Digital Lamang: Mga Young Adult
Ako ba Ulahi na Kaayo nga Moserbisyo og Misyon?
Sa edad nga 25, ako nagtuo nga ako wala nay mga kahigayonan sa pagserbisyo og usa ka misyon.
Sa paggradwar gikan sa hayskul, mihukom ako sa pagbalhin ngadto sa Utah, USA, diin ang akong duha ka magulang nga mga lalaki nanimuyo human mibalik gikan sa ilang mga misyon. Misugod sila sa ilang kaugalingong mga kompaniya sa pagtukod [construction] ug mihatag kanako og oportunidad sa pagtrabaho alang kanila samtang ako naninguha sa paghunahuna kon unsa ang akong gusto sa akong kinabuhi.
Silang duha naninguha sa pagdani kanako sa pagserbisyo og usa ka misyon. Kanunay akong mibati og kadasig sa pag-alagad og usa ka misyon apan napakyas sa pagpangandam. Kay sa maghimo hinoon sa gikinahanglang mga pagpangandam sa pagserbisyo og misyon, mipili ako sa pagserbisyo diha sa laing kapasidad. Sa edad nga 20, mipalista ako isip usa ka medik diha sa Kasundalohan sa US.
Bisan pa sa akong pag-apil sa kasundalohan, ang kadasig sa pagserbisyo og usa ka misyon wala gayod mibiya. Samtang mipadulong ako sa kataposang tuig sa akong pagpalista sa pagkasundalo, ako namalandong kon unsa ang sunod.
“Magpalista ba ako pag-usab sa pagkasundalo? Humanon ko ba ang akong pag-eskwela sa kolehiyo? O ako molihok ug mohimo sa gikinahanglang mga kausaban sa akong kinabuhi, maghinulsol, ug mangandam sa pagserbisyo og usa ka misyon? Bisan og ako gusto nga moserbisyo, ako ba tigulang na kaayo?” Kini ang pipila sa mga pangutana nga misulod sa akong hunahuna.
Samtang ako naghunahuna kon moserbisyo ba og misyon, kusog ang akong gibati nga adunay mga tawo nga naghulat alang kanako sa pagdapit kanila sa pagduol ngadto ni Kristo. Kini nga panghunahuna mao ang nag-aghat alang sa akong desisyon sa pagpangandam sa pagserbisyo og usa ka misyon. Mihukom ako nga bisan og ako may gamay lamang nga higayon nga makaserbisyo og usa ka misyon sa akong edad, ako kinahanglang mosulay.
Naghunahuna ako alang sa kadaghanan sa umaabot nga mga misyonaryo, ang bul-og sa pagbati ug ang gahom sa Espiritu Santo mihasmag kanila sa pag-abli ug pagbasa sa ilang tawag sa misyon. Hinoon, alang kanako, kana nahitabo sa adlaw nga ako gipahibalo nga sa gihapon ako angayan pa nga moaplay sa pagserbisyo og usa ka misyon.
Samtang ako mihinulsol ug miandam sa akong kaugalingon sa pagserbisyo, gibati nako ang dako kaayong pasalamat ngadto sa Manluluwas, si Jesukristo, ug sa akong Langitnong Amahan. Akong gibati nga sama og Sila migakos sa Ilang mga bukton kanako ug mingon: “Kami nagpasaylo kanimo. Kami nagdawat sa imong paghinulsol ug sa mga kausaban nga imong gihimo ug kinsa ikaw mahimo. Takos ikaw nga magserbisyo.” Gibati ko ang pagkamadaogon.
Sa kadugayan akong nadawat ang akong tawag sa pagserbisyo sa Philippines Quezon City Mission.
Ang pagsulod sa missionary training center sa edad nga 25 usa ka talagsaong kasinatian. Kadaghanan sa ubang mga misyonaryo mga mas batan-on pa. Daghan ang bag-ohay nga migradwar gikan sa hayskul o nahuman sa ilang unang tuig sa kolehiyo. Daghan ang nagsinati sa ilang unang higayon nga malayo gikan sa panimalay ug sa pamilya. Alang kanako, ako mao pa lamang ang pagkahuman sa upat ka tuig diha sa Kasundalohan sa US ug naanad na ngadto sa daghang mga sakripisyo ug mga pagpahiangay nga ang ubang mga misyonaryo mosinati pa lamang. Ang akong kasinatian naghatag kanako sa oportunidad sa dili kaayo pagtutok sa akong kaugalingon ug mas molugway og kaluoy ug pag-awhag ngadto sa uban. Ang akong edad ug kasinatian mihatag usab kanako og panabot ngadto sa bili sa panahon ug mihatag og pagdasig sa pagserbisyo uban ang pagtutok, katuyoan, ug kakugi.
Ang akong misyon kanunay nga mahimong usa sa labing importanting mga kasinatian sa––ug alang sa––akong kinabuhi. Kini milig-on ug misiguro sa akong pundasyon nga natukod diha sa tukoranan sa akong Manunubos (tan-awa sa Helaman 5:12). Ako hilabihan ka mapasalamaton nga ako adunay oportunidad sa pagserbisyo.
Nagpamatuod ako nga ikaw dili pa gayod tigulang kaayo sa pagdala og mga kalag ngadto ni Kristo––isip usa ka full-time nga misyonaryo o isip usa ka higala o silingan. Ang Ginoo nagdawat sa atong tanang mga paningkamot sa pagserbisyo Kaniya—diha sa tanang edad.