Digital Lamang: Mga Young Adult
3 ka Gamhanang mga Kamatuoran nga Akong Nakat-onan Samtang Nagserbisyo isip usa ka Temple Worker
Samtang nagserbisyo sa templo, akong nadawat ang usa ka hilom nga mensahe gikan sa Ginoo nga nagsulti kanako nga Siya nagpakabana kanako ug nahigugma kanako.
Usa ka adlaw samtang nagtambong og usa ka stake fireside, ako dihay panghunahuna nga gikinahanglan nako ang pagserbisyo sa templo. Nahibulong ako tungod kay ang ideya wala gayod sukad misantop sa akong hunahuna kaniadto, apan nakigsulti ako sa akong bishop mahitungod niini, ug siya matinabangon ug malipayon nga ako gusto nga moserbisyo.
Pipila ka bulan human niana, ako nahimong ordinance worker diha sa Manti Utah Temple. Bisan tuod ako naghinamhinam alang sa oportunidad, ako may gamay nga kabalaka nga kini mahimong lisod sa akong oras. Sinugdanan kadto sa akong ikaduhang tuig sa kolehiyo, ug ako kanunay nga naninguha sa paghimo sa akong kaugalingon nga nakatutok sa pag-eskwela. Kanunay akong mikuha og 18 ka kredito matag semestre ug nakakuha og mga tahas sa pagkapangulo diha sa pamantalaan sa estudyante ug sa literary journal sa kolehiyo.
Ang nahimong resulta, ako sayop. Ang pagserbisyo dili gayod lisod, apan usa ka panalangin nga akong mahalon sa tibuok nakong kinabuhi.
Ako buot nga mopakigbahin og tulo lamang ka butang nga akong nakat-onan atol sa akong panahon isip usa ka ordinance worker.
1. Ang Langitnong Amahan nakaila kanato sa personal ug gusto unsay labing maayo alang kanato.
Nakuyawan ako sa dihang misugod ako sa pagserbisyo diha sa templo tungod kay ako nahibalo nga kinahanglan nakong memoryahon ang mga pulong sa tanang mga ordinansa. Naguol akong masayop, busa migahin ako og mga oras sa pagtuon sa mga pulong sa pagsiguro nga akong makuha kini nga husto. Ug samtang akong nadungog ang mga istorya kabahin sa mga worker kinsa mibati ingon og ang Espiritu Santo mitabang kanila sa pagmemorya og dali sa mga pulong, dili kana mao ang akong kasinatian.
Usahay gibati ko ang kasuko nga ako nakigbisog sa pagmemorya sa mga pulong. Ang pagkat-on sa mga pulong sa unang ordinansa mikabat kanako og hapit usa ka bulan. Apan pagtan-aw sa nangagi, nakaamgo ako nga ang akong pakigbisog usa ka katingalahang panalangin. Nakahimo ako sa paglingkod diha sa balay sa Ginoo ug sa pagtuon sa mga pulong sa mga ordinansa sa daghang oras. Ug ang paglig-on sa akong pagsabot niadtong mga pulong midala kanako og kalinaw ug gahom sa akong kinabuhi. Nakahimo ako sa pag-ila sa tingog sa Ginoo nga mas klaro ug mas kanunay kon ako anaa sa sulod ug sa gawas sa templo.
Kini nga kasinatian usa ka ebidensya ngari kanako nga ang Langitnong Amahan nakaila kanato sa personal ug nakahibalo unsa nga mga kasinatian ang mahimong labing makaayo ngari kanato. Ang oportunidad sa pagpamalandong sa mga ordinansa mihatag kanako og mas maayong pagsabot kon unsa ang gisulti sa mga ordinansa ug milig-on sa akong tinguha sa pagsunod sa mga pakigsaad nga akong gihimo diha sa templo.
2. Kita hingpit nga gihigugma.
Sa panahon sa akong unang pagtrabaho sa tabil [veil] diha sa templo, may oportunidad ako sa pagtabang sa usa ka patron nga Kinatsila og pinulongan. Maarang-arang akong misulti og Kinatsila niana nga panahon, busa kini dako og kahulogan kanako nga nakatabang niana nga sister sa iyang ordinansa sa templo sa usa ka pinulongan nga ako makamao. Kini usa usab ka panalangin kanako tungod kay hilabihan nako sa kakuyaw mahitungod sa paghinumdom sa mga pulong, ug sa paghubad sa epektibo nga paagi nakahimo ako sa pagbasa sa mga pulong sa ordinansa.
Sa dihang ako gihangyo sa pagtabang sa ordinansa nga Kinatsila, akong gibati ingon og nadawat nako ang usa ka hilom nga mensahe gikan sa Langitnong Amahan nga nagpahibalo kanako nga Siya nagpakabana sa eksakto kon hain ako ug nga Siya nahigugma kanako sa hingpit. Ang pagsinati niini nga ordinansa sa lain nga pinulongan mitabang usab kanako nga mas makasabot niini tungod kay ako nakatutok diha sa Espiritu nga nagpamatuod ngari kanako sa pagkatinuod niini. Ug ako nakaangkon og mas maayong pagsabot sa unsay gipasabot niini nga mahimong kabahin sa usa ka tibuok kalibotan nga Simbahan nga puno sa daghang nagkalainlaing kultura ug pinulongan, ug sa gugma nga ang Langitnong Amahan aduna alang sa tanan Niyang mga anak.
3. Ang templo naghatag kanato og agianan ngadto sa gahom sa Dios.
Sa lain nga higayon nga ako nagtabang og usa ka patron diha sa tabil, nakurat ako sa pagkakita nga ang akong hinigugma mao ang worker nga nagtabang kanako. Diha sa iyang nawong nakita ko ang Kahayag ni Kristo. Aduna akoy pagbati nga ako diha sa diin ako kinahanglan nga maanaa niana nga higayon. Gibati ko ang dakong gugma alang sa akong hinigugma ug naglaom sa umaabot nga kami maghiusa.
Gibati ko usab ang gahom nga miabot gikan sa pagbaton og usa ka personal nga relasyon ni Jesukristo ug sa pagsunod sa akong mga pakigsaad. Ako napahinumdoman nga, kutob nga ako mobuhat sa kabubut-on sa Dios, ako makabaton og kaluwasan ug kalinaw. Sumala sa gipamulong ni Presidente Rusell M. Nelson: “Ang tanan nga gitudlo diha sa templo … makadugang sa atong pagsabot ni Jesukristo. Ang Iyang mahinungdanon nga mga ordinansa nagbugkos kanato ngadto Kaniya pinaagi sa sagrado nga mga pakigsaad sa pagkapari. Dayon, kon kita motuman sa atong mga pakigsaad, Siya motuga kanato sa Iyang makaayo, makapalig-on nga gahom. Ug oh, unsa kadako sa atong panginahanglan sa Iyang gahom sa mga adlaw nga umaabot.”1
Ang pagka-ordinance worker diha sa templo sa tinuod mitabang kanako nga mas makasabot sa gahom sa mga pakigsaad nga kita naghimo ug ang kalig-on nga gidala niini. Dili tanan ang makahimo sa pagserbisyo isip usa ka ordinance worker, apan tanan kita sa gihapon makapaninguha sa pagserbisyo diha sa templo sa kanunay kutob sa mahimo. Sa pagbuhat sa ingon, ako nahibalo nga kita mobati sa gahom nga kini nagdala nganhi sa atong mga kinabuhi, ug kita mas mapaduol ngadto ni Jesukristo ug mapalig-on ang atong espirituhanong pundasyon.