Digital Lamang
Nagdawat og Hingpit nga Kalipay ug Kalig-on pinaagi sa Pagsunod sa mga Pakigsaad sa Templo
Ang pagtambong sa templo nga nag-inusara usahay mahimong malisod, apan ang Langitnong Amahan nagpuno kanato uban sa Iyang putli nga gugma, malahutayong kalig-on, ug mahangtorong hingpit nga kalipay samtang kita naningkamot sa pagtahod sa atong mga pakigsaad sa templo.
Pahinumdom: Kini nga artikulo narebyo sa Departamento sa Templo.
Ang tagsulat nagpuyo sa Utah, USA. |
Litrato nga giposingan sa modelo
Isip usa ka miyembro sa Simbahan kinsa wala pa maminyo, ako na-endowed sulod sa kapin sa 18 ka tuig nga walay kapikas nga mouban kanako ngadto sa templo. Alang sa pipila kanato niini nga sitwasyon, uban niadtong kinsa diborsyado, nabalo, o naminyo apan kansang kapikas wala maghupot og bag-ong rekomend sa templo, kini mahimong makahagit ang pagserbisyo ug pagsimba sa templo. Mahimo kita nga adunay nagtubo nga mga pagbati sa pagkanag-inusara tungod sa mga mensahe sa mahangtorong kaminyoon ug pamilya nga gilakip sa tibuok nga mga ordinansa. Bisan tuod og ako makakonektar ngadto niini nga mga pagbati sa pakigbisog usahay, miabot ako sa pagkaamgo nga imbis itutok diha kon nadawat ba o wala ang tanang panalangin nga gisaad diha sa templo, ako makatutok sa paghalad sa tanan nga ako makahatag sa sulod––ug sa gawas–– sa templo ngadto sa Langitnong Amahan ug ni Jesukristo.
Simeon Reverencing the Christ Child [Si Simeon Naghatag og Balaang Pagtahod sa Batang Kristo], ni Greg K. Olsen
Sulod sa lima ka tuig, ako mitrabaho isip ang sekretarya sa presidente sa templo sa Salt Lake Temple. Usa ka nindot nga painting, “Simeon Reverencing the Christ Child,” gibitay diha sa bungbong duol sa akong lamesa. Kini mipakita ni Maria ug Jose nga nagpresentar ni Jesus diha sa templo ug naghalad og usa ka parisan sa salampati sumala sa balaod ni Moises, ang usa alang sa halad sa sala ug ang lain alang sa sinunog nga halad (tan-awa sa Levitico 12:6, 8).
Sa matag higayon nga ako moagi sa may painting, ang mga mata sa langgam ingon og nagtan-aw gyod kanako, ug akong bation ingon og ang Ginoo naggamit niining simbolikanhong imahe sa pagpangutana kanako, “Unsa ang imong ikahalad samtang imong ipresentar ang imong kaugalingon ngari Kanako?”
Kasagaran akong makaplagan ang akong kaugalingon nga gibati ang “Ako mao ang halad nga ipresentar nganha Kaniya.” Ang akong tibuok nga kinabuhi––ang akong kaugalingon nga pagkamasulundon sa akong mga pakigsaad nganha Kaniya––sa kataposan mao ang akong gasa ug halad, ang akong “pagkabalaan ngadto sa Ginoo.”
Ingon nga ang Apostol Pablo midapit kanato, kita makahimo sa “pagtugyan sa [atong] mga lawas ingon nga halad nga buhi, balaan, hinangponon sa Dios, ang halad nga mao ang inyong espirituhanong pagsimba” (Mga Taga-Roma 12:1). Alang kanako, kabahin niining buhi nga sakripisyo ngadto sa Dios makaapil sa akong halad sa
-
pagtuman sa akong mga saad ngadto Kaniya nga akong nahimo pinaagi sa akong mga pakigsaad sa templo,
-
pagpaningkamot sa pagtahod ug pagsunod sa mga sugo,
-
“pagpatigbabaw sa Dios”1 pinaagi sa pag-una Kaniya sa akong inadlaw nga kinabuhi,
-
pagpangalagad ngadto sa uban sa sagad ug maamumahong mga paagi ingon nga pagabuhaton ni Kristo,
-
pagpakita og pasalamat alang sa mga oportunidad nga nahatag sa Langitnong Amahan kanako sa pag-apil sa Iyang buhat dinhi sa yuta,
-
ug andam sa pagsalig sa Ginoo samtang Siya naggiya kanako ngadto sa nagkalain-laing mga dalan nga Siya nag-andam alang sa akong kinabuhi.
