Mga Young Adult
3 Estratehiya sa Pagmaniubra sa mga Kausaban sa Kinabuhi
Ang mga kausaban sa kinabuhi makahatag og daghang kaugtas ug kabalaka, apan akong nakaplagan nga kining 3 ka estratehiya makatabang.
Kini ang usa sa labing talagsaon nga mga himan nga sukad namugna. Kini mas paspas ug mas epektibo kay sa bisan unsang computer, ug mausab kini base sa mga butang nga makat-unan niini mahitungod sa kalibutan. Butang kini nga ang tanan, sa walay pagsapayan sa bahandi o estado [status] makagamit, ug dili kini ninyo mapalit sa tindahan o sa online. Kini mas komplikado kay sa atong nahibaloan, ug aduna koy maayong balita alang kaninyo:
Kamo aduna niini. Gihatag kini sa Langitnong Amahan nganha kaninyo. Kini ang inyong utok.
Ang utok sa tawo talagsaon kaayo. Sama pananglit, hunahunaa kon magsipilyo kamo sa inyong ngipon. Aduna koy mga anak nga bata pa nga akong gipaningkamutan nga magsipilyo sila kanunay sa ilang mga ngipon, apan ako sa akong kaugalingon ang hanas na niini. Mobuhat ko niini nga walay usa nga magpahinumdom nako tungod kay ang akong utok na anad na niini nga kabahin sa akong tulumanon. Kon magsipilyo, dili nako kinahanglan nga i-Google kon hain nga tumoy sa sipilyo ang butangan og tootpaste—ang akong utok diha-diha mobutang niini diha tumoy nga dunay brush. Makasipilyo ko sa akong ngipon samtang naminaw sa usa ka podcast, makigsabut sa akong mga anak, o magbasa og usa ka libro tungod kay ang akong utok diha-diha dayon nasayud unsa ang buhaton.
Kini nga abilidad sa awtomatik nga paglihok kasagaran kaayo nga nakatabang kanato, apan unsa kaha kon moagi kita og mga kausaban nga kabahin niini nga kinabuhi? Usahay atong masinati ang kausaban nga wala nato planoha, sama sa pagdeborsyo o wala damha nga kamatayon sa usa ka minahal, apan bisan kon ang kinabuhi husto, moatubang gihapon kita og mga kausaban sa kinabuhi sama sa bag-ong mga lungsod, bag-ong mga trabaho, paggradwar sa kolehiyo, magminyo, pagbaton og mga anak, ug daghan pa.
Ang tinuod mao, ang utok dili ganahan og kausaban. Nagkinahanglan kini og daghang kusog aron masagubang ang kausaban tungod kay kita dili makalihok nga walay panimuot sama sa naandan. Ihiusa kini diha sa mga pagbati nga sa kasagaran maubanan og kausaban, ug kini usahay ingon og dili maagwanta.
Swerte lang, ato rang madawat ang unsay atong nahibaloan mahitungod sa utok ug lihukon kini aron maminusan ang kabalaka ug ang mga pagbati nga nabug-atan. Sulod sa katuigan, akong natino ang tulo ka mga estratehiya nga makatabang sa mga tawo nga makasagubang sa kabalaka ug kausaban nga ganahan nakong ipaambit diha kaninyo.
Estratehiya 1: Ipiho sa pagtutok ang inyong panglantaw.
Diha sa kausaban dunay mga butang nga moabut sa tawo nga dili niya pamilyar. Usahay ang utok mabug-atan kon adunay daghan kaayong dili pamilyar nga mga butang. Mahadlok kini sa mga butang nga dili pamilyar tungod kay nagtuo kini nga adunay peligro sa unahan.
Salamat, utok, tungod sa pagpabilin kanamo nga buhi.
Ang labing maayong paagi sa pagsagubang sa kausaban, nga akong nakaplagan, mao ang pagpiho og tutok sa inyong panglantaw sa unsay inyong nahibaloan. Kon magka-emosyonal ug magkabug-at ang kausaban, kinahanglan nga mapiho ang inyong pagtutok sa inyong panglantaw. Kon kamo wala damha nga nawad-an og trabaho, ang inyong utok lagmit gustong mohunahuna sa tanang matang sa mga butang. Unsaon ninyo pagbayad sa inyong balayranan? Unsaon ninyo sa pagpangita og laing trabaho? Kanus-a kamo makakita og trabaho? Unsa ka sakit kana nga proseso? Unsay hunahunaon sa mga tawo?
Niining daghan nga mga pangutana kita walay mga tubag karon mismo, apan wala gayud nato kinahanglana. Unsay sunod? Makalahutay ba kaha kamo hangtud sa pagtapos sa semana? Mao lang gyud kana ang kinahanglan ninyong masayran karon.
Usahay kon kita anaa sa grabeng emosyonal nga kasakit, kinahanglan lang nga mo-focus kita og usa ka adlaw sa matag higayon. Unsa kaha ang inyong ipamahaw? Sugdan lang nato diha.
Ipiho sa pagtutok ang inyong panglantaw aron mosangko sa kalinaw, ug gikan diha makakaplag kamo og tubag. Ang Ginoo mogiya kaninyo kon kamo magtinguha Kaniya ug mosalig Kaniya. “Magpaubos ka; ug ang Ginoo nga imong Dios moagak kanimo pinaagi sa kamot, ug mohatag kanimo og tubag sa imong mga pag-ampo” (Doktrina ug mga Pakigsaad 112:10).
