Pagpangita sa Kahayag Kon Ikaw Gipalibotan sa Kangitngit
Ako nalisang ug wala makahibalo kon unsaon nako sa pagpadayon, apan ang Langitnong Amahan nasayod kon unsa ang akong gikinahanglan.
Pipila ka tuig ang milabay, ang akong mga higala ug ako mibiyahe ngadto sa Ireland. Samtang naa kami didto, ako ang drayber sa among grupo. Sa sinugdanan, nagtuo ko nga hadlok kaayo ang magmaneho sa pikas nga bahin sa dalan diha sa usa ka langyaw nga nasod, mao nga nasurprisa ko sa dihang ang pagmaneho nahimong natural ra kanako. Dili kay kausa lang atol sa biyahe nga mibati ko og kahadlok samtang nagmaneho sa hagip-ot, libaongon, ug liko-liko nga mga dalan.
Mao kana, hangtod sa adlaw nga kami nakaeskedyul na nga mopauli.
Ang among biyahe sa eroplano padulong og uli mobiya og sayo kaayo sa buntag, mao nga ang akong unom ka higala ug ako nagduka pa nga naghuot og lingkod sa sulod sa among kotse sa alas 4:00 sa buntag. Mga usa ka oras nga pagmaneho, ako lamang ang nag-inusarang nagmata. Hilom kadto, nag-ulan, ug ngitngit kaayo, ug mibati ko og grabe kaayo nga kahadlok nga mibuntog nako samtang ako nagmaneho, nga dili gani kaayo nako makita ang dalan sa akong atubangan. Nasayod kaayo ko nga adunay unom ka bililhon nga mga kinabuhi sa akong mga kamot. Gusto ko nga mopadaplin hangtod nga monindot ang panahon, apan dili nako mahimo, o mabiyaan mi sa among biyahe sa eroplano.
Pagpangita og Kahayag
Samtang nagkagrabe ang akong kahadlok, mihimo ko sa bugtong nga butang nga akong nahunahunaan—nag-ampo ko.
Gisultihan nako ang Langitnong Amahan kon unsa ko kahadlok ug mihangyo Niya sa pagtabang namo nga moabot sa tugpahanan sa eroplano nga luwas. Apan ang ulan nagpadayon sa kusog nga pagbunok.
Sa dihang hapit na gayod ako mohilak ug mibati nga dili na ko makapadayon pa sa unahan, usa ka tibuok karsada nga adunay mga poste sa suga ang mitunga gikan sa wala mahibaloi nga dapit, miiwag sa akong agianan. Dihadiha dayon nakahunahuna ko sa akong Manluluwas ug unsa ka dakong kahayag ang Iyang gidala sa akong kinabuhi. Nakahibalo ko sa walay pagduda nga Siya ug ang Langitnong Amahan nakaila kanako kay akong gibati ang Ilang malumo nga kalooy ngari kanako.
Nakahibalo Sila sa akong mga kahadlok ug mitangtang niini sa pipila lamang ka segundo pinaagi sa kahayag.
Napuno sa nahibalik nga kompiyansa, nagpadayon ko sa dalan. Pero sulod sa mga segundo lang, kalit nakong nakita ang akong kaugalingon nga naa na usab sa kangitngit, nga ang kahayag nagkaawop sa akong likod. Swerte lang, uban sa gamay nga kompiyansa nga akong naangkon gikan sa mga poste sa suga, ang kangitngit dili na kaayo ingon ka makahahadlok.
Kini nahimo nga sumbanan hangtod sa kataposan sa biyahe. Matag higayon nga padulong na akong mohilak tungod sa grabe nga kahadlok ngadto sa akong Langitnong Amahan, naghunahuna, “Dili nako kini mahimo,” ang kahayag mopakita, nakapahimo nako sa pagpadayon. Ug sa kataposan, naabot kami sa tugpahanan sa eroplano.
Kita sa Kanunay Mahimong Modangop ngadto kang Kristo
Kini nga kasinatian nagpahinumdom nako sa atong panaw tadlas sa kinabuhi. Makaengkwentro kita og atong kaugalingon nga personal nga ulan, kangitngit, mga kahadlok, wala mailhi nga mga agianan, ug kamingaw usahay. Adunay mga higayon nga kita mobati nga dili na kita makapadayon, nga ang kahayag dili makaabot kanato, nga kita dili makahimo, o nga walay usa nga nakasabot sa kangitngit diin atong nakita nga anaa sa atong kaugalingon. Apan gusto ko nga mopaambit kaninyo sa akong personal nga pagsaksi nga adunay usa ka tawo kinsa nakasabot.
Si Jesukristo. “Ang kahayag ug ang kinabuhi sa kalib[o]tan” (3 Nephi 9:18). Ang usa kinsa nag-antos alang sa matag usa kanato sa personal nga paagi. Nakaila Siya kaninyo, ug Siya nakahibalo sa inyong mga kahadlok. Ug ang Iyang mga kamot nagdupa, andam sa pagtabang ninyo.
Matag higayon nga atong makita ang atong kaugalingon diha sa kangitngit, kini tungod man sa atong kaugalingon nga mga pagpili o sa mga pagpili sa uban o mga sirkumstansiya labaw sa atong pagkontrol, kita makapadayon sa pagpili nga moduol Kaniya. Ug Siya mohatag og kahayag alang kanato. Bisan og kana nga kahayag tingali dili kanunay nga dihadiha dayon, sama niadtong atol sa akong pagmaneho latas sa Ireland, si Jesukristo kanunay nga uban kanato ug mohatag kanato og kalig-on nga atong gikinahanglan aron magpadayon sa pagduol ngadto niana nga kahayag.
Sa akong labing ngitngit nga takna, gihatagan ako og kahigayonan nga mosalig sa paglaom ug hugot nga pagtuo. Ako napahinumdoman nga wala ako mag-inusara ug nga uban Kaniya, ako makabuntog sa tanan nga moabot sa akong agianan. Si Elder Timothy J. Dyches sa Seventy mipamatuod niadtong Abril 2021 nga kinatibuk-ang komperensiya nga “samtang kita mopalig-on sa atong hugot nga pagtuo kang Kristo, makadawat kita og kahayag sa dako kaayo nga sukod hangtod nga kini mobungkag sa tanan nga kangitngit nga posibl[e]ng moliyok kanato.”1
Ako modapit kaninyo sa pagpalig-on sa inyong hugot nga pagtuo ug pagsalig diha sa Manluluwas. Siya anaa aron sa pagpadala og kahayag nganha sa inyong kinabuhi sa bisan unsang matang nga inyong gikinahanglan. Ug Siya makabungkag sa bisan unsang kangitngit nga tingali nagliyok kaninyo. Sama sa gipahinumdom ni Elder Jeffrey R. Holland sa Korum sa Napulog Duha ka Apostoles kanato, “Imposible nga ang mahangt[o]rong kahayag sa Pag-ula ni Kristo dili moab[o]t kaninyo.”2
Ang atong buhaton mao lamang ang pagdangop ngadto Kaniya.