Bisan kanus-a kita mangita ug maminaw og pagpadayag, ako nahibalo nga ang Langitnong Amahan motabang kanato nga mahibalo kon unsa nga mga halad ang buhaton ngadto Kaniya sa matag adlaw ug sa atong tibuok nga mga kinabuhi.
Ang Gugma ug mga Saad sa Ginoo
Samtang ako naningkamot sa paghatag og balaang halad ngadto sa Dios pinaagi sa paagi nga ako nagpili sa pagpuyo, ako hingpit nga nahibalo nga kini pinaagi lamang sa akong Manluluwas ug sa Iyang mahangtorong sakripisyo nga gani kini posible. Tungod kay “walay lain nga ngalan nga gihatag ni lain nga mga agianan ni mga paagi diin ang kaluwasan modangat,… , lamang diha ug pinaagi sa ngalan ni Kristo” (Mosiah 3:17). Kining sukaranang kahibalo naghatag kanako og suporta uban ang mas dakong kalig-on sa pagdugang sa akong personal nga relasyon ngadto Kaniya.
Sa dihang si Kristo miadto sa America human sa Iyang Pagkabanhaw, ang mga Nephite “miduol tagsa-tagsa … ug nakakita uban sa ilang mga mata ug mibati uban sa ilang mga kamot, ug nasayod sa pagkatinuod … nga kini mao siya … kinsa mao ang moabot” (3 Nephi 11:15).
Gibati ko ang samang matam-is nga kasigurohan sa adlaw nga ako misulod sa templo sa pagdawat sa akong pagtoga. Samtang ako giubanan ngadto sa dapit alang sa ordinansa sa initiatory, ang akong kasingkasing (ingon man ang mga palibot) hilabihan ka walay timik ug hilom. Ang matag bahin sa ordinansa mipahinumdom kanako kon unsa ka indibidwal ang akong kaluwasan ug giunsa nga ang malumong gugma ni Kristo alang kanato gipakita sa tinagsa-tagsa. Kini nakapadasig kanako sa pagpamalandong sa kamahinungdanon sa akong mga pakigsaad.
Sukad nianang adlawa, ako hugot nga mikupot ngadto sa kalig-on nga akong naangkon gikan sa nagpadayong tinguha sa pagsunod sa akong mga saad ngadto Kaniya, ug ako ilabi nga mihupot ngadto sa Iyang mga saad usab ngari kanako.
Sama pananglitan, pipila ka piho nga gisaad nga mga panalangin diha sa ordinansa sa initiatory kalabot ngadto sa kaminyoon ang wala pa matuman alang kanako. Nahibalo ako nga kini mahimong sagad usahay sa pakigbisog uban ang limitado nga mortal nga panan-aw, apan ako hingpit nga nagtuo nga ang Ginoo nakakita sa tanang mga butang ingon nga anaa sa Iyang atubangan karon2––bisan kadtong mga tinguha nga kita nangandoy nga madawat sa umaabot.
Kon ang Manluluwas mamulong, kita makasalig nga Siya motuman sa Iyang mga saad, tungod kay Siya sa kanunay kasaligan. Ug diha sa Iyang pagkamaalamon sa tanang mga butang ug mahangtorong panglantaw, ang Iyang bahin sa pakigsaad natuman na.
Usa ka paborito ko nga kasulatan mabasa:
“Ang Dios gamhanan sa pagtuman sa tanan niya nga mga pulong.
“Kay siya motuman sa tanan niya nga mga saad diin siya mihimo nganha kanimo” (Alma 37:16–17).
Kining lawom nga pamahayag nagdala kanako og hilabihang hingpit nga kalipay ug kalig-on sa pagpadayon sa unahan!
Hingpit nga Kalipay nga Mabuhi
Ang pagtuo ug pagsalig niini nga mga saad––bisan og ang uban ingon og “halayo” (Mga Hebreohanon 11:13)––makagiya kanato sa pagdawat gani sa mas dako nga kapasidad alang sa hingpit nga kalipay nga mabuhi diha sa atong mga kinabuhi karon ug sa unya. Ang kinabuhi dili walay mga hagit, bisan pa sa ato karon nga mga sitwasyon. Ang mga pagsulay kabahin sa plano sa Langitnong Amahan sa kaluwasan, apan mao usab ang kalipay.