Estratehiya 2: Tutukan ang kaugmaon, dili ang kagahapon.
Ang utok ganahan nga moadto sa kagahapon tungod kay kini adunay mga panumduman nga makuha diha, apan ang inyong kaugmaon mahimong lahi kay sa inyong kagahapon, ug kana usa ka maayong butang. Ang pagsige og handom sa unsay nangagi nga kagul-anan o gani ang paghisgut mahitungod sa “mas maayong kagahapon” kay sa unsa karon sayon rang buhaton, apan dili mapuslanon.
Sa dihang nakabaton ko sa akong unang anak, naghingapin ang akong kalipay mahitungod sa pag-angkon niining gamay nga tawo sa among panimalay ug dili makatuo kon unsa nako siya ka pinangga. Apan gibati usab nako nga nabug-atan kon unsa kadako ang pag-atiman nga iyang gikinahanglan ug ang akong pagkadili-sarang sa pagpakabuhi nga ingon ka gawasnon sama kaniadto. Nagsige ko og hunahuna kon unsa ka sayon ang kinabuhi kaniadto. Naghunahuna ko kon giunsa nako sa pagkaligo ug mag-atiman sa akong buhok sa kada buntag. Naghunahuna ko kon unsa ko kaganahan sa akong lawas kaniadto. Naghunahuna ko kon unsa kaanindot ang akong pagpahulay kaniadto ug mao nga mas lingaw. Lain akong pagbati kon magtutok ko sa akong kagahapon sama niini.
Sa kadugayan nakaamgo ko nga dili nako makaplagan ang mga tubag diha sa kagahapon. Kinahanglan ko nga magtutok sa kaugmaon. Kinahanglan nakong masugdan sa paghanduraw ang akong kaugalingon nga nagbuhat sa mga butang nga gusto nako sa akong kinabuhi, apan uban sa usa ka bata. Kinahanglan ako nga makonektar sa tawo nga gusto nako nga ako mamahimo, dili sa tawo nga sama sa akong naanaran. Kini dili kanunayng sayon, apan anaa kini kon kamo andam nga mobukas sa inyong kaugalingon ngadto sa posibilidad.
Ang Ginoo misulti kanato:
“Sa pagkatinuod, sa pagkatinuod, Ako moingon nganha kaninyo, kamo gagmay nga mga bata, ug kamo wala pa gihapon makasabut unsa ka dako ang mga panalangin sa Amahan nga anaa sa iyang kaugalingon nga mga kamot ug giandam alang kaninyo;
“Ug kamo dili makaantus sa tanan nga mga butang karon; sa ingon niana, paglipay, kay Ako mogiya kaninyo. Ang gingharian mainyo ug ang mga panalangin niana mainyo, ug ang mga katigayunan sa kahangturan mainyo.” (Doktrina ug mga Pakigsaad 78:17–18).
Estratehiya 3: Pagmanggiloy-on sa inyong kaugalingon.
Ang kausaban makatampo diha kanato sa labing maayo panahon sa mga kabalaka. Tingali daghan kaayo ang inyong mga pagbati. Ang pipila sa labing makadaot nga mga butang nga atong malitok sa atong kaugalingon mao ang mga hunahuna sama sa, “unta dili kaayo ko emosyonal; Unta mas maayo ang akong pagsagubang niini,” o. “Pasayloa ko dili ko ingon niana ka lig-on.”
Ang pagpanghinaut nga unta dili kaayo ka emosyonal dili makapahimo sa kausaban nga mas sayon. Makapadugang lang hinoon kini og kaulaw o pagbati nga sad-an dugang sa mga hagit nga inyo nang giatubang. Ang pagbaton og kamanggiloy-on sa kaugalingon [self-compassion] mao ang yawe.
Ang pagkamanggiloy-on moingon, “syempre lisud kini! Ok ra nga magkalisud”, ug,“Bisan pa pinangga ko ikaw.” Palihug isulti kining butanga sa inyong kaugalingon. Ayaw og dugangi ang inyong kasakit sa paghunahuna nga kamo dili angay nga manaa sa kasakit.
Ang Langitnong Amahan mipadala kanato dinhi sa yuta aron sa pagtabang kanato nga mas mahisama Kaniya, nga makahunahuna lang ko nga kita nagkinahanglan og dako kaayo nga kalamboan. Kon gusto ko nga magpadako sa akong kaunoran [muscles], kinahanglan ko moalsa og mga bug-at. Ang pagpanglimbasog sa pag-alsa niana nga mga bug-at makapainat sa akong nga kaunoran nga kon magsige sa pagkainat mas magkakusgan.
Ang atong espiritu sama usab niini. Kita nagkinahanglan og piho nga gidaghanon sa sukwahing pwersa aron makabalik nga mas kusgan kay unsa kita kaniadto.
Ang Ginoo mipasabut sa ingon niini nga paagi, “Ang akong mga katawhan kinahanglan pagasulayan sa tanan nga mga butang, nga sila unta maandam sa pagdawat sa himaya nga Ako aduna alang kanila, gani ang himaya sa Zion; ug nga siya nga dili makaantus sa mga pagpanton dili takus sa akong gingharian” (Doktrina ug mga Pakigsaad 136:31).
Ang kausaban usa ka paagi nga kining kinabuhia moumol kanato aron kita mas mahisama sa atong Amahan sa Langit. Pagbinuotan sa imong kaugalingon sa mga higayon sa kausaban. Kining tawhanong butang usahay lisud buhaton.