Digital Lamang: Mga Young Adult
Ang Pagkat-on sa Kahulogan sa Sakripisyo isip usa ka Kinabig
Akong gibati nga ako kinahanglang mobiya og daghang butang sa pagpasakop sa Simbahan. Apan ako nahibalo nga kon adunay usa nga nakasabot og sakripisyo, kini mao si Jesukristo.
Isip usa ka bata, sayo akong mimata sa panahon sa semana, ug ang Dominggo mao lamang ang adlaw nga ang akong inahan motugot kanako nga matulog og dugay––kana nga, hangtod ang Kristiyano nga kongregasyon sa sunod pultahan mopukaw kanako sa ilang kusog nga pagkanta, pagwali, ug gani paghilak usahay. Kini binuang, apan tungod sa akong kalagot nga gipukaw kada semana, naghunahuna ako nga ang mga Kristiyanos may gamay nga pagkasalawayon.
Nahibaloan ko sa kadugayan nga daghang mga sakop sa kongregasyon nga Kristiyano ang mihatag sa ilang oras ug gani kwarta ngadto sa ilang simbahan. Wala lamang gayod ako makasabot kon ngano.
Tungod nining duha ka obserbasyon mahitungod sa mga simbahang Kristiyano diha sa akong lungsod sa India––gihiusa uban sa kamatuoran nga ang akong pamilya ug ako dili Kristiyano––gamay ang akong interes sa pagkat-on pa og dugang mahitungod sa Kristiyanismo.
Nagdiskobre ni Jesukristo
Sa panahon sa akong kataposang tuig sa unibersidad, gidapit ako sa akong higala sa pagtambong sa iyang simbahan uban kaniya. Nag-ukon-ukon ako apan sa kadugayan miuyon.
Samtang ako milingkod diha sa miting, nagkanta sa mga himno ug nagpaminaw ngadto sa mga mensahe mahitungod ni Jesukristo, gibati nako ang usa ka butang nga lahi––gibati nako ang kalinaw. Mitambong ako og pipila pa ka semana ug gibati ang samang pagbati sa matag higayon. Apan sa tinuod, ako nagbisita lamang; ako walay interes sa tinuod sa pagpasakop.
Pipila ka panahon human ako mihunong sa pagtambong sa simbahan uban sa akong higala, misugod ako sa pagbati sama og ako may kulang og usa ka butang sa akong kinabuhi. Gimingaw ako sa kalinaw nga akong gibati diha sa simbahan uban sa akong higala. Ako dihay lig-on nga pagbati nga kinahanglan akong mokat-on pa mahitungod ni Jesukristo, busa mihukom ako sa pagpakigkita sa mga misyonaryo gikan sa simbahan sa akong higala. Wala gani ako maghunahuna kon unsa ang hunahunaon kaha sa akong pamilya.
Nag-atubang og mga Babag
Sa dihang ako nakigkita sa mga misyonaryo, ang akong kinabuhi misugod sa pagkausab. Akong nakat-onan ang mahitungod sa Pagpahiuli ug sa Basahon ni Mormon, ug ang mga misyonaryo mitabang sa pagtubag sa akong daghang pangutana.
Usa ka adlaw akong nakaplagan ang usa ka kasulatan nga miingon, “Bisan unsa nga butang nga ikaw mangayo diha sa hugot nga pagtuo, … ikaw makadawat niini” (Enos 1:15), ug ako nahibalo nga ako wala mag-inusara. Gibati nako nga ingon og nasabtan sa Dios ang akong sitwasyon ug gusto nga mohupay kanako. Samtang ako miabot sa pag-ila sa gugma sa Dios alang kanako, ako gusto nga mahimong usa ka mas maayong tawo. Ako gusto nga mahimong sama sa Manluluwas ug mahimong usa ka miyembro sa Ang Simbahan ni Jesukristo sa mga Santos sa Ulahing mga Adlaw.