Isip mga miyembro kinsa sa pagkakaron dili minyo, kita mahimong mangandoy og kapikas ug gipanag-iya dinhi niini nga panaw sa mortalidad nga usahay pagabation sama sa usa ka nag-inusara ug mingaw nga kalibotan. Apan ang pagpuyo duol ni Kristo makadala kanato og kalig-on ug mahangtorong kalipay.
Mipahinumdom si Alma kanato nga “ang Ginoo nagsangkap alang kanila nga sila dili gutomon, ni sila uhawon; oo, ug siya mihatag usab ngadto kanila og kusog, nga sila dili mag-antos sa bisan unsa nga matang sa mga kasakit, kay kini mabuntog diha sa hingpit nga kalipay ni Kristo” (Alma 31:38).
Ako mapasalamaton nga samtang akong gitahod ang akong mga pakigsaad sa bunyag ug sa templo diha sa akong paghalad ngadto Kaniya, si Kristo naghatag––ug mopadayon sa paghatag––alang sa akong mga panginahanglan, ma-espirituhanon, ma-temporal, o ma-emosyonal. Ako usab napuno uban sa “kalinaw sa Dios nga lapaw sa tanang panabot” (Mga Taga-Filipos 4:7), ug diin nakapahimo kanako sa paglahutay sa akong panaw sa kinabuhi uban ang hingpit nga kalipay.
Ingon nga gitudlo ni Presidente Russell M. Nelson, “Mobati kita og kalipay bisan unsa pay nahitabo––o wala mahitabo––sa atong mga kinabuhi. Ang kalipay moabot gikan ug tungod [ni Jesukristo]. Siya ang tinubdan sa tanang kalipay.”3
Usa ka Halad sa Pagkabalaan
Sa matag higayon nga ako naghunahuna sa painting sa mga salampati, ako gibalik-balik sa pagpahinumdom sa paghalad sa akong kaugalingon ngadto ni Kristo pinaagi sa akong pagpuyo sa pakigsaad. Ako labaw nga mapasalamaton alang sa mga saad nga Siya nagtanyag kanako pinaagi sa pagsunod sa akong mga pakigsaad sa templo.
Kon ikaw wala pa makadawat sa imong makaluwas nga mga ordinansa diha sa templo o wala makatambong alang sa personal nga pagsimba sa templo og dugay-dugay na tungod sa bisan unsa nga rason, ako mahigugmaong nagdapit kaninyo sa pagsalikway sa bisan unsa nga milabay o karon nga mga babag ug sa paghimo sa gikinahanglang mga paningkamot sa pagsulod niadtong gibalaang mga pultahan. Samtang ikaw naghimo sa ingon, ikaw makahimo sa pagdawat sa kalig-on ug sa hingpit nga kalipay nga ang Langitnong Amahan ug si Jesukristo nagtanyag kanato pinaagi sa pagsimba sa templo ug sa mga pakigsaad.
Ako nahibalo nga ang templo usa ka dapit nga makapausab kanato––dili tungod sa balaang gambalay mismo apan tungod kang kinsa kini nagrepresentar ug sa unsang paagi kini nagtudlo kanato ngadto ni Jesukristo. Kon kita mosulod niadtong gibalaang mga pultahan, akong bation ingon og kita tagsa-tagsa nagpuno sa atong mga lampara uban sa espirituhanong mga lana samtang nag-andam kita alang sa pagbalik sa Manluluwas (tan-awa sa Mateo 25:1–13). Ang paghimo ug pagsunod sa atong mga pakigsaad sa bunyag ug sa templo nag-andam kanato sa pagdawat sa tanan nga giandam sa Amahan alang kanato.
Samtang kita nagsunod sa atong mga pakigsaad, ako nagsalig nga ang atong Langitnong Amahan ug ang atong Manluluwas mopuno sa atong mga kinabuhi uban sa gipadako nga gahom sa paglihok diha sa hugot nga pagtuo ug inubanan sa naglamdag nga hingpit nga kalipay magpuyo sa kinabuhi nga kita hilabihan ka madagayaong gihatagan sa Dios.