin sa panginahanglan alang sa personal nga pagpadayag.1
Kini nakapahinumdom kanako sa mga kasinatian uban sa personal nga pagpadayag sa akong kaugalingong kinabuhi. Sa dihang nag-eskwela ko sa Brigham Young University, nahigugma ko sa usa ka batan-on nga dalaga nga ginganlan og Kathy (ang ngalan giusab). Kanunay mi nga lingaw kaayo kon magkuyog. Siya utokan kaayo ug matahom. Nakagusto siya kanako, apan ako nahigugma kaniya.
Human sa duha ka tuig, mogradwar na siya ug mobiya. Nag-ampo ko ug nangamuyo sa Ginoo kon ako ba kaha nga ingnon si Kathy nga makigminyo nako. Ang tubag nga akong nadawat kay usa ka gamhanan kaayo nga oo, ug mahinamon kaayo ko. Sa dihang ako siyang giingnan, misulti siya nako nga kinahanglan siya nga mag-ampo kabahin niini. Nakahibalo ko nga siya nagkinahanglan usab sa iyang kaugalingon nga pagsaksi. Apan dako ang akong kahikurat sa dihang iya ko nga gipahibalo nga siya nag-ampo ug nagpuasa ug ang tubag sa Ginoo kaniya kay dili.
Naminghoy ko, nasuko, ug naulaw. Naglagot kaayo ko sa Dios. Nganong Iya man kining gibuhat kanako? Naglakaw ko sa ngitngit, diha sa karsada nga napuno sa niyebe nga nakig-istorya sa Langitnong Amahan sa taas nga higayon. Dayon Siya misulti: “Eksakto ang pagpangutana nimo kaniya, ug eksakto siya sa pagsulti og dili.”
Nakurat ko. Kon oo ang akoa, nan kinahanglan oo usab alang niya! O mao na ang akong gihunahuna.
Nakat-on ko og hilabihan ka importante nga leksiyon: Duha ka managlahi nga tawo makadawat og duha ka managlahi nga tubag sa tukma ka parehas nga pangutana. Unsay eksakto sa usa ka tawo dili kanunay nga eksakto sa laing tawo.
Taudtaod gayod usa pa nako nasabtan kini nga panghitabo ug ang tipik sa rason alang niini. Human ko migradwar ug mibalik sa akong pinuy-anan sa Houston, Texas, USA, nakadawat ko og tawag gikan ni Kathy. Nakadesisyon siya nga mokuha og master’s degree—sa Houston. Nag-abang pa gani siya og usa ka apartment sa samang complex diin ako nagpuyo.
Ang kalainan mao nga nakig-date na ko ni Marjorie nianang higayona. Gihigugma nako siya ug nasayod nga gusto ko nga mangasawa niya. Apan nahigugma usab ako ni Kathy kaniadto. Tingali lisod gayod unta kaayo ug makalibog alang kanako ang paghimo sa desisyon sa paghangyo ni Marjorie nga makigminyo nako kon wala pa ako molihok sa mga impresyon uban ni Kathy sa mga tuig nga milabay. Ang akong kasinatian nianang puno sa niyebe nga gabii sa Utah nakatabang nako nga dili mag-atras-abante o magduhaduha sa akong desisyon. Ug human dayon niana, si Marjorie ug ako na-engage ug dayon naminyo.
Tanang tawo nakadawat sa ilang kaugalingong pagpadayag. Kini personal ug indibidwal. Ako gihatagan sa tubag nga eksakto alang kanako, ug si Kathy gihatagan sa eksakto nga tubag alang kaniya.
Matag usa kanato may katakos sa pagpadayag. Ang uban, sama sa atong kapikas, atong mga ginikanan, o kadtong mga lider sa Simbahan kansang pagbantay kita nahisakop, mahimong naaghat usab, apan atong responsibilidad ang pagkompirmar sa tanang pagpadayag alang sa atong kaugalingon.
Mga tuig ang milabay, nagtrabaho ko kauban ang usa ka tawo sa usa ka proyekto. Nag-eskwela ko sa graduate school, minyo ug adunay tulo ka gagmayng anak. Samtang ang semester padulong na nga mahuman, akong gisultihan kini nga tawo nga naghunahuna ko nga moundang og eskwela. Pipila ka adlaw human niana giingnan ko niya nga nag-ampo siya mahitungod niini ug mibati nga ako kinahanglan nga magpabilin sa pag-eskwela. Mitanyag pa gani siya nga motabang nako sa pinansiyal nga paagi. Mabination kadto nga tanyag, apan samtang giampo nako kini sa akong kaugalingon, gibati nako nga ang labing maayo alang kanako ug sa akong pamilya mao ang pagbalik nako og trabaho nga full-time.
Kini nga tawo nasuko og maayo nako tungod kay wala nako gidawat ang “pagpadayag” nga iyang nadawat alang kanako. Kon unsay iyang gitanyag usa lamang ka sugyot, ug sa dihang akong gihan-ay ang tanan nakong opsiyon, nakahibalo ko nga dili kini maoy gikinahanglan sa akong pamilya ni ang gusto sa Ginoo nga akong buhaton. Ang Langitnong Amahan nakahibalo kon unsa ang umaabot. Dili lang dugay human niana, si Marjorie nasakit ug kinahanglan nga operahan. Lisod unta kaayo mi kon estudyante pa ko nga walay health insurance.
Ang pagpadayag personal kaayo nga butang. Kini usa ka talagsaon nga butang. Kitang tanan mahimong makadawat niini. Kini kinahanglan nga gikan sa Ginoo, ug kita kinahanglan nga mokompirmar nga kini mao ang unsay Iyang gusto alang kanato. Samtang kita mosunod sa Iyang personal nga mga pagpadayag kanato, kita mapanalanginan kaayo. Nakahibalo ko nga ako napanalanginan.
Hinaot nga kamo adunay maanindot nga semana.
—Mark