Nakahimo ba Gayod Ako og Kalainan pinaagi sa Pagpangalagad?

Ni Paige Bryson

Kon kita molihok inubanan sa hugot nga pagtuo ug uban sa gugma, ang matag paningkamot adunay bili.

Daghan kaayo kita og gihisgotan kabahin sa pagpangalagad diha sa Simbahan. Ug sa makadaghang higayon, ang ideya nga akong nasabtan kabahin sa pagpangalagad mahimong usbon sa pagkasulti isip “pangita og usa ka panginahanglan, tubaga kana nga panginahanglan.” Mao kadto ang mga istorya nga gihulagway diha sa pulpito sa mga pakigpulong sa kinatibuk-ang komperensiya. Mao kadto ang mga istorya nga nahimong ilado nga mga ehemplo sa pagpangalagad. Ug bisan tuod og kini nga mga istorya nahitabo gayod, dili lamang kini ang mga kahigayonan nato nga makapangalagad. Sa akong kasinatian, dili gani kini ang labing sagad nga mga paagi sa pagpangalagad.

Kasagaran, kon mangutana kita niadtong kinsa atong gipangalagaran kon unsa ang ilang gikinahanglan, motubag sila nga wala sila magkinahanglan og bisan unsa; naa ra ang tanan nila nga gikinahanglan. Alang sa usa ka tawo kinsa tinuoray nga naningkamot sa pagtuman sa ilang calling sa pagpangalagad, kana usa ka makapaluya nga tubag. Dihadiha dayon, tingali mosugod sila sa pagbati nga daw wala na gayod silay mahimo aron makaserbisyo niana nga tawo.

Apan unsa kaha kon kita maghunahuna og labaw pa sa pagtubag sa mga panginahanglan ngadto sa tinud-anay nga pag-atiman sa uban sama sa gihimo ni Jesukristo? Unsa kaha kon kita mangalagad pinaagi sa yano nga pagsunod sa malumo, madagayaon nga mga pag-aghat kabahin niadtong atong gipangalagaran? Si Elder Gerrit W. Gong sa Korum sa Napulog Duha ka Apostoles hingpit nga mipasabot niini sa dihang siya miingon, “Matag adlaw, sa dili maihap nga mga paagi, matag usa kanato magkinahanglan ug pwedeng makatanyag og pagpangalagad sa gugma ug suporta sa ginagmay, yano, gamhanan, makapausab sa kinabuhi nga mga paagi.”¹

Uban sa mga lider sa Simbahan nga nag-awhag kanato sa pagpangita og ginagmay ug yano nga mga paagi sa pagpangalagad, unsa man ang makapugong kanato? Nan, usahay ang atong kaugalingong mga hunahuna maoy makababag. Usa sa mga butang nga nakapugong sa akong mga paningkamot sa pagpangalagad mao ang wala pagkahibalo kon ang akong mga paningkamot “aduna bay bili.” Ang ato ba nga mga paningkamot sa pagpangalagad adunay bili kon kini dili piho, makita nga mga buhat sama sa pagtanyag og pagkaon o pagpasakay?

Oo, kini adunay bili.

Ang ato ba nga mga paningkamot sa pagpangalagad adunay bili kon kini wala tagda o walay balos?

Oo, kini adunay bili.

Sa matag higayon nga kita mosunod sa Espiritu aron sa pagbuhat, gipakaon nato ang mga karnero ni Kristo.

Sama sa gisulti ni Sister Jean B. Bingham, Kinatibuk-ang Presidente sa Relief Society: “Usahay maghunahuna kita nga kinahanglang mobuhat kita og usa ka butang nga bililhon kaayo ug bayanihon aron ‘maihap’ isip pagserbisyo sa atong mga silingan. Apan ang yano nga mga buhat sa serbisyo mahimong adunay lawom nga mga epekto sa uban—ingon man sa atong mga kaugalingon.”²

Ang pagpangalagad magsugod sa usa ka yano nga tinguha sa pagserbisyo sa uban ug kasagaran naglangkob sa pagbuhat sa ginagmay nga espirituhanong mga pag-aghat. Makaampo kita kanunay alang sa tabang aron makahibalo unsaon nga labing makaserbisyo niadtong atong gipangalagaran, apan aniay pipila ka paagi nga kita makapanindot sa adlaw niadtong mga anaa sa atong palibot:

Pagpakigbahin og usa ka podcast.
Dad-i sila og paniudto sa trabahoan.
Dapita sila sa paglingaw-lingaw uban nimo ug sa imong mga higala.
Pahulama sila og kopya sa imong paborito nga basahon.
Pagsugod og grupo sa panihapon, grupo sa pagbasa, o uban nga matang sa panagpundok.
Tambong sa usa ka kalihokan nga ilang giplano.
I-follow sila ug positibo nga makiglambigit nila sa social media.
Pag-andam ug apil sa leksiyon nga ilang gitudlo diha sa simbahan.

Dayag lang, dili kini ang kompleto nga lista—aduna pay walay kataposang mga paagi nga kita makapangalagad, labi na samtang kita mangita og pagpadayag aron masabtan ang mga panginahanglan niadtong atong giserbisyohan. Makaampo kita alang sa Espiritu aron moaghat kanato og mga hunahuna kon unsaon nga kita makaatiman sa mga indibidwal, kini pinaagi man sa pagmugna og panaghigalaay, pag-amuma og panaghiusa, o pagpalambo sa pagbati nga nahisakop.

Samtang kita mohimo og paningkamot nga aktibong mangalagad sa uban, hinumdoman usab nato nga tugotan ang uban nga mangalagad ngari kanato. Dapat dili ikaw ang magpasiugda sa “Wala ko manginahanglan og bisan unsa; naa ra ang tanan nga akong gikinahanglan” nga panghunahuna. Tugoti ang imong tigpangalagad nga mga brother o mga sister nga makig-ilaila nimo ug paningkamot usab nga mailaila sila. Pangita sa wala damha nga mga paagi nga ikaw gipangalagaran ug pasalamati sila. Palapdi ang imong konsepto sa pagpangalagad, ug hinumdomi, kon ikaw mobuhat inubanan sa hugot nga pagtuo ug gugma, ang imong mga paningkamot adunay bili.