Apan samtang ang akong pagpamatuod mitubo, nasugatan ko usab ang mga babag. Sa dihang nahibaloan sa akong inahan nga ako naghunahuna sa pagpabunyag, gisultihan ako niya nga kinahanglan akong mobiya sa balay ug moputol sa pakigkontak kaniya. Ug sa dihang ako mipakigbahin og mga kamatuoran mahitungod sa Manluluwas diha sa social media, daghang mga higala ug mga sakop sa akong mga paryente ang mibabag sa akong mga mensahe ug mihunong sa pakigtingog kanako.
Ako mibati ingon og ako gipapili tali sa akong pamilya ug sa ebanghelyo––usa ka desisyon nga ingon og imposible. Ako nagsakripisyo og daghan sa unsay akong gimahal aron sa pagpasakop sa Simbahan. Apan ako nahibalo nga kon adunay usa nga nakasabot og sakripisyo, kini mao si Jesukristo (tan-awa sa Alma 34:8–16).
Ug busa ako nagpadayon sa pagpaninguha nga mas mapaduol ngadto sa Manluluwas. Gani ako mobiya sa panimalay taliwala sa gabii sa pag-ampo ug sa pagbasa sa Basahon ni Mormon aron ako makalikay sa dili pag-uyon sa akong pamilya. Pinaagi sa pag-ampo ug sa hugot nga pagtuo, sa kadugayan ako mihukom nga bisan unsa pa ang mahitabo, akong pilion ang ebanghelyo. Ang hingpit nga kalipay ug katuyoan nga akong nakaplagan diha sa ebanghelyo takos sa tanan ngari kanako.
Paghatag Ngadto, Dili Pagbiya
Ang pagpasakop sa Simbahan nahimong usa ka dako kaayo nga sakripisyo alang kanako. Ang pagserbisyo sa akong mga calling, pagbayad sa ikapulo, ug ang pagpaningkamot sa pagpabilin sa mga relasyon usahay nahimong mahagiton. Apan sama niadtong mga kongregasyong Kristiyano sa akong lungsod kinsa bukas nga mihatag ngadto sa ilang tinuohan, ako nahibalo nga ang akong mga sakripisyo mga ingon usab og sobra pa kadaghan kay sa unsay akong gitalikdan.
Si Bishop L. Todd Budge, Ikaduhang Magtatambag sa Presiding Bishopric, mipasabot: “Kon ang atong mga sakripisyo alang sa kaayohan sa uban gikonsiderar gikan sa ‘paghatag,’ kita mahimong motan-aw niini isip palas-anon ug mahimong mawad-an og kadasig kon ang atong mga sakripisyo wala ilha o gantihi. Hinoon, kon gikonsiderar kini gikan sa ‘paghatag ngadto ’sa Ginoo, ang atong mga sakripisyo alang sa uban mahimong mga gasa, ug ang kalipay sa madagayaong paghatag maoy mahimong kaugalingong ganti niini.”1
Ang Langitnong Amahan nag-ila ug nagpanalangin kanato alang sa mga sakripisyo nga kita naghimo alang Kaniya. Nakita ko kini sa akong kinabuhi samtang naangkon nako ang gugma ug suporta sa mga miyembro sa akong ward, mibati sa kalinaw ug kahupayan gikan sa Espiritu, ug gisinati ang mga milagro sa akong kinabuhi. Usa ka milagro mao ang giunsa sa paghumok sa kasingkasing sa akong mga ginikanan ngari kanako ug nakahimo kami sa pagpadayon og maayong relasyon.
Karon ako nakahibalo kinsa ang Langitnong Amahan ug si Jesukristo ug unsa kadako ang ilang gugma sa matag usa kanato. Gibati nako sa akong kaugalingon nga nahimong mas sama sa Manluluwas, kinsa mao ang atong kataposang panig-ingnan, samtang ako naghimo og mga sakripisyo sa pagsunod sa akong mga pakigsaad. Samtang kita naningkamot sa pagserbisyo Kanila sa bisan unsa nga kapasidad nga kita makahimo, ako nahibalo nga kita pagagiyahan ug pasination sa daghang nindot nga mga panalangin nga Sila aduna nga giandam alang kanato.